Manchester United luan nesër ndeshjen më të rëndësishme të sezonit. “Djajtë e Kuq” do të përballen në “King Power Stadium” kundër Leicesterit vendas, një finale për një biletë në Champions League, objektiv jetik për klubin e famshëm.
Djemtë e Ole Gunnar Solskjaer kualifikohen edhe me një barazim, teksa “Dhelprat” e Rodgers nuk kanë alternativa përveç fitores. Trajneri norvegjez ka dalë në konferencë për shtyp përpara sfidës së nesërme (17:00), ku ndër të tjera tha:
“Përqendrimi në futboll është thelbësor. Kur ke përballë skuadra të forta dhe lojtarë me kualitet të lartë, një gabim në përqendrim mund të jetë shumë i rrezikshëm. Detyra jonë nuk ka mbaruar akoma.
Ekipi ka përjetuar një aventurë, tani jemi në fund të këtij rrugëtimi, ka mbetur vetëm ndeshja e fundit. Djemtë janë treguar solidë dhe të qëndrueshëm në aspektin psikologjik. Kemi prodhuar edhe futboll të mirë, kur kemi qenë në formë. Jam i lumtur kur shoh se sa ka përparuar kjo skuadër“, deklaron Solskjaer. /abcnews.al
