Presidenti Emmanuel Macron ka thënë se Franca do të tërheqë ambasadorin e saj dhe do të përfundojë të gjithë bashkëpunimin ushtarak me Nigerin pas një grushti shteti, raporton BBC. Ai shtoi se bashkëpunimi ushtarak kishte “mbaruar” dhe trupat franceze do të largoheshin në “muajt në vijim”.
“Franca ka vendosur të tërheqë ambasadorin e saj. Në orët e ardhshme ambasadori ynë dhe disa diplomatë do të kthehen në Francë”, tha Macron. Junta ushtarake e cila mori pushtetin në Niger në korrik e përshëndeti vendimin. “Këtë të dielë ne festojmë një hap të ri drejt sovranitetit të Nigerit,” tha junta.
Ka rreth 1500 ushtarë francezë në vendin e Afrikës Perëndimore. Vendimi i Parisit vjen pas disa muajsh armiqësi dhe protesta kundër pranisë franceze në vend, me demonstrata të rregullta në kryeqytetin Niamey. Masa i jep një goditje operacioneve të Francës kundër militantëve islamikë në rajonin më të gjerë të Sahelit dhe ndikimit të Parisit atje.
Por Macron tha se Franca “nuk do të mbahet peng nga puçistët”, duke folur për stacionet televizive franceze TF1 dhe France 2. Macron tha se ai ende e konsideronte presidentin e rrëzuar të Nigerit, Mohamed Bazoum, aktualisht i burgosur nga krerët e grushtit të shtetit, si “autoritetin e vetëm legjitim” të vendit dhe e kishte informuar atë për vendimin e tij. Ai e përshkroi presidentin e rrëzuar si “peng”.
Nigeri është një nga disa ish-kolonitë franceze në Afrikën Perëndimore ku ushtria ka marrë kontrollin kohët e fundit pas Burkina Fasos, Guinesë, Malit dhe Çadit. Grushti i shtetit i fundit ishte në Gabon në gusht./abcnews.al
