Gwen Stefani dhe partneri i saj, këngëtari Blake Shelton janë fejuar, pas pesë vitesh së bashku. Lajmin e bëri me dije vetë këngëtarja 51-vjeçare përmes një postimi në Instagram, duke treguar se kishte marrë një propozim me unazë diamanti.
“Po, të lutem”, shkroi Stefani krahas fotos ku i dhuronte një puthje partnerit të saj. Blake gjithashtu ndau të njëjtën foto, ku shkruante: “Faleminderit që më shpëtove vitin 2020 … Dhe pjesën tjetër të jetës sime. Unë të dua. Kam dëgjuar një PO!”.
Një burim tha për revistën People se ata u fejuan gjatë fundjavës ndërsa ishin në Oklahoma. Ky lajm vjen pasi të dy zbuluan se kanë kaluar gjithë kohën së bashku në karantinë.
Ata kanë jetuar me tre fëmijët e saj në fermën e artistit në Oklahoma dhe këtë muaj më në fund u vendosën në shtëpinë e tyre të re prej 13 milion dollarësh në Los Anxhelos. Çifti nisi romancën e tyre të dashurisë në vitin 2015, kur të dy merrnin pjesë në “The Voice”. /abcnews.al
