Rritja e të ardhurave në arkën e shtetit dhe vijimi i uljes së borxhit do të jenë fokusi në strategjinë e hartuar për mirëmenaxhimin e financave publike deri në 2030. Gjatë prezantimit të draftit ministri i financave Ervin Mete theksoi se vitin e kaluar u shënua niveli më i ulët i detyrimeve të prapambetura.
Ndërkohë në tre muajt e parë të këtij viti u mblodhën rreth 163.8 miliardë lekë ose 7.64 miliardë lekë më shumë se tre-mujori i vitit 2023.
Sipas Ministrit të financave sektori i turizmit ka dhënë një efekt të ndjeshëm në ekonomi gjatë vitit të kaluar.
Forcimi dhe konsolidimi i mëtejshëm i financave publike është një nga kërkesat themelore edhe sa i përket rrugëtimit drejt anëtarësimit në Bashkimin Evropian.
Reforma e Menaxhimit të Financave Publike synon të sigurojë një sistem financiar publik që promovon transparencën dhe llogaridhënien. /abcnews.al
