Kryeministri i Irakut, Mustafa al-Kadhimi, i mbijetoi një atentati me dronë, që vunë në shënjestër rezidencën e tij të dielën herët në mëngjes. Autoritetet thanë se ai doli i padëmtuar nga ky sulm që paraqet një përshkallëzim mes tensionesh të nxitura nga refuzimi i milicive të mbështetura nga Irani, për të pranuar rezultatet e zgjedhjeve parlamentare të muajit të kaluar.
Dy zyrtarë irakianë i thanë agjencisë së lajmeve Associated Press se shtatë nga rojat e sigurisë së kryeministrit al-Kadhimi u plagosën në sulmin me dy dronë të armatosur, që ndodhi në Zonën e Gjelbër të fortifikuar të Bagdadit. Ata folën në kushte anonimiteti, meqë nuk ishin të autorizuar të japin deklarata zyrtare.
“Unë jam mirë dhe në mesin e njerëzve të mi. Falë Zotit”, shkroi kryeministri në Twitter menjëherë pas sulmit. Ai bëri thirrje për qetësi dhe përmbajtje, “për hir të Irakut”.
Më vonë ai u shfaq në televizionin irakian, i ulur pas një tryeze dhe veshur me një këmishë të bardhë, në dukje i qetë. “Sulmet qyqare me raketa dhe dronë nuk ndërtojnë atdhe dhe nuk ndërtojnë një të ardhme”, tha ai.
Qeveria tha në një deklaratë, se një dron i ngarkuar me eksploziv u përpoq të godiste shtëpinë e al-Kadhimit. Banorët e Bagdadit dëgjuan një shpërthim të pasuar me të shtëna të forta armësh nga Zona e Gjelbër, ku ndodhen ambasadat e huaja dhe zyrat qeveritare.
Nuk pati asnjë pretendim të menjëhershëm të përgjegjësisë për sulmin, që ndodhi në mes të një përplasjeje midis forcave të sigurisë dhe milicive shiite pro-iraniane, mbështetësit e të cilëve kanë qëndruar jashtë Zonës së Gjelbër për gati një muaj, pasi refuzuan rezultatet e zgjedhjeve parlamentare të Irakut, në të cilat humbën rreth dy të tretat e vendeve në parlament.
Protestat u shndërruan në trazira vdekjeprurëse të premten kur demonstruesit u përpoqën të hynin në Zonën e Gjelbër. Forcat e sigurisë përdorën gazin lotsjellës dhe plumba. Pati një shkëmbim zjarri në të cilin u vra një protestues i lidhur me milicitë. Dhjetëra pjesëtarë fë forcave të sigurisë u plagosën. Kryeministri Al-Khadimi urdhëroi një hetim për të përcaktuar se çfarë shkaktoi përleshjet dhe kush i shkeli urdhrat për të mos hapur zjarr.
Disa nga udhëheqësit e fraksioneve më të fuqishme të milicisë besnike ndaj Iranit fajësuan hapur kryeministrin al-Kadhimi për përleshjet e së premtes dhe vdekjen e protestuesit.
Al-Kadhimi, 54 vjeç, ishte shef i Shërbimit të zbulimit irakian përpara se të bëhej kryeministër në maj të vitit të kaluar. Ai konsiderohet nga milicitë si i afërt me Shtetet e Bashkuara dhe është përpjekur të balancojë aleancat e Irakut si me SHBA-në ashtu edhe me Iranin. Para zgjedhjeve, ai ishte mikpritës i disa raunde bisedimesh midis armiqve rajonalë, Iranit dhe Arabisë Saudite në Bagdad, në një përpjekje për të ulur tensionet.
Shtetet e Bashkuara dënuan sulmin
“Ky akt i dukshëm terrorizmi, të cilin ne e dënojmë me forcë, ishte drejtuar në zemër të shtetit irakian”, tha zëdhënësi i Departamentit të Shtetit, Ned Price. “Ne jemi në kontakt të ngushtë me forcat irakiane të sigurisë të ngarkuara me ruajtjen e sovranitetit dhe pavarësisë së Irakut dhe kemi ofruar ndihmën tonë ndërsa ata hetojnë këtë sulm”, shtoi ai. Shtetet e Bashkuara, Këshilli i Sigurimit i OKB-së dhe të tjerë, i kanë vlerësuar zgjedhjet e 10 tetorit, të cilat ishin kryesisht të padhunshme dhe pa problemeve të mëdha teknike./ VOA
