progres raporti
ent ela23:43 | 03/06/2019
Kryeministri Ramush Haradinaj ka mbetur i pakënaqur nga progres-raporti i Komisionit Europian për Kosovën. Në reagimin e tij, Haradinaj ka deklaruar se raporti nuk ka marrë parasysh ato progrese të regjistruara nga shteti i Kosovës, ndërsa i ka bërë thirrje BE-së që të mos vendosë kushte për statusin e kandidatit. /ABc news Albania 24/7
ent ela11:50 | 30/05/2019
Një ditë pas prezantimit nga Komisioni Europian të progres – raportit për Shqipërinë për vitin 2018, ambasadori i BE në Tiranë Luigi Soreca ia dorëzoi sot këtë dokument të rëndësishëm kreut të Kuvendit të Shqipërisë Gramoz Ruçi.
“Vendi ka bërë ecuri domethënëse dhe ne besojmë se në këtë raport njihen e vlerësohen të gjitha këto arritje”-u shpreh Ambasadori Soreca. Sipas tij, reforma në drejtësi dhe rezultatet e saj janë arsyeja kryesore e rekomandimit pozitiv dhe pa kushte për Shqipërinë.
Po ashtu zyrtari i Brukselit i dorëzoi edhe Komisionit Parlamentar të Integrimit raportin e progresit që i rekomandon Këshillit Europian hapjen e negociatave pa kushte për Shqipërinë. Para kryetares së këtij komisioni, deputetes demokrate Rudina Hajdari dhe deputetëve të tjerë në komisionin e Integrimit, ambasadori Soreca përseriti apelin për bashkëpunim mes palëve.
“Duhet të tejkalohen ndasitë dhe të mendohet për një drejtim të përbashkët për integrimin”- u shpreh ambasadori i BE gjatë fjalës së shkurtër në Komision.
“Ndërkohë duhet punë me shtetet anëtare të BE për të shpjeguar progresin e bërë, por edhe të bindim shtetet skeptike për perspektivën evropiane të Shqipërisë”– tha ambasadori Soreca.
“Duhet të tejkalohen ndasitë dhe të mendohet për një drejtim të përbashkët për integrimin” u shpreh ambasadori i BE-së gjatë fjalës së shkurtër në komision.
“Ndërkohë duhet punë me shtetet anëtare të BE për të shpjeguar progresin e bërë, por edhe të bindim shtetet skeptike për perspektivën evropiane të Shqipërisë”– tha ambasadori Soreka. /ABC News Albania 24/7
ent ela11:40 | 30/05/2019
Rekomandimi pozitiv i Komisionit Europian për çeljen e negociatave të BE-së me Shqipërinë është diskutuar edhe në foltoren e parlamentit, nga ku mazhoranca dhe opozita bënë leximet e tyre antagoniste. /ABC News Albania 24/7
ad min09:15 | 29/05/2019
Sot pritet të publikohet progres-raporti për Shqipërinë dhe vendet e Ballkanit Perëndimor mbi ecurinë e reformave të integrimit drejt Bashkimit Evropian.
Komisioneri evropian për zgjerimin Johanes Han do të prezantojë këtë raport përpara deputetëve të Komisionit të Jashtëm të Parlamentit Evropian rreth orës 11.00.
Më pas në orën 12,30 komisioneri Hahn dhe shefja e politikes se jashtme të BE, Mogherini, në një konferencë shtypi nga Brukseli do të prezantojnë progres-raportet për secilin nga vendet e Ballkanit dhe Turqinë. Pas ndjekjes drejtpërdrejt të kësaj konference në zyrën e delegacionit të BE në Tiranë, ambasadori Soreka do të shkojë në kryeministri në orën 15.00 për t’i dorëzuar progres-raportin e Komisionit Evropian shefit të qeverisë shqiptare. Më pas Rama dhe Soreka do të japin një konference shtypi në Kryeministri.
Ky progres-raport i Komisionit Europian i paraprin vendimit të Samitit të 20 dhe 21 Qershorit në Bruksel, për çeljen e negociatave të anëtarësimit të Shqipërisë dhe Maqedonisë së Veriut.
Pak javë më parë në Tiranë shefja e politikës së jashtme Federika Mogerini tha se vendi ynë i ka përmbushur kushtet për negociatat, duke përmendur si shembull reformën në drejtësi./ABC News Albania 24/7
nev ila18:16 | 28/05/2019
Komisioni Evropian, të mërkurën (29.05) i paraqet Parlamentit Evropian raportet e progresit për shtetet në procesin e zgjerimit, ku përfshihen shtetet e Ballkanit Perëndimor dhe Turqia.
Në raporte nuk pritet të ketë befasi dhe duket se Komisioni Evropian do të rekomandojë edhe kësaj radhe çeljen e negociatave për anëtarësim për Maqedoninë e Veriut dhe Shqipërinë. Në Bruksel kjo ngjarje që vitet e mëparshme është shoqëruar me shumë aktivitete këtë herë ndodhet nën hijen e Samitit të Jashtëzakonshëm të vendeve anëtare, të cilat duhet të vendosin për mënyrën e zgjedhjes së presidentit të ri të Komisionit të BE-së.
Këto raporte rekomandojnë shumë veprime, të cilat zbatohen në bazë të vendimeve në strukturat e tjera të BE-së të udhëhequra nga zyrtarë të zgjedhur të vendeve anëtare. Vendimi për çeljen e negociatave bëhet nga Këshilli Evropian ku marrin pjesë krerët e vendeve anëtare.
Raporti në tërësi do të përmbajë vlerësime për ecurinë e reformave në vendet e Ballkanit duke përfshirë edhe ato të cilat janë kyçe për Shqipërinë si funksionimi i institucioneve, sundimi i ligjit dhe lufta kundër korrupsionit. Sa i përket Shqipërisë dhe Kosovës si pika kyçe do të mbeten lufta kundër korrupsionit dhe funksionimi i drejtë i gjykatave.
Përmbajtja e raportit do të përdoret nga vendet anëtare dhe nga vendet që pretendojnë anëtarësimin si mjete lobimi për marrjen e vendimeve.
Sa i përket çeljes së negociatave për Shqipërinë situata nuk ka ndryshuar me Francën si një kundërshtare me peshë e çeljes së negociatave, e përkrahur nga vende si Holanda dhe Belgjika.
Më herët është spekuluar se qëndrimi negativ i Francës për zgjerimin ka qenë i lidhur me zgjedhjet për Parlamentin e BE-së dhe ndikimin që një vendim i tillë mund ta ketë në këto zgjedhje. Rezultatet e zgjedhjeve nuk përmbushën frikën e forcimit tw së djathtës në nivel evropian, por pozita e Presidentit Makron është goditur, pasi partia e tij humbi kundrejt ekstremit të djathtë të udhëhequr nga Marine Le Pen në Francë. Mbetet të shihet se si ky rezultat do të ndikojë në qëndrimin francez./DW
ent ela11:35 | 25/04/2018
Ambasadorja e Bashkimit Europian Romana Vlahutin ka prezantuar në Këshillin Kombëtar të Integrimit vlerësimet e Komisonit Europian në raportin për Shqipërinë, i cili rekomandoi hapjen e negociatave pa kushte për vendin tonë.
Ambasadorja e BE, Romana Vlahutin i ka paraqitur Komisionit Parlamentar të Integrimit raportin e Komisionit Europian për rekomandimin për hapjen e negociatave për anëtarësim. Ajo deklaroi se të gjitha përpjekjet për reforma duhet të ruhen dhe të thellohen. Ambasadorja e BE renditi arritjet që e bënë Shqipërinë të merrte rekomandimin, ndërsa theksoi sfidat që e presin deri në marrjen e vendimit në qershor.
“Së pari nuk ka vend për vetëkënaqësi për gjithëkënd, por duhet të përqëndrohen te fakti se si duhet të punojnë më shumë. Është thelbësore që ky proces reforme të jetë me ritëm të qëndrueshëm. Të kemi të gjitha elementët e nevojshëm për një zbatim të shpejtë të reformës në drejtësi.
E dyta është lufta kundër korrupsionit. Ngritja e SPAK besoj se do sjellë kapacitet për të luftuar korrupsionin. Është e nevojshme që të kemi progres serioz. Shumë sfida për Ballkanin Perëndimor si rajon”- deklaroi Vlahutin.
Për ambasadoren e BE-së ajo që shtë me rëndësi është vullneti politik, cili është thelbësor për reformat./abcnews.al
ad min11:56 | 21/04/2018
Progres-raporti i KE për këtë vit i prezantuar këtë javë ishte pozitiv për Shqipërinë dhe Maqedoninë, të cilave iu rekomandua hapja e negociatave për anëtarësim. Për Kosovën, ky raport nuk ishte dhe aq pozitiv në shumë fusha dhe nuk u përmend asnjë datë konkrete për liberalizimin e vizave. Ndërsa për Turqinë më shumë se progres, ky mund të cilësohej një regres-raport./abcnews.al
ent ela21:12 | 17/04/2018
Sa i takon Kosovës raport-progresi i BE-së vlerëson se shteti i vogël ballkanas është ende larg hapjes së negociatave të anëtarësimit. Në dokument, Kosovës i bëhet thirrje të vijojë me përmbushjen e kritereve dhe të zbatojë marrëveshjet me Serbinë.
Kosova duhet të vazhdojë rrugën e përmbushjes së kritereve europiane përpara se të llogarisë hapjen e negociatave të anëtarësimit në BE. Kështu thotë progres-raporti i publikuar të martën, në të cilin thuhet se sundimi i ligjit, ekonomia e lirë dhe përshtatja e legjislacionit vendas me atë të BE-së mbeten parakushtet kryesore në procesin e integrimit.
Në reagimin e saj, shefja e Politikës së Jashtme të BE, Federica Mogherini ka deklaruar se, Prishtina duhet të vijojë zbatimin e marrëveshjeve të arritura në dialogun me Serbinë. Në këtë aspekt, Mogherini ka vlerësuar nisjen e procesit për krijimin e Shoqatës së Komunave Serbe.
Ndërkohë, ambasadorja e BE-së në Prishtinë, Natalija Apostolova, e cila u ka dorëzuar raportin autoriteteve lokale, nuk ka qenë në gjendje të thotë nëse 2018-a do të jetë viti i liberalizimit të vizave për qytetarët e Kosovës.
Diplomatja e BE-së ka bërë me dije se javën e ardhshme Brukseli do të dërgojë në Kosovë një grup ekspertësh, të cilët sipas saj do të bëjnë vlerësimin e fundit dhe më pas do të raportojnë tek Komisioni Europian. Ajo ka nënvizuar se liberalizimi i vizave varet nga progresi i vetë Kosovës dhe ajo çka do të vendosin vendet anëtare të Unionit.
Në komunikimin e saj, Apostolova ka komentuar edhe arrestimin e politikanit serb Marko Gjuriç, episod të cilin nuk e ka cilësuar si provokim, por një incident të pafat që ka ndodhur 3 ditë nga seanca e radhës e dialogut të nivelit të lartë Kosovë-Serbi.
Ndërsa sa i takon mundësisë së zgjedhjeve të reja, ajo u ka bërë thirrje autoriteteve që të mendohen dy herë, pasi mbajtja e zgjedhjeve para kohe dëmton procesin e reformave. Në reagimin e tij, presidenti Hashim Thaçi ka deklaruar se Kosova mbetet e përkushtuar për zbatimin e reformave evropiane dhe të Marrëveshjes së Stabilizim Asocimit.
“Tani, pa humbur kohë, të gjitha institucionet duhet të reflektojnë mbi përmbajtjen dhe konstatimet e raportit, në mënyrë që të adresohen problemet dhe sfidat e evidentuara”, ka thënë Thaçi në Facebook. /abcnews.al
ent ela18:15 | 17/04/2018
Presidenti Meta priti në takim Ambasadoren e Delegacionit të BE-së në Tiranë, znj. Romana Vlahutin me rastin e publikimit të raportit të progresit për Shqipërinë nga Komisioni Evropian
Presidenti i Republikës, Sh.T.Z. Ilir Meta priti në takim Ambasadoren e Delegacionit të BE-së në Tiranë, znj. Romana Vlahutin, me rastin e publikimit të raportit të progresit për Shqipërinë nga Komisioni Evropian.
Presidenti Meta mirëpriti rekomandimin e Komisionit Evropian për çeljen e negociatave të anëtarësimit me Shqipërinë, duke e cilësuar një akt inkurajues, të shumëpritur dhe strategjik për të ardhmen evropiane të vendit. Presidenti e vlerësoi Komisionin si një mik të çmuar e të pakursyer të vendeve kandidate, duke u vetëdëshmuar një forcë e madhe tërheqëse drejt zgjerimit të mëtejshëm të BE-së.
Duke e konsideruar raportin e progresit për Shqipërinë në harmoni të plotë me strategjinë e zgjerimit që synonte një perspektivë të besueshme dhe angazhim të thelluar të BE-së në Ballkanin Perëndimor, Kreu i Shtetit theksoi rëndësinë që ka miratimi i kësaj qasjeje dhe rekomandimit të Komisionit nga Këshilli Evropian i qershorit, për të nisur etapën e re të procesit të negociatave të anëtarësimit.
Presidenti Meta shprehu kënaqësinë që ky raport dhe, posaçërisht rekomandimi për çeljen e negociatave, i gjen të gjithë aktorët politikë, institucionalë dhe qytetarët shqiptarë të bashkuar në dëshirën për të përparuar sa më shumë dhe sa më parë drejt BE-së, pa mëdyshje.
Ai shprehu besimin se ky moment do t’i shërbejë një reflektimi të thellë dhe serioz për përballjen e sfidave të mëdha që kemi përpara, për ta bërë Shqipërinë një vend evropian më shpresëdhënës.
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
14:20 | 01/04/2020
14:18 | 01/04/2020
