Ditën e sotme sipas një protokolli strikt baret dhe restorantet në ambiente të mbyllura kanë hapur dyert për klientët e tyre. Gazetari i ABC News Maksi Rama u ndal në një restorant përgjatë orarit të drekës për të parë nga afër përgatitjet e stafit për këtë ndryshim të ri.
Në sy bie fakti se pavarësisht urdhrit të qeverisë, ambientet e brendshme të këtij lokali janë të zbrazura, kjo edhe për shkak të ndërgjegjësimit të qytetarëve. Duke folur për ABC News menaxheri i këtij restoranti u shpreh se hapja ka rezervat dhe kostot e veta.
“Impakti negativ ka qenë sepse ka shumë punëtorë që janë limituar. Hapja ka rezervat e veta sepse duhet të ketë një korridor të caktuar për klientët. Tashmë do shtohen maskat dhe dorezat. Do jetë largësia e tavolinave sipas protokollit. Por ne do mundohemi të përshtatemi. Ka kosto sepse do kemi më pak tavolina. Stafi i orienton. Por tani edhe klientët janë më të orientuar. Shpresojmë që kjo të mos vazhdojë shumë sepse ka kosto në biznes”, tha ai./mv. abcnews.al
