Disa prindër në Gaza kanë shkruar emrat e fëmijëve të tyre në këmbë apo duar për të ndihmuar në identifikimin e tyre nëse ata ose fëmijët vriten, sipas videove të filmuara nga një gazetar që punon për CNN.
Gazetari thotë se kjo praktikë është bërë më e zakonshme ditët e fundit. Ka pasur skena kaotike në disa spitale të Gazës pas sulmeve ajrore, me hapësirë të pamjaftueshme për të trajtuar fluksin e pacientëve dhe morgjet e tejmbushura.
Sulmi i fundit izraelit në Spitalin Baptist Al-Ahli më 17 tetor shkaktoi viktima të shumta dhe identitetet e disa prej tyre nuk mund të përcaktoheshin. Kjo ka shtuar ankthin për banorët e Gazës, të cilët kanë frikë se të dashurit e tyre mund të mos njihen nëse humbasin në sulme.
Individë, duke përfshirë të rritur dhe fëmijë kanë gjetur një zgjidhje praktike për këtë problem. Ata tani po shkruajnë emrat e tyre në pëllëmbët e duarve për të lehtësuar identifikimin në rast sulmi.
Abu Seba, një nga banorët tha se për shkak të sulmeve izraelite, shumë individë, veçanërisht fëmijë, kanë humbur jetën pa e ditur askush identitetin e tyre. Ai deklaroi, “Izraeli nuk diskriminon; bombardon pa dallim.”
/abcnews.al
