Sonte në mbrëmje do të zhvillohen dy takimet gjysmëfinale të Europa League. Chelsea udhëton në transfertën gjermane të Eintracht Frankfurt, ndërkohë që Arsenal pret në shtëpi spanjollët e Valencia.
Pas emocioneve të Ligës së Kampioneve, sonte në mbrëmje rikthehet Europa League ku do të zhvillohen dy gjysmëfinalet e para. Chelsea do të udhëtojë në transfertën e Frankfurt.
Blutë e Londrës janë favoritë për të kaluar në finalen e madhe, por ndaj gjermaneve nuk do të jetë aspak e lehtë. Frankfurt ka zhvilluar paraqitje spektakolare në sezonin aktual në Ligën e Europës duke eliminuar skuadra me mjaft potencial.
Chelsea ka një motiv shumë të madh për t’i shkuar deri në fund këtij kompeticioni pasi është kupa e vetme që mund të fitojë për këtë vit. Edhe e ardhmja e trajnerit Sarri varet nga fitimi ose jo i Europa League që do të kualifikonte direkt në Champions për sezonin e ardhshëm londinezët pavarësisht renditjes në Premier League. Në radhët e Chelsea-t nuk ka mungesa të rëndësishme dhe shanset janë të mëdha për një rezultat pozitiv.
Duel i vështirë do të luhet në “Emirates Stadium” mes Arsenal dhe Valencias. Topçinjtë e Londrës nuk janë në një moment aspak pozitiv pasi disa humbjeve të njëpasnjëshme në kampionat ndaj dhe rikthimi tek fitorja është detyrim aq më tepër në një ndeshje të tillë ku nuk lejohen hapat fals.
Të besuarit e teknikut Emery janë nën presion të vazhdueshëm dhe mbetet të shihet sa do të ndikojë në këtë duel delikat. Nga ana tjetër, spanjollët nuk kanë asgjë për të humbur pasi arritja në gjysmëfinale të një kompeticioni kaq të rëndësishëm e justifikon sezonin aktual. Ndeshja e kthimit do të zhvillohet në “Mestaja” dhe kjo është një avantazh për Valencian./ABC News Albania 24/7
