Loading ...Nga 24 vite në hoteleri-turizëm, Genc Uklala ka bërë një kthesë të fortë në jetën e tij: nga restoranti dhe menaxhimi, te ferma dhe prodhimet e saj. I rritur në fshat, ai thotë se lidhja me tokën dhe kafshët ka qenë gjithmonë pjesë e jetës së tij.
Sot, ferma është kthyer jo vetëm në profesion, por edhe në një mënyrë jetese. Dita e tij nis që në orën 06:00, me kontrollin e shpendëve dhe lepujve dhe kujdesin për ushqimin e tyre.
Por për Gencin, ferma nuk është thjesht të prodhosh; është të dish se çfarë po i ofron konsumatorit.
Pikërisht këtu nis edhe pyetja që intereson të gjithë: si mund ta dallojmë një produkt bio dhe cilësor? Fermeri tregon se një nga sekretet është të njohësh mënyrën e rritjes së kafshës dhe jo vetëm pamjen e produktit.Sipas tij, edhe pula tregon shumë për mënyrën se si është rritur.
Pulat që kanë lëvizur më shumë në natyrë mund të kenë karakteristika të ndryshme në mish krahasuar me shpendët e rritur intensivisht për një kohë të shkurtër. Edhe ngjyra, struktura e mishit dhe zhvillimi i këmbëve janë disa nga elementet që fermerët me eksperiencë vëzhgojnë. Por një produkt i mirë nuk fillon në treg; fillon që në fermë.
Ushqimi, hapësira, higjiena, uji dhe kujdesi i përditshëm ndikojnë drejtpërdrejt në mirëqenien e shpendëve dhe në cilësinë e prodhimit. Genci tregon edhe sekretet e rritjes së rosave, pulave dhe lepujve, duke shpjeguar pse secila kafshë kërkon kujdes të ndryshëm. Rosat, për shembull, kanë nevojë për ujë dhe sipas tij janë më rezistente ndaj disa problemeve që shfaqen te shpendët e tjerë.
Në fermë përdoret edhe inkubatori, i cili i jep fermerit mundësinë të kontrollojë më mirë procesin e çeljes së vezëve.
Për pulat, periudha e inkubimit është rreth 21 ditë, ndërsa për rosat rreth 28 ditë. Por a mjafton që një produkt të vijë nga një fermë për t’u quajtur automatikisht “bio”?
Jo domosdoshmërisht. Termi “bio” ka kritere dhe standarde të përcaktuara, ndaj konsumatori duhet të jetë i kujdesshëm me etiketimin. Ajo që kërkojnë gjithnjë e më shumë klientët, sipas fermerit, është origjina: të dinë nga vjen produkti dhe si është prodhuar. Dhe këtu rrjetet sociale janë kthyer në një dritare të re për fermerët.
Genci publikon video nga përditshmëria e fermës, duke treguar atë që zakonisht konsumatori nuk e sheh. Nga ushqimi dhe rritja e shpendëve, te inkubatori dhe kujdesi i përditshëm, ai kërkon të tregojë realitetin pas produktit.
Mes lodhjes dhe punës së përditshme, fermeri thotë se ka gjetur diçka që i jep kënaqësi: të prodhojë vetë dhe t’i ofrojë klientit një produkt të freskët, me origjinë të qartë./abcnews.al
