Organizatori i Festivalit ndërkombëtar të “Dancit Modern” Gjergj Prevazi thotë se ende nuk ka marrë një përgjigje nga Ministria e Kulturës për zhvillimin e aktiviteteve kulturore.
Ky vendim, ka lënë pezull sipas tij edhe zhvillimin e edicionit të 15-të.
“Nëse e konsiderojmë artin ushqim të patjetërsueshëm të shpirtit tonë, nuk duhet të hezitohet për hapje me protokolle përkatëse ashtu si gjithë Evropa i organizon”, u shpreh ai.
Ndarja e artistit me spektatorin është vrastare.
“Një vit me mungesë të theksuar të aktivitetit kulturor i bën dëm jo vetëm audiencës, por për artistët është vrastare”, theksoi ai.
Komunikimi ballazi u zëvendësua me atë virtual, por kur vjen fjala për koreografin, kjo kthehet në një mision gati të pamundur, sipas pedagogut të koreografisë.
Baleti flet me gjuhën e trupit, i cili nuk realizohet dot virtualisht
“Jo rastësisht në botën e baletit, partneri është një person shumë i rëndësishëm, është gati-gati si partneri në jetë”, tha ai.
Ndërkohë që ai është duke punuar për një koreografi të inspiruar nga dy lëkundje të mëdha që pësoi shoqëria , nga tërmeti dhe pandemia e covid-19.
“Kemi lëkundjen fizike që na e dha tërmeti dhe shkundje psikike që na e solli izolimi, që na rikujtoi se vlerat më të mëdha janë komunikimi, kontakti”, tha Prevazi.
Shumë kompani të njohura në botë janë fokusuar te realizimi i pjesëve mbi pandeminë si shenjë e kohës mbi të cilën po jetojmë./abcnews.al
