Hakerët nga Koreja e Veriut vodhën rreth 659 milionë dollarë amerikanë të kriptovalutave në vitin 2024, sipas një deklarate të përbashkët nga Koreja e Jugut, SHBA dhe Japonia.
“Vitin e kaluar, hakerët e Koresë së Veriut vodhën 235 milionë dollarë nga shkëmbimi indian i bitcoin VazirX dhe 50 milionë dollarë nga platforma Radiant Capital. Përveç kësaj, kriminelët kibernetikë vodhën afërsisht 374.13 milionë dollarë nga shkëmbimet e kriptove DMM Bitcoin, Upbit dhe Rain Management”, thuhet në deklaratë.
Kjo është deklarata e parë publike në të cilën të tre vendet kanë identifikuar së bashku përgjegjësit për vjedhjen e kriptomonedhave dhe objektivat e sulmeve.
“Tri qeveritë tona, duke përfshirë sektorin privat, po punojnë së bashku për të parandaluar vjedhjen dhe rikuperimin e fondeve të vjedhura, me qëllimin përfundimtar për të privuar Korenë e Veriut nga fitimet e paligjshme për programet e saj të paligjshme të armëve luftarake dhe raketave balistike”, shton deklarata.
Vendet theksuan gjithashtu se programi kibernetik i Koresë së Veriut përbën një kërcënim të rëndësishëm për integritetin dhe stabilitetin e sistemit financiar ndërkombëtar./abcnews.al
