Eros Grezda la Rangers në merkaton e janarit dhe u rikthye te Osijek në Kroaci, klub në të cilin zhvilloi sezonin më të mirë të jetës. Sulmuesi anësore nga Gjakova, ka qenë i ftuar në “Fan Zone” në Supersport, aty ku foli rreth karantinës, stërvitjes dhe kombëtares, e cila i mungon shumë.
KARANTINA – “Kam kaluar shumë mirë në karantinë, nuk jam mërzitur fare. E kam kaluar me të dashurën dhe nuk e kam kuptuar si kanë kaluar ditët kaq shpejt. Nuk e kam menduar asnjëherë çfarë do të bëj pas karrierës futbollistike Kam qenë i angazhuar me stërvitje dhe jam në formë shumë të mirë. Para se të vinte më e keqja nga koronavirusi, unë i kisha marrë masat për t’u stërvitur. Më pëlqen shumë Kroacia dhe, përveç motit, ka shumë gjëra të tjera të mira, ndihem shumë mirë këtu”.
STËRVITJA – “Kemi filluar të hënën stërvitjen normale. Ndeshja e parë do luhet më 31 maj, ndeshjet e Kupës, ndërsa më 3 qershor do nisë kampionati. Nga klubi kemi disa rregulla strikte. Duhet të vijmë në stërvitje vetëm 10 minuta para dhe në dhomat e zhveshjes nuk mund të shkojmë për të bërë dush. Takimi me shokët nuk na është ndaluar. Nëse lojtarët kanë bërë testet dhe kanë rezultuar negativë, nuk ka pse të kemi frikë gjatë ndeshjes “.
TRANSFERIMI – “Nuk jam bërë pishman për asgjë. Rangers është një klub shumë i madh. Kur më erdhi oferta nga ky klub isha i dëmtuar dhe nuk mund t’i refuzoja. Atmosfera që krijohej atje është ndryshe nga çdo vend tjetër. Atje jetohet futbolli shumë”.
KOMBËTARJA – “Me Rejën nuk kam pasur asnjë kontakt pas atij incidenti. Gjithmonë jap maksimumin dhe më pas do të shpresoj te grumbullimi. Rikthimi këtu më ka bërë shumë mirë, jam në një formë shumë të mirë. Nëse Reja më bën ftesë, atëherë do ta pranoja menjëherë”.
PROBLEMET – “Te Rangers nuk shkuan gjërat shumë mirë, kur ndërpreva kontratën me ta, kisha shumë mundësi për të luajtur në klube të mëdha, por dëshira ishte të kthehesha te Osijek, ku ndihem si në shtëpi”. /abcnews.al