Nga Erblina Mile
Fasonët një ndër sektorët me numrin më të lartë të punësuarve në vend por edhe një prej bizneseve më të goditura nga pandemia tashmë po përballen me mbledhjen me forcë të detyrimeve tatimore.
Florian Zekja përfaqësues i PRO-Eksport Albania deklaron se prej disa ditësh administrata tatimore ka vendosur bllokimin e llogarive që kanë vonesa në pagesën e kontributeve, gjoba dhe kamatë-vonesa nga sistemi, si dhe mos-pagim të tatim fitimit për vitin 2020.
Fasonët i kanë dërguar një letër zyrtare ministrisë për të gjetur një zgjidhje pasi për shkak të krizës e kanë të vështirë që të shlyejnë në kohë detyrimet. Ndërsa shumë vende të rajonit e kanë shtyrë pagesën e detyrimeve duke i dhënë mundësi sipërmarrjes të rimëkëmbet prej krizës.
Sipërmarrjet fasone ankohen se po paguajnë kosto të larta për të zbatuar masat anti-covid .Ata i kërkojnë qeverisë që të mbështesë financiarisht edhe bizneset e mëdha me pagesën prej 4 mijë lekë për punonjës për dy muaj për sipërmarrjet prodhuese.
Për vitin 2019, industri fasone siguroi rreth 40 përqind të eksporteve të vendit me një vlerë mbi 800 milionë euro ndërkohë që vetëm në tre muaj e mbylljes sektori fason në Shqipëri ka pësuar një humbje prej 130 mln eurosh./ db/Abcnews.al
