Policia e Fierit ka finalizuar operacionin e koduar “Unik”, ku janë sekuestruar sasi të lëndëve narkotike heroinë, kokainë dhe kanabis.
Grupi kriminal i goditur kishte përshtatur një lokal, për shitjen dhe përdorimin e drogërave të forta dhe të kanabisit.
Si rezultat i këtij operacioni u arrestuan shtetasit, Klejdi Çela dhe Zhanri Hajdari, ndërsa janë shpallur në kërkim shtetasit, Marsel Korreshi, i dënuar më parë për të njëjtën vepër penale dhe Selim Koçi.
Njoftimi i policisë:
DVP Fier/Finalizohet pas një hetimi proaktiv disamujor, operacioni policor i koduar “Unik”, sekuestrohen sasi të lëndëve narkotike heroinë, kokainë dhe kanabis.
Operacioni, në vazhdën e operacioneve të njëpasnjëshme për goditjen e veprimtarive kriminale në fushën e narkotikëve.
Goditet një grup kriminal që kishte përshtatur një ambient (lokal), për shitje dhe për përdorim të drogave të forta dhe të kanabisit.
Arrestohen në flagrancë 2 nga pjesëtarët e këtij grupi kriminal, shpallen në kërkim 2 të tjerë.
Specialistët për Hetimin e Narkotikëve dhe shërbimet operacionale të DVP Fier, pas një hetimi proaktiv disamujor, të kryer në bashkëpunim me Prokurorinë e Lushnjës, me mbështetjen e inteligjencës informative, për një grup kriminal që shiste droga të forta dhe kanabis në një lokal të përshtatur për këtë veprimtari kriminale, organizuan dhe finalizuan operacionn policor të koduar “Unik”, si rezultat i të cilit u arrestuan në flagrancë shtetasit:
-Zh. H. (Gj.) (i dënuar më parë për të njëjtën veprimtari kriminale), 33 vjeç dhe K. Ç., 27 vjeç, të dy banues në Lushnjë.
Gjithashtu, në kuadër të këtij operacioni, u shpallën në kërkim shtetasit M. K., 33 vjeç (i dënuar më parë për të njëjtën veprimtari kriminale) dhe S. K., 29 vjeç, të dy banues në Lushnjë.
Nga provat e siguruara si rezultat i hetimit proaktiv, rezultoi se këta 4 shtetas ushtronin në formën e grupit, veprimtarinë kriminale të shitjes së drogave të forta dhe kanabisit, në një ambient (lokal) në lagjen “Kadri Qystri”, Lushnjë, i cili administrohej nga shtetasi i arrestuar K. Ç.
Gjatë kontrollit të ushtruar në këtë lokal, u gjetën 120 gram lëndë e dyshuar narkotike kokainë, 39 gram lëndë e dyshuar narkotike heroinë, si dhe dhjetëra doza të dyshuara lënde narkotike kanabis, të cilat u sekuestruan së bashku me 9 celularë, 1 automjet dhe një shumë parash e dyshuar e përfituar nga shitja e lëndëve narkotike. Gjithashtu, lokali ku kryhej kjo veprimtari kriminale, u bllokua nga shërbimet e Policisë.
Gjithashtu, për këtë rast u referuan materialet në Prokurori dhe nisi procedimi në gjendje të lirë për shtetasin K. A., 38 vjeç, banues në Lushnjë, pasi u kap në lokal, duke blerë lëndë narkotike.
Vijon puna për kapjen e shtetasve të shpallur në kërkim, si dhe për dokumentimin e plotë ligjor të kësaj veprimtarie kriminale.
Materialet procedurale i kaluan Prokurorisë pranë Gjykatës së Shkallës së Parë Lushnjë, për veprat penale “Prodhimi dhe shitja e narkotikëve”, “Përshtatja e lokalit për përdorim droge” dhe “Nxitja për përdorimin e drogës”.r.t/abcnews.al
