Bashkia e Medellin në Kolumbi ka vendosur të shembë me eksploziv ndërtesën 8-katëshe në të cilën jetonte Pablo Escobar. Fortesa do të kthehet në park, në nder të viktimave që shkaktoi lufta e përgjakshme mes trafikantëvve të drogës.
Pallati i Medellin që ishte fortesa e bosit të drogës Pablo Escobar, do të shembet me eksploziv mbrëmjen e së premtes. Në vend të ndërtesës 8 katëshe, një lloj bunkeri luksoz ekstravagant ku jetoi për shumë kohë familja Escobar si dhe baza e kartelit të drogës së Medellin, do të ndërtohet një park në kujtim të viktimave të trafikut të drogës.
Kryebashkiaku i qytetit u shpreh se nuk bëhet fjalë për fshirjen e historisë, por që ajo të tregohet nga këndvështrimi i heronjve të vërtetë: viktimave. Bashkia parashikon të zëvendësojë ndërtesën me një hapësirë prej 5 mijë metrash katrorë për të kujtuar të gjithë personat që u vranë në periudhën më të dhunshme të narko-terrorizmit, në vitet 1980–1990, kur bandat e drogës bënin një luftë, e cila nuk përjashtonte asnjë.
Shkatërrimi i saj është pjesë e një fushate të Bashkisë së Medellin, e cila synon të tregojë anën tjetër të historisë, e cila nuk shfaqet as në seritë televizive. Çdo ditë grupe turistësh vizitojnë fortesën e bardhë të ndërtuar në vitet ’80 nga Eskobar në zemër të El Poblado, një nga lagjet më luksoze të qytetit. Që nga viti i kaluar, fasada e saj është mbuluar nga manifeste në kujtim të protagonistëvve të vërtetë: policë, gazetarë, gjykatës, njerëz të zakonshëm, të vrarë me urdhër të baronit të kokainës.
Pablo Escobar, një nga personat më të pasur të planetit sipas Forbes, mbeti i vrarë gjatë një shkëmbimi zjarri me policinë në vitin 1993, pasi kishte ndërtuar një perandori droge. Ndërtesa në të cilën jetonte është dhe simbol i atentatit të parë me autobombë të kryer në Kolumbi, kur në vitin 1998, banda e Kali sulmoi Escobar, rivalin e tij kryesor. Shpërthimi dëmtoi dëgjimin e vajzës së tij dhe shkazktoi një luftë të përgjakshme mes bandave.
Por 443 shtëpitë që Escobar ndërtoi për familjet që jetonin në periferi të Medelin, janë ende në këmbë. Atje akoma njerëzit e cilësojnë si Robin Hood kolumbian./abcnews.al
