Dhe pse muajit gusht po i vjen fundi, radhët e gjata të kosovarëve që udhëtojnë drejt Shqipërisë vazhdojnë. Një nga shkaqet që krijohen radhë janë urat e papërfunduara.
Po i kalojnë edhe ditët e fundit të gushtit për të shijuar bregdetin shqiptar. Por kjo dyndje me qytetarë dhe automjete të pafundme nuk po shmang dot radhët nga Morina në Kukës.
Në pesë urat e papërfunduara, policia rrugore po menaxhon situatën. Hyrja e urës mbi Drin është nyja kryesore e problemeve.
Mjetet duhet të kalojnë nga dy në një korsi të vetme. Mjetet e Transportit të mallrave nuk janë lejuar, por kolonat e gjata, ndalesat e herë pas here nuk janë evituar.
Javën e ardhshme në Kosovë nis procesi shkollor dhe administrata shtetërore i kthehet punës, duke përmbyllur në të njëjtën kohë edhe sezonin e pushimeve.
Të shumtë janë edhe emigrantët kosovarë që kanë përfunduar qëndrimin në Kosovë, për t’u kthyer në vendet e tyre të punësimit. /abcnews.al
Gazetar i ABC News, Kukës: Bujar Muçmata
