Shpulla e Will Smith ndaj komedianit Chris Rock gjatë ceremonisë së ndarjeve të çmimeve Oscar nxiti reagime mediatike për gjestin e dhunshëm të aktorit. Natyrisht, reagimi i tij ekstrem nuk justifikohet. Por veprimi erdhi pas shakasë që bëri për flokët e rruara të gruas së tij, Jada Pinkett.
Komediani preku një problem familjar, ndonëse pa dashje. Jada nuk e ka rruar kokën për çështje stilistike por si rezultat i alopecisë me të cilën aktorja është diagnostikuar vitet e fundit. Hera e parë që foli hapur për sëmundjen autoimune ishte në një intervistë që dha në vitin 2018.
“Një ditë isha në dush dhe e gjeta veten me një tufë flokësh në duar dhe isha në një fazë: “O Zot, do të bëhem tullace”. Ishte një nga ato momentet në jetën time që u drodha nga frika. Prandaj i pres flokët dhe vazhdoj t’i pres. Të gjithë e dini që unë luftoj kundër alopecisë.”
Zgjedhja e Jada Pinkett Smith për të ndarë përvojën e saj, edhe pse e përshkruar nga shumë njerëz si e paprecedentë, është frymëzuese. /abcnews.al
