kamza

kamza.jpg
Veronik Istrefaj18:34 | 12/02/2020

Janë publikuar vendimet e plota të Komisionit të Disiplinës. Dënimi më i rëndë, është padiskutim ai ndaj Kamzës, skuadër e cila rrëzohet një Kategori më poshtë pas mos-paraqitjes në ndeshjen ndaj Klosit. Klubi i Kamzës do të militojë në Kategorinë e Tretë. Më poshtë, janë dhe vendimet e plota të Komisionit të Disiplinës.

-KF Vllaznia për sjellje të gabuar të spektatorëve, në bazë të Nenit 65/1/ të KDS dënohet me gjobë në masën 100.000 (njëqindmijë) Lekë.

-KF Tirana në bazë të Nenit 12 të KDS, paralajmërohet se në rast përsëritje të sjelljes së gabuar të spektatorëve, do të jetë subjekt i masave disiplinore që parashikon Kodi i Disiplinës.

-KF Bylis në bazë të Nenit 12 të KDS, paralajmërohet se në rast përsëritje të sjelljes së gabuar të drejtuesve dhe futbollistëve duke tentuar të braktisin ndeshjen, do të jetë subjekt i masave disiplinore që parashikon Kodi i Disiplinës dhe Rregulloret e FSHF.

-Zyrtari i KF Erzeni Shkëlqim Troplini për sjellje të keqe ndaj zyrtarit të ndeshjes në bazë të Nenit 48/2/a të KDS dënohet m 8 (tetë) ndeshje pezullim nga aktiviteti futbollistik.

-KF Apolonia për sjellje të gabuar të spektatorëve, në bazë të Nenit 65/1/ te KDS dënohet me gjobë në masën 50.000 (pesëdhjetëmijë) Lekë. Në zbatim të Nenit 116/1/a) të KDS, gjoba të aplikohet në masën 50%.

-KF Kamza, për mosparaqitje në ndeshjen ndaj KF Klosi, veprim i përsëritur, në bazë të Nenit 89/2/e, 89/3 dhe 89/4 të Rregullores së Veprimtarisë Futbollistike të Kategorisë së Dyte dhe Nenit 27/1 të KDS përjashtohet nga aktiviteti futbollistik për sezonin 2019-2020 dhe zbritjen në një kategori më poshtë.

-Lojtari i KF Butrinti Fabio Dhrami për sjellje të keqe ndaj kundërshtarit në bazë të Nenit 47/1/d të KDS dënohet me 2 (dy) ndeshje pezullim nga aktiviteti futbollistik.

-Lojtari i KF Butrinti Rinild Maraj për sjellje të keqe ndaj kundërshtarit në bazë të Nenit 47/1/e dënohet me 5 (pesë) ndeshje pezullim nga aktiviteti.

-KF Selenica për dështim në përmbushjen e përgjegjësive në bazë të Nenit 64/1 të KDS dënohet me gjobë në masën 50.000 (pesëdhjetëmijë) Lekë. Në zbatim të Nenit 116/1/a) të KDS, gjoba të aplikohet në masën 20%./abcnews.al

kamza.jpg
ad min13:12 | 11/12/2019

Kamza u përjashtua vjet nga Kategoria Superiore, pasi në ndeshjen me Laçin u dhunua arbitri Eldorian Hamiti. Komisioni i Disiplinës vendosi ta zbriste në Kategorinë e Dytë, ku skuadra periferike e kryeqytetit garon këtë sezon futbollistik.

Presidenti Naim Qarri e ka shprehur edhe më parë se e ka të pamundur klubin, ndërkohë që Bashkia në krahun tjetër ka qenë indiferente. Ekipi u ndërtua vetëm pak ditë para nisjes së kampionatit, ndaj edhe rezultatet janë të dobëta.

Jo vetëm kaq, por edhe numri i lojtarëve të Kamzës është i vogël, çka ka bëtë që në sfidën e djeshme kundër Vorës ta nisin me 9 futbollistë. Një ngjarje e paprecedentë, që tregon edhe njëherë problematikat e shumta që kanë klubet e futbollit në vendin tonë. /abcnews.al

kamza.jpg
Vladimir Prenga11:10 | 25/09/2019

Goditja e gjyqtarit Eldorian Hamiti pati pasoja të rëndë për Kamzën një vit më parë. Komisioni i Disiplinës nuk e kurseu klubin periferik të kryeqytetit, duke e përjashtuar nga kampionati dhe duke e rrëzuar dy kategori më poshtë.

Kampionati nis këtë fundjavë dhe te Kamza po mundohen të ndërtojnë në kohë rekord ekipin për sezonin aktual në Kategorinë e Dytë. “Vazhdojnë selektimet e lojtarëve, si çdo ditë, në stadiumin tonë, ora 13:30. Të gjithë futbollisteët e interesuar mund t’i bashkohen ekipit tonë”, njoftojnë kamzalinjtë përmes faqes zyrtare në Facebook.

Normalisht vështirësitë janë të mëdha – kuptohet edhe nga fakti që bëhen thirrje përmes rrjeteve sociale – edhe për shkak të problematikave të brendshme që ka pasur klubi, në raportin bashki-presidencë.

Tashmë në krye të bashkisë nuk është më Xhelal Mziu dhe vendin e tij e ka zënë Rakip Suli. Presidenti Naim Qarri kërkon që Bashkia të jetë në mbështetje të ekipi, sidomos në aspektin financiar. Në Kategorinë e Dytë nuk kërkohen shpenzime të mëdha dhe palët duhet të bashkëpunojnë dhe ta ngjitin një kategori më lart Kamzën, më pas mund të bëhen plane të tjera. /abcnews.al

PRAG-KAMZA-KASTRIOTI-ABCM3T1.mpg_snapshot_00.15-1280x720.jpg
Vladimir Prenga14:57 | 20/09/2019

“KF “Kamza”, për mos paraqitje në ndeshjen e Kupës së Shqipërisë me KF “Apolonia”, datë 18.09.2019, në bazë të Nenit 30/4/a të KDS, humbet ndeshjen në tavolinë me rezultatin 3 me 0”, thuhej në vendimin e Komisionit të Disiplinës, që është korrigjuar më tej.

Klubi periferik i kryeqytetit jo vetëm eliminohet nga Kupa e Shqipërisë, por është përjashtuar të marrë pjesë në këtë kompeticion në dy sezonet e ardhshme. Disiplina ka korrigjuar vendimin, si më poshtë:

“KF “Kamza”, për mos paraqitje në ndeshjen e Kupës së Shqipërisë me KF “Apolonia”, datë 18.09.2019, në bazë të Nenit 54/2 të KDS, dënohet me mos pjesëmarrje në këtë garë për 2 sezonet e ardhshme futbollistike”. / abcnews.al

sebino-plaku.jpg
ad min15:08 | 22/05/2019

Një shoqatë e futbollistëve profesionistë pritet të krijohet së shpejti në Shqipëri. Këtë e tregon ish-lojtari i Kamzës, Sebino Plaku, në intervistën për Abc News.

Golat duhet t’i shikojë i ulur në kolltukun e shtëpisë. Sebino Plaku prej 3 muajsh nuk ka mundësi të tregojë veten në fushë, ashtu si edhe gjithë skuadra e Kamzës, në të cilën ai ishte kapiten.

Për sulmuesin me numrin 10 dhe shokët e tij, çasti fatal ishte ai i dhunës që shpërtheu kundër arbitrit në stadiumin e Kamzës, në ndeshjen ndaj Laçit, pas së cilës klubi u përjashtua nga Superliga.

Si kanë qenë për Sebinon këta muaj pa futboll?

“Në momentin që ke një profesion, nuk paguhesh për atë profesion që ndjek, atëherë normalisht fillojnë vështirësitë sepse faturat e jetesës nuk pyesin se çfarë ndodh me ty. Është një periudhë e gjatë dhe e vështirë të kthehet në formën e mëparshme. Qoftë gjendja e mëparshme sportive sepse ekipet e marrin në konsideratë periudhën e gjatë të shkëputjes, jo vetëm në aspektin personal të stërvitjes, por edhe për sa i përket kreditive që mund të ketë lojtari, kur është në aktivitet”, tha Plaku.

Gjithsesi, duket se ka dritë në fund të tunelit, pasi Sebino dhe disa lojtarë të tjerë po përpiqen të themelojnë shoqatën e futbollistëve profesionistë të Shqipërisë, me Andi Lilën si nismëtar.

“Janë disa iniciatorë, unë jam një prej tyre edhe e kam përqafuar shumë shpejt idenë sepse mendoj se është shumë e nevojshme sepse mesa di unë jemi vendi i dytë, ndoshta është edhe Kosova që nuk e kanë këtë institucion. Urojmë që të miratohet dhe lojtarët në të ardhmen të kenë një mbështetje më tepër apo të kenë ku të kërkojnë të drejtat e tyre”, tha futbollisti.

Sidoqoftë, vetëm shoqata e futbollistëve nuk mjafton.

“Në qoftë se shteti do ta miratojë ligjin për sportin, do t’i japë një shtysë shumë të madhe në Shqipëri, duke bërë krahasimin me ekipe që përfaqësohen në Kupat e Europës që kanë treguar se mund të përfaqësohesh denjësisht qoftë edhe me vështirësitë që sapo i prekëm. Do ishte një hap drejt së ardhmes sepse edhe këta presidentë janë ata që sakrifikojnë dhe duhen kuptuar në këto raste”, tha Plaku.

Sebino Plaku mbetet futbollist, pra ku do të jetë ai sezonin e ardhshëm?

“Do të jem në Superiore sepse ka 10 ekipe dhe është mundësia të aktivizohemi. Jashtë vendit, duke qenë familjar, do të marrësh në konsideratë çdo lëvizje, por ddo jesh shumë i kujdesshëm para se të bësh një hap”, tha Plaku./ABC News Albania 24/7

kamza-1280x719.jpg
ent ela15:13 | 06/03/2019

Kamza përjashtohet nga Superliga dhe Kupa e Shqipërisë në këtë sezon, pas dhunës së ushtruar ndaj arbitrit në ndeshjen ndaj Laçit. Komisioni i Disiplinës në Federatë e zbriti në Kategorinë e Dytë, duke nisur nga edicioni i ardhshëm.

U bë e qartë se vendimi do të kishte qenë ky. Kamza u përjashtua nga Superliga pas dhunës ndaj arbitrit Eldorian Hamiti, ndërsa sezonin e ardhshëm do ta nisë nga Kategoria e Dytë, pra nga niveli i tretë i futbollit shqiptar.

Po ashtu, nuk do të luajë as në Kupën e Shqipërisë këtë edicion. Komisioni i Disiplinës në Federatë përjashtoi edhe presidentin e klubit, Naim Qarri me 36 muaj, pra 3 vite kalendarike, po me 36 javë u përjashtua drejtori sportiv, Matraxhiu, ndërsa drejtuesi tjetër i klubit, Bana, u dënua me 18 muaj pezullim.

Të treve u ndalohet hyrja në çdo stadium të Shqipërisë, me klubin kamzali do të paguajë 100 000 lekë gjobë, por që ka të drejtë të apelojë. Vendimi i Disiplinës ishte i pritshëm pas reagimit të ashpër të institucionit, që prej ditës së diel kur edhe ndodhi ngjarja.

Federata doli në konferencë të jashtëzakonshme që të hënën, ku kërkoi dënim të skajshëm nga komisionet. Një ditë më pas, edhe presidenti Duka kërkoi ndëshkim të fajtorëve, duke folur nga Elbasani, në përurimin e një minifushe për fëmijë.

Vetë ndeshja Kamza-Laçi u la me rezultatin 1-1, pasi rrahja e arbitrit ndodhi pas përfundimit të saj, ndërsa kamzalinjtë i humbasin 0-3 në tavolinë të gjithë takimet e tjerë.

Kjo do të thotë se të favorizuar vendimit janë Luftëtari, Flamurtari dhe Skënderbeu që kishin nga dy ndeshje për të luajtur me Kamzën, ndërsa gjithë ekipet e tjerë kishin nga një.

Pra, Luftëtari, Flamurtari e Skënderbeu do të marrin 6 pikë në tavolinë, ndaj të të tjerëve u takojnë nga tri pikë, me gjirokastritët që ndihmohen ndjeshëm në garën për mbijetesë, si dhe korçarët e vlonjatët në synimet për Europën.

Kamza pati fatin e disa klubeve të tjerë të dënuar në vite, si Burreli, Bylisi apo Tërbuni, ndonëse vendimet nuk kanë qenë kaq të skajshëm edhe në raste të ngjashëm si për Laçin apo Këlcyrën./abcnews.al

hafizi.jpg
ad min21:55 | 05/03/2019

Ndeshja mes Kamzës dhe Laçit u shënua dhe nga disa skena të dhunshme. Disa tifozë të Kamzës ushtruan dhunë ndaj arbitrit të ndeshjes, pasi ky i fundit dha penallti ndaj skuadrës së tyre në minutat e fundit të ndeshjes.

Për të folur mbi këtë temë ishte i ftuar në “Provokacija”, ish-trajneri i kombëtares së futbollit, Astrit Hafizi. Ai tha se këto ngjarje janë më të shpeshta në kategoritë e ulëta. Megjithatë, i pyetur nëse mendonte se policia duhet të ndërhynte në rastin e Kamzës, Hafizi tha se policia akoma nuk e ka kuptuar rolin e saj.

Mustafa Nano: Policia duhet të ndërhynte në Kamëz?

Astrit Hafizi: Policia nuk e kupton pse rri jashtë? Rri jashtë dhe është marrë vendim që nëse do kesh probleme ti do futesh. Po kush e lajmëron këtë që rri jashtë. Policia si në rastin e fundit ecte me hap rreshtor. Arbitri po u dhunonte, ata ecnin avash-avash. Ai nuk e di se ndërhyrja duhet të jetë shumë e shpejtë. Nuk ka nevojë pse të rrijë jashtë përgjegjësi i tyre. Ai mund të futet në stadium dhe shikon rastin si po shkon dhe lajmëron vartësit e tij. Kjo nuk kuptohet. Akoma nuk e dimë pozicionin e tyre.

Sipas Hafizit, në rastin e Kamzës arbitri dha penallti me të drejtë. Megjithatë ai theksoi se në shumë raste arbitrat kanë qenë personazhi negativ i ndeshjeve, por kjo nuk është arsye për të ushtruar dhunë mbi ta.

“Po t’i referohemi rastit të fundit unë mendoj se arbitri kishte të drejtë. Penalltia ishte penallti. Në anën teknike profesionale ishte e drejtë. A kanë dhen herë t tjera penallti të paqena ke sa të duash. Këtu pastaj bëhet dhe të papranueshëm nga klubet sepse i kanë provuar këto gjëra. Janë mundur në minutat e fundit. Janë bërë gola offside, të paqena. Kanë fajin e tyre se edhe janë përkëdhel ndoshta nga presidentë të veçantë”, tha Hafizi.

Ai nënvizoi se ekipet të cilat ushtrojnë dhunë në kampionate serioze rrezikojnë përjashtim nga kampionati, ndryshe nga ç’ndodh në Shqipëri.

“Padiskutim përjashtohet gjithmonë nga aktiviteti. Shkrihet klubi. Nëse e përjashton për një vit siç ka ndodhur, ai kthehet përsëri pas dy vjetëve, tre vjetëve dhe të futet prapë në Superligë. Siç po ndodh. Afër kemi disa skuadra që janë dënuar dhe janë gati për të hyrë në Superligë prapë. Duhet të përjashtohet përgjithmonë mendoj unë”, tha Hafizi./abcnews.al

KUKESI-1280x722.jpg
ent ela18:00 | 24/02/2019

Kukësi u ngjit sërish në vendin e dytë në Superligë, pas suksesit ndaj Kamzës. Trajneri Cungu pati lajme të mira nga kjo ndeshje, por edhe u shqetësua nga pësimi i dy golave.

Nuk ishte e lehtë, por fitorja u mor, madje u arrit edhe diçka më shumë. Kukësi i shtoi vetes tri pikë në renditjen e Superligës, duke u ringjitur në vend të dytë, por edhe pati kënaqësinë sepse golat u shënuan nga lojtarët e ardhur në janar.

Vasil Shkurtaj, Valdet Rama dhe Eduard Rroca ishin autorët e rrjetave të një suksesi që nuk ishte aspak i lehtë ndaj ekipit të fundit të tabelës, Kamzës. Përfundoi 3-2, me kamzalinjtë që nuk u dorëzuan deri në fund, tashmë të drejtuar nga trajneri I ri, Gentian Stojku, i katërti në këtë sezon.

Shkurtaj, i ardhur nga Luftëtari shënoi shpejt, por pjesa e parë u mbyll në barazim 1-1 në “Elbasan Arena”, pas rrjetës së japonezit Fukui për miqtë. Pas pushimit, sidoqoftë erdhi reagimi i shpejtë i veriorëve. Valdet Rama, ish-lojtar i kombëtares realizoi për avantazhin e dytë.

Pastaj hyri në fushë Rroca, të cilit iu deshën vetëm tri minuta për të gjetur golin. Gjithsesi, nuk pati kohë për festë të gjatë, sepse Kamza e shkurtoi sërish diferencën duke i bërë të vështira 13 minutat e fundit.

A mund të thuhet se Kukësi e kaloi krizën? Jo plotësisht, pasi pësimi i dy golave nga vendi i fundit i Superligës tregon për pasiguri.

Presioni i rezultatit mbetet tepër i madh mbi trajnerin Cungu dhe lojtarët e tij, dhe kjo vazhdon të ndikojë për keq. Pas 23 javësh, Kukësi ka 41 pikë, 8 më pak se Partizani kryesues, duke mbetur ende me shpresë për titullin kampion.

Kamza, ndërkaq, ka 16 pikë, 9 pikë larg zonës së shpëtimit, dhe nuk po i bën punë ndryshimi i trajnerëve./abcnews.al

partizani.jpg
ad min20:27 | 03/02/2019

Partizani u shkëput sërish në 5 pikë epërsi ndaj Kukësit në Superligë, por e pati më të lehtë se zakonisht fitoren në Kamzë. Shumë lojtarë vendas bojkotuan ndeshjen për shkak të vonesës së pagave.

Janë nga ato ndeshje që shpesh nuk di si t’i luash. Kamza u detyrua të dilte në fushë ndaj Partizanit, me një njëmbëdhjetësh me shumë mungesa kryesore, por kjo i hutoi jo pak kryeqytetasit. Të përgatitur për të përballuar një kundërshtar të plotë, të besuarit e trajnerit Gega zhgënjyen me lojë edhe pse fituan 1-0, ndërsa më shumë se gjysma e formacionit kamzali bojkotoi për shkak të rrogave.

Lojtarë si Fukui, Plaku, Malaj apo Avdyli, pa i përmendur të gjithë, nuk pranuan të dilnin në fushë në shenjë proteste, madje lajmet janë që nëse deri të mërkurën nuk nis pagesa, nuk do të paraqiten as në seancat stërvitore. Një situatë shumë e vështirë për trajnerin Ernest Gjoka, që pa e tepruar mund të thuhet se e shkatërron punën e bërë prej tij.

“Situata sa vjen dhe po agravohet më shumë. Njerëzit kanë nevojat e tyre nga ana financiare, mbajnë familjet e tyre. Kështu që nga ky moment ne jemi në këtë vështirësi pasi dihet publikisht që dy drejtuesit tanë kanë prishur marrëdhëniet me njëri-tjetrin. Do i jap dhe pak kohë presidentit dhe nëse nuk e qetëson pak skuadrën, sigurisht që jo unë po kushdo që të jetë nuk do mundet të punojë dot”, tha Gjoka.

Gjithsesi, Kamza u përpoq edhe me shumë lojtarë të stolit si titullarë, dhe e vuri në vështirësi serioze atë që mund të quhet skuadra më e mirë e momentit në Shqipëri. Përballja e javës së 20-të u zgjidh nga një gol i vetëm, shënuar nga Jasir Asani në minutën e 55-të, dhe kryeqytetasit më shumë u përpoqën të kontrollonin ndeshjen sesa të sulmonin e të luanin bukur. Trajneri i kryeuesve, Gega, gjithsesi, u shpreh i kënaqur.

“Nëse do të fitosh një ndeshje që nga minuta e parë deri në të 90 duhet ta vlerësoh të njëjtë. Ndoshta dhe fusha dhe era ishte pak e vështirë për ta ulur topin dhe për ta qarkulluar”, tha Gega.

Në ndeshjen tjetër, luajtur në të njëjtën orë, Luftëtari arriti një fitore të papritur, 2-0 në Laç, ndaj një rivali që pretendon të paktën Europën. Koçonis shënoi që në minutën e 2-të, dhe Aleksi fiksoi rezultatin që në pjesën e parë.

Vlen të theksohet se këtë sezon, Laçi ka fituar në Gjirokastër në fazën e parë, surpriza që kanë ndodhur edhe në duelet e Luftëtarit me Kastriotin, ku gjithnjë ka fituar skuadra mike, diçka tepër e rrallë për Superligën. Pas 20 ndeshjeve, Partizani kryeson renditjen me 43 pikë ndaj 38 të Kukësit, ndërsa Kamza zbret në vendin e fundit./abcnews.al

SUPERLIGA-TIRANA-DHE-TEUTA-1280x720.jpg
ent ela21:56 | 27/01/2019

Tirana arriti fitoren më të thellë të sezonit në Superligë, duke mundur Kamzën 4-1 e duke iu shkëputur fundit të tabelës. Flamurtari ndaloi Teutën në Durrës.

Njëri rezultat edhe pritej, por tjetri ishte befasi. Fitorja e Tiranës  dhe barazimi i Flamurtarit cilësohen si lajmet e Superligës, në ndeshjet e saj të fundit të javës së 19-të.

Kryeqytetasit luajtën në fushën e tyre, në “Selman Stërmasi” ndaj Kamzës dhe triumfuan 4-1, ndonëse pjesa e parë u mbyll në dizavantazhin e tyre, 0-1.

Kamzalinjtë shënuan të parët, me anë të ish-lojtarit të Tiranës, Sebino Plaku, që dha shembullin me shiritin e kapitenit në krah.

Formacioni vendas u duk shumë i dobët në mbrojtje në 45 minutat e para, por reagoi pas pushimit, me siguri i nxitur nga trajneri Ardian Mema.

Po ashtu, u ndihmua jo pak nga dalja me të kuqe e mbrojtësit të miqve, Beqiri, që në pjesën e parë, kur tiranasit fituan penallti, por që sulmuesi Ngo e humbi, dhe portieri Avdyli e priti.

Hasani barazoi në 59’, pastaj Ngo shleu gabimin e penalltisë duke kaluar të vetët në epërsi.

Pas pak minutash, kombinim tjetër Ngo-Hasani, me shkodranin që shënoi golin e dytë personal në këtë ndeshje, ndërsa rezultatin e vulosi Ndoka, me një gjuajtje me kokë.

Ky sukses e shkëput disi Tiranën nga zona e rënies nga kategoria.

Në Durrës, ndërkaq, Flamurtari i menduar si i mbytur, arriti të ndalte Teutën, në një barazim 1-1.

Vlonjatët madje kaluan të parët në epërsi me një penallti të kthyer në gol nga Batha, por durrsakët barazuan që në pjesën e parë, me afrikanin Traore.

Pas pushimit, në fushë për vendasit hyri edhe ish-kapiteni i Flamurtarit, Tomislav Bushiç, i cili detyroi vlonjatët të luanin me 10 vetë. Kroati u pengua nga mbrojtësi Veliu, dhe ky u nxorr me të kuq.

Gjithsesi, rezultati nuk ndryshoi dhe miqtë morën një pikë të çmuar.

Pas 19 javësh, Tirana u ngjit në 20 pikë, 5 pikë larg zonës që të zbret në Kategorinë e Parë, ndërsa Teuta ka 34 pikë, një më pak se Kukësi i vendit të dytë.

Flamurtari iu afrua Skënderbeut, ndërsa Kamza është edhe më e rrezikuar për të rënë nga Superliga. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono