Loading ...
Bissan Younis qëndronte e trishtuar jashtë disa tendave të rrethuara nga rrënojat dhe mbeturinat, që është bërë një pamje e zakonshme në të gjithë Rripin e Gazës.
Kampi i vogël është një tjetër shkollë e improvizuar pa vend për djalin e saj adoleshent, Kareem.
Më shumë se 600,000 fëmijë palestinezë në Gaza kanë humbur dy vitet e fundit të shkollës për shkak të luftës midis Izraelit dhe grupit militant Hamas.
“Shumica e shkollave janë shkatërruar”, tha ajo.
“Në çdo shkollë që shkoj më thonë se nuk ka vend.”
Në vend që të mësojnë dhe të shoqërohen, fëmijët janë zhvendosur vazhdimisht, duke ikur nga sulmet ajrore dhe bombardimet, dhe shpesh kalojnë ditë të tëra duke kërkuar ujë dhe ushqim për familjet e tyre.
Pasi u arrit një armëpushim kryesisht i respektuar muajin e kaluar, punonjësit e ndihmës tani po punojnë për të rihapur dhjetëra shkolla të improvizuara.
John Crickx, zëdhënës i UNICEF, agjencisë së OKB-së për fëmijët, tha se është thelbësore që fëmijët të kthehen në shkollë sa më shpejt të jetë e mundur, jo vetëm për arsimin bazë, por edhe për shëndetin e tyre mendor.
“Në javët e ardhshme, nëse nuk ofrojmë arsim, pasojat mund të jenë të tmerrshme për një brez të tërë”, tha ai.
UNICEF vlerëson se më shumë se 630 mijë fëmijë palestinezë kanë humbur shkollimin gjatë luftës.
Crickx thotë se vetëm rreth 100 mijë fëmijë kanë arritur të kthehen deri më tani.
Veçmas, UNRWA, agjencia e OKB-së për refugjatët palestinezë, ofron arsimim përmes mësuesve të saj me kontratë për rreth 40,000 nxënës.
Shumica e shkollave të drejtuara nga UNRWA, të cilat i kanë ndjekur gjysma e fëmijëve të Gazës para luftës, janë shndërruar në strehimore për të zhvendosurit.
Nuk ka vend as për tenda.
Mungesa e hapësirës është një pengesë kryesore: dhjetëra shkolla janë dëmtuar rëndë ose janë shkatërruar plotësisht.
Një sfidë tjetër është dërgimi i furnizimeve në Gaza, qoftë beton për të riparuar shkollat e dëmtuara apo lapsa të thjeshtë, goma dhe furnizime të tjera bazë.
Bëhet e ditur se që nga fillimi i luftës më 7 tetor 2023, këtyre artikujve nuk u është lejuar të hyjnë në Gaza.
“Izraeli, i cili kontrollon rrjedhën e mallrave në territor, i konsideron ato jo kritike, jo shpëtimtare”, tha Crickx.
Edhe fëmijët që kthehen në shkolla të improvizuara mbajnë barrën psikologjike që vjen me luftën dhe zhvendosjen.
“Niveli i traumës midis banorëve të Gazës, përfshirë fëmijët, është i tmerrshëm”, tha Juliette Touma, drejtoreshë e komunikimit në UNRWA.
Touma paralajmëron për një “brez të humbur” – sa më gjatë që fëmijët të qëndrojnë jashtë shkollës, aq më e vështirë do të jetë që një ditë të arrijnë bashkëmoshatarët e tyre diku tjetër.Ajo shqetësohet se nëse fëmijët nuk marrin arsim, ata kanë më shumë gjasa të bien “pre e shfrytëzimit, duke përfshirë martesën e fëmijëve, punën e fëmijëve dhe rekrutimin në grupe të armatosura”.
