Michael Gahler, zëdhënës i PPE për politikën e Jashtme, deputet në parlamentin Europian njëkohësisht politikan gjerman ka uruar partitë në Këshillin Politik Shqiptar, që pas Marrëveshjes së 5 qershorit ranë dakord për paketën Zgjedhore.
Ky konsensus, shton Gahler në një postim të tijin në mediat sociale, ka qenë një kusht kryesor i BE për fillimin e negociatave të anëtarësimit në BE. “Ai duhet të ndiqet nga zbatimi i sinqertë i Ligjit Zgjedhor në zgjedhjet e ardhshme parlamentare dhe lokale.”
Zëdhënësi i grupit paralajmëroi qeverinë të mos bëjë veprime që shkojnë kundër konsensusit të arritur në 5 Qershor me Partinë Demokratike. Gahler shprehet se bisedimet e partisë në pushtet për ndryshime të njëanshme të tjera bien në kundërshtim me konsensusin e arritur.
Michael Gahler thekson më tej se KE kërkoi që Shqipëria të qartësojë ligjshmërinë e zgjedhjeve lokale të vitit 2019. Fakti që bashkitë në Shqipëri drejtohen nga një parti e vetme, shkruan eurodeputeti më tej, e kundërshton nocionin themelor të një demokracie pluraliste.
Gahler thekson po ashtu se këto janë tre kushte të rëndësishme nga 15 që Shqipëria duhet të përmbushë përpara fillimit të negociatave të anëtarësimit në BE.
Po ashtu, Gahler bën thirrje që opinionet e kohëve të fundit të Komisionit të Venecias për lirinë e medias dhe gjyqësorit të zbatohen “plotësisht në frymë dhe në gërmë, në mënyrë që të korrigjojnë devijimet e mëparshme dhe të ecet përpara.”
Gjithashtu, në postim theksohet se duhet të fillohet ndjekje penale lidhur me akuzat e blerjes së votave në zgjedhjet e kaluara, përfshirë ato në Dosjet 184 dhe 339.
Deklarata e plotë:
Ne, grupi i Partive Popullore Europiane në Parlamentin Evropian, urojmë palët në Këshillin Politik shqiptar, në të cilin, pas Marrëveshjes së 5 Qershorit, u ra dakord për paketën e amendamenteve për zgjedhjet. Ne vlerësojmë konsensusin mes palëve, që përfshinte Partinë Socialiste në pushtet dhe Partinë Demokratike (anëtare e PPE) dhe presim miratimin e shpejtë zyrtar të kësaj pakete. Çdo deklaratë nga partia në pushtet për ndryshime të tjera të njëanshme shkon kundër konsensusit të arritur.
Ky konsensus ka qenë një kusht kryesor i BE për fillimin e negociatave të anëtarësimit. Ai duhet të ndiqet nga zbatimi i sinqertë i Ligjit Zgjedhor në zgjedhjet e ardhshme parlamentare dhe lokale.
Në mars, Këshilli Evropian, kërkoi që Shqipëria të qartësojë ligjshmërinë e zgjedhjeve lokale të vitit 2019. Fakti që bashkitë në Shqipëri drejtohen nga një parti e vetme, e kundërshton nocionin themelor të një demokracie pluraliste.
Këto janë tre kushte të rëndësishme nga 15 që Shqipëria duhet të përmbushë përpara fillimit të negociatave të anëtarësimit në BE.
Opinionet e kohëve të fundit të Komisionit të Venecias për lirinë e medias dhe gjyqësorit duhet të zbatohen plotësisht në frymë dhe në gërmë, në mënyrë që të korrigjojnë devijimet e mëparshme dhe të ecet përpara.
Gjithashtu, duhet të fillohet ndjekje penal lidhur me akuzat e blerjes së votave në zgjedhjet e kaluara, përfshirë ato në Dosjet 184 dhe 339.
Të 15 Kushtet u vendosën në Mars nga Këshilli Evropian dhe u konfirmuan muajin e kaluar në Parlamentin Evropian nga një shumicë e madhe ndërpartiake.
Grupi i Partive Popullore Europiane vazhdon të mbështesë Shqipërinë në rrugën e saj drejt BE.
