Krimi në familje tronditi këtë të martë Tiranën. Arsen Muskurti qëlloi për vdekje vëllain e tij, Dritan Muskurti dhe kunatën Nora Muskurti.
Ngjarja e rëndë ndodhi pranë zonës së “Myslym Shyrit” ne kryeqytet, në ambientet e një agjencie turistike që ishte në pronësi të viktimave. Gazetarja Xhensila Kodra ka siguruar për abcnews.al pamjet pak pas momentit të vrasjes.
Menjëherë pas krimit, autori u largua nga vendi i ngjarjes. Ai u arrestua disa orë më vonë, në zonën e “5 Majit” në kryeqytet. Operacionit për kapjen e tij iu bashkuan edhe forcat RENEA.
Si ndodhi ngjarja
Gjithçka ka ndodhur për shkak të konflikteve të hershme familjare që autori dhe viktimat kishin me njëri-tjetrin.
Dy vëllezërit kishin bizneset pranë në rrugën “Islam Alla”. Burimet i thanë abcnews.al se ata janë konfliktuar dy ditë më parë. Ndërsa ditën e sotme konflikti agravoi në përdorimin e armës së zjarrit.
Arsen Muskurti është futur në ambientet e agjencisë turistike dhe ka qëlluar në drejtim të vëllait dhe kunatës, Dritan Muskurti dhe Nora Muskurti. Për pasojë çifti i bashkëshortëve kanë humbur jetën menjëherë.
Dyshohet se autori ka qëlluar pesë herë ndaj tyre. Menjëherë pas krimit të rëndë ai u arratis, ndërsa u arrestua më vonë në zonën e “5 Majit”.
g.v/abcnews.al
