ndertesaPostimi i Mavrajt
nev ila16:46 | 07/12/2019
Në pallatet e shpallur të pabanueshëm në zonën e ish Kombinantit në Tiranë vijojnë të jetojnë banorë. Ata shprehen se nuk kanë ku të shkojnë dhe se janë të paqartë se çdo të ndodhë me shtepitë e tyre.
Kryqi i verdhë shenjon këtë pallat në zonën e ish Kombinatit në Tiranë. Specialistët e kanë shpallur të pabanueshëm deri në riparimin e dëmeve të shkaktuara nga tërmeti i 26 nëntorit megjithkëtë Donika Xhuvani nuk e ka braktisuar apartamentin e saj.
“Vazhdoj të jetoj se nuk kam ku të shkoj. Nuk kam as të marr apartament me qera. Kam ardhë që kur është bërë pallati ne 1972 mendoj se do të mbajë. Ata akoma nuk e kanë vendosur do shembet apo jo”.
Zonja na tregon se të tjerë fqinjë ndodhen në të njëjtat kushte.
“Është dhe një në kat të parë, as ajo ska ikur. Dy tre familje kanë ngelur”.
Pamje e ngjashme na shfaqet vetëm pak metra më larg.
“Inxhinjerët që ishin, ata grekët e vendosën me kryq të verdhë, megjithatë mund të ketë një javë që nuk ka ardhë asnjë ekspert ta vendosi. U interesova tek bashkia dhe më thanë se do të vijnë të tjerë ta vendosin”.
Ajgena Korbi: A banohet lart?
Banori: Ka banorë që nuk kanë ku shkojnë dhe kanë ndenjur”.
Ajgena Korbi: A keni aplikuar për bonus qeraje për të aplikuar diku tjetër.
Banori: Kemi aplikuar, por në listat qe kanë dalë asnjë banor i këtij pallati ska dalë ende.
Paralajmërimi i Institutit te Ndërtimit qëndron në hyrje të pallatit ndërsa banorët ngjisin e zbresin shkallët qetësisht.
Fiqërete Proda na fton të shohim se cfarë dëmesh i ka pësuar banesa ndërsa na tregon se në apartament vijon të qëndrojë bashkëshorti i saj.
“Tërmetin e 21 shtatorit na u prish njëherë. Rregulluam vetë. Tani u prish prap. Tani u prish prap. E pa turku, greku, na thanë që do e shohin prap”
Në po të njejtën zonë shiriti i kuq rrethon një tjetër pallat. Banorët këtu janë të paqartë se çdo të ndodhë me banesat e tyre.
“Nuk lejohet të futemi brenda. Na kanë nxjerrë nga shtëpia. Plaçkat i kemi disa nëpër makina disa nëpër grazhe. Kaq duam ne të na thonë do prishet apo jo. Po flenë nëpër çadra”.
“Na ka hyrë uji gjithë natën”.
Gjashtë persona të familjes janë zhvendosur në këtë çadër.
“Unë fle këtu me një gocë. Çuni atje, nusja dhe dy kalamajt. Ujë… gjithë…”
Prej gati një jave kjo është e vetmja strehë për këtë familje.
“Nuk kemi as njerëz afër, të shkojmë të flemë atje në darke. I kemi larg”.
Ajgena Korbi: Ke aplikuar për bonus nga bashkia?
Banorja: Po
Ajgena Korbi: Çfarë ju ka thënë?
Banorja: Do t’ju rregullojmë. Fjala e mirë e guri në trajsë themi ne tironsit./abcnews.al
R D20:56 | 05/12/2019
Profesorja e njohur e Inxhinierisë së Ndërtimit, Luljeta Bozo, e ftuar mbrëmjen e sotme në studion e “Mbrëmja në Abc” tha se shqetësimi i banorëve që u janë dëmtuar banesat nga termeti i 26 nëntorit është më se i drejtë. Ajo tha se duhet të shtohen grupet e inspektimit dhe brenda dy javësh urgjent duhet mbyllur i gjithë procesi i kontrollit dhe vlerësimit të pallateve apo banesave private në Durrës, Tiranë, Thumanë, Shijak, Lezhë, etj.
Sipas znj. Bozo, është shumë e rëndësishme që inxhinieri projektues, ti bashkangjitet ekipit të kontrollit. Pra në çdo pallat të dëmtuar duhet të shkojë edhe inxhinieri përkatës që ka bërë projektin. Dhe në mungesë të inxhinierit, ajo tha se grupi i kontrollit duhet të ketë patjeter projektin.
Inxhinierët e rinj
Prof. Luljeta Bozo tha se Instituti i Ndërtimit nuk ka kapacitete për të përballuar këtë situatë. Ndaj ekipeve u janë bashkëngjitur inxhinierë me moshë të re nga 28-35 vjeç që punojnë në njësitë vendore. Ajo tha se disa prej tyre nuk kanë eksperience dhe është e domosdoshme të ketë një “bari” një inxhinier me eksperience që ti drejtojë. Kjo tha ajo duhet bërë shumë shpejt, që njerëzve tu hiqet frika.
Zonat rurale
Sa i përket fshatrave, znj. Bozo tha se situata paraqitet më kritike. ” Në zonat rurale ka shtëpi shumë të vjetra, që janë ndërtuar pa asnjë masë antisizmike, ka edhe ndërtesa të reja që janë bërë nga persona jo profesionistë. “Nuk kanë marrë as usta se inxhinier jo e jo”, tha Bozo.
Po Tirana?
Sa i përket kryeqytetit, znj. Bozo këshilloi që gjithë objektet sado pak të dëmtuara duhet të riparohen në mënyrë që kur të vijë termeti i tjetër të mos shkaktojë asnjë problem. Ajo tha se godinat mund të dëmtohen nga termete 5 ballë e lart. Po kështu u shpreh se “në katet e para dhe të dyta janë ndërtuar lokale dhe objekte shërbimi që mund të kenë dalë jashtë projektit duke dëmtuar kolonat”. /Abcnews.al
ger ta13:30 | 01/12/2019
Në Durrës ka nisur sot shembja e objekteve të dëmtuara nga tërmeti. Mësohet se është shembur ‘Vila Verde’, në zonën e plazhit.
Ndërtesa 4 katëshe ishte shkatërruar nga tërmeti, ndërsa rrezikonte dhe ndërtesat e tjera aty pranë dhe siç mund të shihet nga pamjet tashmë kanë mbetur vetëm gërnadhat.
Sakaq, pritet të nisë edhe shembja e hotel “Lubjana”, po ashtu e dëmtuar nga tërmeti. Ndërkohë, më herët janë shembur ndërtesat e dëmtuara edhe në zonën e Thumaës.
Durrësi dhe Thumana janë zonat më të prekura nga tërmeti i 26 nëntorit, ku 51 persona mbetëm viktima dhe mbi 700 të tjerë u plagosën./abcnews.al
nev ila18:44 | 28/11/2019
Një pallat pranë ish-Kinema 17 Nëntorit në Tiranë, ka krijuar frikë tek banorët dhe bizneset. Një biznesmen thotë se mund të ketë dëmtime dhe se ende nuk është bërë vlerësimi nga ana e Bashkisë.
Në pamje të parë nuk duket ndonjë tmerr i madh.
Gjithsesi, kjo ndërtesë pranë ish-Kinema 17 Nëntorit në Tiranë ka shqetësuar banorët, lokalet aty pranë, dhe një pronar që ka biznesin ngjitur me të.
Nuk është thjesht rënia e pllakave të fasadës që tremb, edhe pse ajo mund të rezultonte fatale, por një problem tjetër, në pjesën anësore të pallatit.
Pyetja e parë në raste të tilla është, a kanë ardhur specialistë të bashkisë, apo specialistë të tjerë kompetentë për këto raste?
Me sa duket ende jo.
Policia rrethoi vendin e rënies së pllakave, duke mos lejuar që qytetarët të kalonin në trotuarin e atyshëm, për të mos iu rrezikuar jeta.
Nga Bashkia pati një interesim të një punonjëseje, por ende nuk është vlerësuar gjendja e ndërtesës dhe rrezikshmëria që mund të paraqesë ajo./abcnews.al
nev ila17:12 | 27/11/2019
Lëkundjet e fundit të tërmetit kanë dëmtuar një kat të pallatit në qendër të Laçit. Nga të dhënat më të fundit mësohet se bëhet fjalë për shtesën e saj.
Nuk është raportuar për të lënduar por shembja e tij ka shkaktuar panik.
Me sa duket, shtesa e pallatit, goditjen më të fortë e ka marrë nga tërmeti i ndodhur ditën e djeshme, në orët e para të mëngjesit, ndërkohë që sot, nga lëkundjet e orës 16.00, duket se e kanë rrëzuar plotësisht./abcnews.al
nev ila13:22 | 05/11/2019
Tre viktima dhe një i plagosur është bilanci i një shpërthimi ende të panjohur, në një ndërtesë në Aleksandria të Italisë. Viktimat janë 3 zjarrfikës që kishin ndërhyrë për të shuar zjarrin, pas një shpërthimi të parë. I plagosuri është një agjent policie.
Tre zjarrfikës kanë humbur jetën si pasojë e një shpërthimi në një ndërtesë në Alesandria të Italisë. Shpërthimi ka ndodhur në orën 2 të natës në një zonë të pabanuar, për shkak të një rrjedhje gazi apo zjarr. I plagosur ka mbetur dhe një agjent policie, i cili është jashtë rerzikut për jetën.
Sipas të dhënave të para të publikuara nga mediat italiane, zjarrfikësit kanë ndërhyrë pas shpërthimit të parë që kishte shkaktuar shembjen e një pjese të ndërtesës. Teksa po punonin ndodhi dhe shërbimi I dytë I cili rezultoi fatal për tre nga zjarrfikësit. Njëri prej tyre fillimisht u shpall i zhdukur, por trupi i tij i pajetë u gjet pas disa orësh në gërmadha.
Sipas burimeve të komandos provinciale të karabinierëve, shpërthimi i parë mund të ketë qenë i qëllimshëm./abcnews.al
nev ila13:23 | 28/09/2019
Është arrestuar nga policia gjermane në Frankfurt, francezi Alen Robert i njohur si njeriu merimangë. Ai u arrestua pasi ngjiti pa autorizim një ndërtesë të lartë 154 metra.
Njeriu merimangë francez, Alen Robert, është ngjitur thjesht me duar, dhe pa asnjë mjet sigurie si dhe pa autorizim në ndërtesën Skajper në Frankfurt, një ndërtesë e lartë 154 metra.
Atij i janë dashur 30 minuta për këtë sipërmarrje, dhe kur mbërriti u prit nga agjentët e policisë të cilët e arrestuan.
57 vjeçari ende nuk shpjeguar arsyet e këtij veprimi.
Në muajin gusht ai u ngkit në një qiellgërvishtëse në Hong Kong ku hapi një parullë paqeje në mbështetje të manifestuesve të cilët prje javësh protestojnë pro demokracisë.
I pagëzuar si njeriu merimangë, Robert është ngjitur në disa prej ndërtesave më të larta në botë si Burj Kalifa 828 metra e lartë në Dubai, kullën Eifel në Paris, kullat binjake Petronas në Kuala Lumpur, duke përdorur gjithnjë vetëm duart.
Në përfundim të gjithë sipërmarrjeve të tij ai arrestohet pasi nuk ka autorizim.
Kohët e fundit ai ka regjistruar dhe një këngë, e para për të, me titullin “Unë ngjis botën”, së bashku me kitaristin Xhon Par./ABC News Albania 24/7
ad min10:47 | 02/08/2019
Një shqiptar ka humbur tragjikisht jetën në Itali pas një aksidenti në punë. 27-vjeçari, identiteti i të cilit nuk bëhet publik po punonte në çatinë e një ndërtese në Castelfiorentino.
Sipas asaj që shkruan ANSA, i riu sëbashku me një të afërm po shtronin me katran çatinë në mënyrë që ta izolonin. Për shkaqe të pacaktuara ende diçka ka marrë flakë.
Për të shmangur zjarrin, 27-vjeçari u zhvendos, por ra nga ndërtesa, duke humbur jetën në vend. Në vendin e ngjarjes shkoi zjarrfikësja e cila bëri të mundur fikjen e flakëve.
Ndërkohë media të tjera lokale japin dëshmitë e para të personave të pranishëm në momentin e ngjarjes. Sipas tyre shpërthyen mjetet e tyre të punës, të cilat shërbejnë për hidroizolimin e ndërtesës. Ndërkohë, pas hetimeve paraprake është zbuluar se ka pasur një shembje të çatisë ku po punonte i riu shqiptar.
Kjo është hera e dytë që në të njëjtën ndërtesë humb jetën një punëtor. Edhe në vitin 2011 një shqiptar ndërroi jetë, teksa edhe ai po punonte për hidroizolimin e çatisë. Për këtë ngjarje u arrestua një bashkatdhetar i tij, pasi e kishte punësuar viktimën pa dokumente./abcnews.al
ent ela10:30 | 12/07/2019
Shëmbet ndërtësa para Arenës Kombëtare te sheshi “Italia”. Godina 4-katëshe ishte ndërtuar para disa vitesh në hapësirë publike, dhe në të ishin vendosur disa biznese, bar kafe, restorante, dhe fast-food.
Përmes një postimi në rrjetin social “Twitter”, kryetari i Bashkisë së Tiranës, Erion Veliaj thotë se tashmë tashmë sheshi “Italia” hapet plotësisht në funksion të qytetarëve.
“Çibani i fundit!
Iken ngrehina e mbetur nga aksi qendror i Tiranes per ta hapur plotesisht Sheshin Italia per Arenen Kombetare
Shpronesim per ata me leje, prishje per te fortet qe shtuan katet pa leje ne kohe te Lulit e Kunatit famekeq #TiranaNukNdalet”, shkruan kryebashkiaku Veliaj.
ent ela15:57 | 11/03/2019
Pas më shumë se pesë orë përplasjesh me banorët, përmbaruesit dhe forcat e policisë janë tërhequr nga vendimi për të shembur banesën pranë shkollës “Petro Nini Luarasi” në Tiranë. Banorët mendojnë se ky është një vendim i përkohshëm dhe thonë se nuk do të largohen nga shtëpitë. Që nga ora 10:00 e mëngjesit familjarët kanë bërë rezistencë duke mos lejuar punonjësit e një zyre përmbarimore të ekzekutojë vendimin e gjykatës e t’u prishë shtëpitë. Aksioni i Inspektoriatit për Mbrojtjen e Territorit për të nxjerrë 15 persona nga një banesë që gjendet në afërsi të zonës së liqenit Artificial, jo shumë larg shkollës “Petro Nino Luarasi ka shkaktuar tensione, përplasje e bllokime rruge.
Në këto kohe u kërkua dhe ndërhyrja e forcave të rendit. Banorët e banesës 2 katëshe kanë dalë edhe në rrugën kryesore, duke u shtrirë mbi asfalt dhe duke bllokuar qarkullimin e mjeteve. Përplasjet fizike mes tyre dhe forcave të rendit nuk kanë munguar, ndërkohë që një zjarr i vënë brenda banesës ka bërë të nevojshme dhe ndërhyrjen e forcave zjarrfikëse. Disa prej familjarëve janë dërguar me urgjencë në spital për të marrë ndihmë mjekësore për shkak të gjendjes së asfiksisë të shkaktuar nga situata e tensionuar.
Konflikti për këtë prone zgjat prej disa dekadash. Siç deklaroi sot njëri prej banorëve të saj, prej 23 vitesh ata janë në konflikt gjyqësor me pretenduesin si pronar trualli, i cili ka fituar procesin gjyqësor për kthimin e kësaj prone. Familjarët nga ana tjetër pretendojnë se banesën e kanë përfituar nga Enti i Banesave dhe se pretenduesi i këtij trualli ka falsifikuar dokumentet për të patur pronësinë e tokës, e cila gjendet në një ndër zonat më të mira dhe më të kërkuara në kryeqytet. /abcnews.al
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
21:37 | 28/03/2020
