Facebook ka vendosur të mos bllokojë më asnjë postim që sugjeron që Covid 19 e ka origjinën nga laboratori. Një lëvizje që ndjek vendimin e Shtëpisë së Bardhë për të urdhëruar hetime më të thella për origjinën e virusit.
Kreu i Shtëpisë së Bardhë i ka lënë 90 ditë kohë shërbimit amerikan të inteligjencës, për t’i dorëzuar raportin me përfundimet e plota.
Në muajin shkurt Facebook vendosi të bllokojë postimet e konsideruara komplotiste rreth origjinës artificiale të Covid-19. Gjatë pandemisë, gjigandi i teknologjisë ka përditësuar gjithnjë politikat kundër informacioneve të rreme në lidhje me koronavirusin, gjithnjë në konsultim me drejtuesit e autoriteteve shëndetësore.
Por tashmë zëdhënësja e Facebook deklaron se me nisjen e hetimeve për origjinën e koronavirusit, dhe në konsultim me ekspertë të shëndetit publik, u vendos që të mos hiqen më postimet sipas të cilave virusi është prodhuar nga njeriu. Facebook është platforma e parë që bën një gjë të tillë./abcnews.al
