Atletico Madrid vuajti jo pak mbrëmjen e kaluar, por ia doli të siguronte tre pikët kundër Valladolid. Djemtë e Diego Simeones fituan 1-0 në shtëpi falë golit të vonshëm të Victor Vitolo (81′), i cili ishte futur në fushë përpara shtatë minutave.
Ky sukses e ngjit skuadrën kryeqytetase në vend të tretë bashkë me Sevillan dhe Simeone i gëzohet fitores së rëndësishme dhe analizon kalendarin e ngjeshur dhe zhvillimin e shumë ndeshjeve në një kohë të shkurtër.
“Nuk kemi asnjë motiv për të qëndruar të qetë, pasi po luajmë çdo tre ditë. Askush nuk e ka të lehtë në këto kushte. Zhvilluam një pjesë të parë të shkëlqyer, në 45 minutat e dyta u komplikuan gjërat për ne. Kjo për faktin që mbrojtja e Valladolid funksionoi shumë mirë.
Kalendari? Nuk është një situatë e lehtë për askënd. Skuadra që arrin t’i shpërndajë më mirë minutat do të ketë më shumë rezistencë për të luajtur çdo tre ditë, kështu që do e ketë më të lehtë të arrijë objektivat e veta“, komentoi trajneri argjentinas pas ndeshjes. /abcnews.al
