Duka
Veronik Istrefaj23:32 | 09/03/2020
Në emisionin Pressing në ABC News, kryeredaktori i Telesport, Anton Cicani i ka bërë disa pyetje delikate presidentit të FSHF-së, Armando Duka. Numri një i futbollit tha fillimisht: “Në dy fazat e para, renditja ka qenë jashtëzakonisht e ngjeshur, ndërsa tani ka filluar disi shkëputja. Ka filluar prapë të marrë formën normale të një klasifikimi. Ti mendon se Partizani nuk e meritonte titullin sezonin e kaluar? Po pra, se po merremi gjithë ditën me tifozë të shkurtër”.
Anton Cicani, kryeredaktori i Telesport, pyeti Dukën në lidhje me dy skuadrat e fundit të renditjes, Flamurtarin dhe Luftëtarin, nëse e mendonte para fillimit të sezonit se do të kishte një shkëputje të tillë të këtyre dy ekipeve me pjesën e lartë të tabelës. Duka u përgjigj: “Unë në fakt nuk kam menduar që në fillim të garës se Flamurtari dhe Luftëtari do të ishin në këto nivele sportive.
Sidomos për Flamurtarin, pasi ka vite që drejtohet nga Idrizi. Edhe pse nuk ka qenë në krye, ka qenë një skuadër që ka rivalizuar dhe ka marrë pjesë edhe në Europë. Nuk e kam menduar se do të jetë në këto nivele. Në fillim të garës, në aspektin financiar, asnjë ekip nuk është toleruar dhe as nuk do të lejohet. Në shtator, nuk do të lejohet asnjë klub që nuk ka shlyer detyrimet financiare. Disa presidentë klubesh, shtrijnë këmbët më shumë seç kanë jorganin. Të drejtojnë futboll aq sa kanë mundësi”.
Cicani vazhdon pyetjet e tij, kësaj radhe duke e pyetur nëse klubet shqiptare e respektojnë “Fair-Play” Financiar.
“Normalisht që po, pasi ka një vizë që duhet të jetë blu dhe jo e kuqe. Nëse nuk plotësohen, nuk merr pjesë në garë. Këto lloj makinacionesh, bëhen në tërë botën, mbase dhe një klub i madh faturon më shumë nga biznesi i vet. Nga pikëpamja formale, një klub nuk nis dot garën, pasi duhen dokumentet dhe te Ministria e Financës”.
Më pas, Cicani denoncoi një rast të një futbollisti të Kukësit, që me letra, merr 400 mijë lekë, ndërsa në realitet merr më shumë. Duka u përgjigj: “Cican, nuk e di te cili televizion punon ti, por unë besoj rrogën që të deklaron pronari yt. Nëse pronari yt të jep një lekë më tepër, është puna juaj”.
“Trukimet? Kemi shumë pak, kemi 4 raste dhe bëhet fjalë për ndeshje në Kupën e Shqipërisë. Në çdo rast ne depozitojmë një kallëzim penal në polici. Mendimi im do ishte që Asambleja të japë atribute Komisionit të Etikës, që këta të dënojnë.”/abcnews.al
Veronik Istrefaj23:11 | 09/03/2020
Sulejman Starova dhe Armando Duka janë vënë më në fund përballë, pas më shumë se 15 vitesh. Trajneri i njohur dhe presidenti i FSHF-së kanë biseduar me njëri-tjetrin në studion e Pressing, në ABC News.
STAROVA – “Presidenti tha shumë të vërteta. Çdo ekip e meriton atë pozicion ku është aktualisht në Superiore. Çdo sezon, e ka fituar titullin ekipi që e ka merituar, përveçse një rast. Kur isha unë trajner, atë vit nuk e mori ai që e meriton. Por nuk ka faj Duka, ishte mazhorancë atëherë”.
DUKA – “Unë nuk mund ta mohoj që arbitrat bëjnë gabime, edhe Starova mund të ketë bërë 1000 gabime në pankinë. Edhe Sula kur ka bërë gabime në pankinë, ka bërë edhe zgjedhje të mira. Ashtu sikur një futbollist bën gabime. Këto janë pjesë të lojës, nuk them që nuk ekzistojnë. Sot, për të njëjtën temë, kam fol me Bekim Halilajn, presidentin e Luftëtarit, që kishte pretendime. Nuk mund ta them që Federata ia ka hequr titullin Starovës. Nëse fitonte Partizani, mund të thoshte Kukësi të njëjtën gjë. Edhe Gjici më shkroi sot, më tha: Pse nuk na dhanë sot një penallti sade. Unë nuk e kam parë ndeshjen, për shkak të angazhimeve të tjera.
STAROVA – Unë mendoj se përveç kësaj që tha presidenti, duhet të kalojmë përtej kësaj. Presidenti nesër mund të marrë, sepse as presidentit nuk i vjen mirë kur thonë: “Shiko, la nom ai atje”. Duka mund të bëjë dhe këtë, të mbledhë Libohovën dhe t’i kërkojë llogari”.
DUKA – “Faktikisht, nuk është pa vëmendje ky sektor në Federatën Shqiptare të Futbollit (arbitrimi). Jemi një nga Federatat e vetme që paguajmë çdo shpenzim të arbitrimit. Sot nuk bëjnë kontribut as klubet. Kur gabon një futbollist, nuk e pezullon, thjesht nuk e aktivizon të dielën. Kështu është dhe me arbitrat. Arbitrat nuk mendoj, nuk e kam bindje, jo se dua t’i mbroj, por unë marr të njëjta përgjegjësi si për arbitrat, si për futbollistët, si për presidentët. Arbitrimi është në të njëjtat nivele me futbollin shqiptar.
STAROVA – “Siç punojmë ne pas ndeshjes me trajnerët që analizojmë skuadrën, besoj se duhen analizuar dhe arbitrat. Mos ka rënë puna? Unë kam informacion se ka ra puna. Para se të vije ti në studio, po flisnim se nuk ka shkuar arbitri me qëllim të gabojë, por ka gabuar për paaftësi. Në këto kushte, rritet përgjegjësi e atyre që drejtojnë”./abcnews.al
Veronik Istrefaj22:51 | 09/03/2020
Presidenti i FSHF-së, Armando Duka, është i ftuar në emisionin Pressing, në ABC News. Kreu i futbollit shqiptar ka folur për situatën e futbollit pas përhapjes së Coronavirusit.
“Në fakt, është e vështirë që të parashikojmë se çfarë do të ndodhë në të ardhmen në situatën e virusit, që tashmë preku dhe Shqipërinë. Sot, ju jeni të informuar se Qeveria ka marrë një vendim, I cili pezullon dhe ndërpret të gjitha aktivitet publike, grumbullimet etj etj. Detajet, se çfarë do të ndodhë, është një gjë që besoj se nesër do të nxjerrim akte dhe udhëzime. Por do të jenë pjesë e diskutimit, pasi pasojat janë të mëdha.
Sot, brenda ditës, gjetëm një zgjidhje që shumëkush mund ta kontestojë, që vazhduam me dy ndeshje pa spektatorë. Për të ardhmen, duhet të vendosim. Shëndeti është i pari, futbolli, biznesi e të gjitha të tjerat, vijnë pas. Por duhen dhe bizneset, prandaj të gjendet një gjuhë e mesme. Ka pasoja në financë, pasi është një lloj ekonomie e cila nëse stopohet, ka pasoja ekonomike, nuk e di nëse edhe ti do të bësh emision nëse nuk ka sport (drejtuar Gerti Çarçanit).
Edhe nga pikëpamja sportive, është e vështirë, pasi kur do të rikuperohen ndeshjet, kur do të luajmë në Europë? Besoj se do të gjejmë balancat më të mira të mundshme. Unë mendoj se ka dhe një lloj paniku, pasi në Shqipëri ka vetëm dy raste. Në komunikimet zyrtare, edhe sikur t’i shumëzojmë me 2, bëhen katër, dhe nuk mendoj se do të ketë masa drastike”, tha Duka./abcnews.al
Veronik Istrefaj20:56 | 09/02/2020
NUK KA NDRYSHIME NE KOKSH DERI NE LOJRAT OLIMPIKE. ZGJEDHJE TE REJA E NDRYSHIME NE STATUT DERI NE FUND TE VITIT
Kompromis në Asamblenë e Jashtëzakonshme të Komitetit Olimpik Kombëtar Shqiptar. Me ndërmjetësimin ndërkombëtar, u ra dakord që organet drejtuese të vazhdojnë punën deri në Lojërat Olimpike në Tokio, dhe më pas të ketë ndryshime në statut, dhe zgjedhje të reja.
ARMAND DUKA, PRESIDENT I FSHF-së
GENC BOGA, MBAJTES I THESARIT NE KOKSH
VIRON BEZHANI, PRESIDENT I KOKSH-it
ERALD DERVISHI, FEDERATA SHQIPTARE E SHAHUT
ZHEROM POJE, KOMITETI OLIMPIK NDERKOMBETAR
Një ushtarak i famshëm francez e quajti Traktarin e Versajës pas Luftës së Parë Botërore si një armëpushim 20-vjeçar, dhe doli i saktë. Besohet, një armëpushim disa mujor ishte akordi i arritur në fund të Asamblesë së Jashtëzakonshme të Komitetit Olimpik Kombëtar Shqiptar.
U miratua propozimi i bërë nga presidenti i Federatës Shqiptare të Futbollit, Armand Duka, për të lënë në fuqi organet drejtuese deri në Lojërat Olimpike në Tokio, e për të organizuar më pas zgjedhje të reja.
Asambleja u thirr nga 2/3 e anëtarëve, pas akuzave të presidentit Viron Bezhani ndaj Sekretarit Stavri Bello dhe bordit drejtues, për shpërdorim të fondeve, dhe skenari fillestar ishte ky.
Presidenti I futbollit, Duka, foli në emër të 15 federatave. Debatet ishin të ashpra dhe kundër Dukës foli mbajtësi I Thesarit të KOKSH-it, Boga, me gjasë një nga njerëzit më të fuqishëm në bord.
Në Asamble u kuptua pozicionimi i grupeve, njëri kundër presidentit, që kërkoi ta niste me votëbesimin për Bezhanin, i një grupi pro presidentit, dhe një tjetër më i pavarur.
Vetë Bezhani i mbrojti akuzat e tij. Me gjasë, palët e kuptuan se duhej një kompromis i ri, pasi Asambleja mund të përfundonte keq. Pra, duhej pushim. Përfaqësuesi i Komitetit Olimpik Ndërkombëtar, Zherom Poje, u ul në kafen e Hotel Tiranës me Bezhanin, Dukën, Bibën e të tjerë. Më pas, vetë Duka bëri propozimin e ndryshuar.
Vërejtja më e fortë ndaj këtij propozimi u bë nga Mjeshtri i Madh Ndërkombëtar i Shahut, Erald Dervishi. Për t’i vënë vulën, ashtu si në 1997 e në çdo rast të politikës, u detyrua të fliste ndërkombëtari.
“Të biem dakord në parim me rezolutën që propozon presidenti, me një amendament që ka të bëjë me ndryshimin e procedurave të statutit. Statuti është i mirë, por mund të ndryshohet. Kombinojmë propozimin e presidentit me propozimin e Federatës së Futbollit. Të ruhet statuskuoja e organeve drejtuese deri në zgjedhjet e radhës, që do të mbahen pas Lojërave Olimpike dhe ka konsensus që të organizohen deri në fund të këtij viti”.
Presidentit Bezhani nuk i mbeti tjetër përveçse të shtronte formalisht propozimin në votë. Miratimi u krye me 44 vota pro dhe vetëm 3 kundër, ndërsa presidenti Bezhani premtoi diçka në dalje nga Asambleja./abcnews.al
Veronik Istrefaj13:49 | 07/02/2020
Ish-trajneri i Shqipërisë, Christian Panucci, ka dhënë një intervistë të gjatë për “Gazzetta Dello Sport”, aty ku foli dhe për aventurën e tij në Shqipëri. Trajneri italian tha se Duka kishte dhënë disa deklarata të shëmtuara pas largimit të tij, si dhe pranoi se stoli i Shqipërisë, ishte puna më e vështirë për t’u marrë përsipër.
“Kur mbërrita në Shqipëri, skuadra ishte në vend të katërt në grupin kualifikues për Botërorin e 2018. Në fund, e mbyllën të tretë. Shqipëria është një shtet shumë i komplikuar.
Pas Euro 2016, stoli më i vështirë për t’u marrë përsipër, ishte i Shqipërisë. Ishte stoli më i vështirë, pasi skuadra vite nga një Europian i arritur për herë të parë, të kryeje stërvitje ishte “gjysmë-vetëvrasje”.
Në kualifikueset e Euro2020, ishim në vend të katërt. Të renditeshim të tretët, do ishte arritje e suksesshme, të dytët një mrekulli. Megjithatë, unë jam i lumtur, një eksperiencë e jashtëzakonshme për mua.
Presidenti i Federatës Shqiptare ka thënë disa deklarata të shëmtuara për mua, por kur isha unë atje, sillej si president dhe nuk ndërhynte në asgjë. Më la të punoj i qetë”, përfundoi Panucci./abcnews.al
Veronik Istrefaj11:02 | 10/01/2020
Armando Duka ka folur hapur! Presidenti i Federatës Shqiptarë të Futbollit ka dhënë një intervistë për “RadioSei”, aty ku i thuri elozhe Eduardo Rejës, si dhe shpërtheu kundrejt ish-trajnerit, Christian Panucci.
“Teknikët italianë janë më të mirët”, tha fillimisht Duka për Radiosei. “Reja ishte pak i hutuar në fillim, kështu që Igli (Tare) e thirri dhe e bindi që të bëhej trajneri i Shqipërisë. Edy ka një përvojë shumë të mirë si trajner dhe një njeri i mençur. Ai solli një buzëqeshje përsëri në ekip dhe ka një atmosferë përfundimisht konstruktive”.
PANUCCI – “Një zgjedhje e gabuar, shkatërroi ekipin. Ai është një njeri me konflikt: ai kurrë nuk do të jetë trajner. Pas çdo ndeshje pati tensione me shtypin, ajo krijoi çarje në ekip. Ai nuk mendon për futbollin, por vetëm për paratë. Kur e njoftova për shkarkimi, menjëherë më tha që do të pretendonte edhe qindarkën e fundit.. Nuk është çështje ekonomike, por korrektësi etike”, përfundoi Duka./abcnews.al
Veronik Istrefaj20:13 | 08/01/2020
Presidenti i Federatës Shqiptare të Futbollit, Armando Duka, ka dhënë një intervistë të gjatë për “Gazzetta Dello Sport”, aty ku ka prekur shumë tema. Më shumë, Duka u ndalua te trajnerët italianë, si dhe te futbollistët shqiptarë që luajnë në Serie A.
TRAJNERËT – “Pas kualifikimit historik në Euro 2016, synojmë të shkojmë në Euro 2024 me Edi Rejën, trajner i kombëtares sonë dhe të moshave U-17, U-19, U-21. U besojmë shpesh trajnerëve italianë sepse janë mjeshtra të taktikës dhe të disiplinës. Talentet tona më të mëdha luajnë në Serinë A dhe kjo i ndihmon që të rriten”.
KUMBULLA – “Kumbulla është profili i lojtarit shqiptar me më shumë të ardhme. Është 20 vjeç, po bën gjëra të mira te Verona, është rritur tek moshat e këtij klubi dhe është thirrur nga trajneri Reja, madje ka debutuar duke luajtur disa minuta. Është i destinuar për të qenë një lojtar i madh. Është i fortë taktikisht, fizikisht dhe ka karakter të mirë. Te Verona është edhe Rrahmani, ka luajtur me Shqipërinë, por më pas vendosi të zgjedhë Kosovën”.
KAPITENI – “Hysaj është kapiteni ynë, është lojtari me më shumë eksperiencë dhe shpresojmë që të sërish hapësira tek Napoli. Me Ançelotin luajti shumë pak. Gjimshiti është një lojtar i mirë, luan në Champions dhe kjo nuk është pak për ne. Strakosha dhe Berisha janë të fortë dhe vënë në vështirësi zgjedhjeje trajnerin Reja. Por në Serinë B është edhe Veseli me Empolin”.
ITALIANËT – “Trajnerët italianë kanë sukses kudo, këtë e thotë historia. E nisa duke i dhënë besim Dossenës, por qëndroi pak. I dyti ishte De Biassi, na çoi në Europian për herë të parë dhe iu dha edhe nënshtetësia shqiptare. Tek ne konsiderohet hero. Pas tij erdhi Panuçi, i vetmi që më zhgënjeu pak. Nuk arriti të krijonte një klimë të mirë. Vendosa ta marr trajner për shkak të karakterit të fortë që tregonte në fushë, pasi e admiroja kur e shihja në televizor. Ishte pa eksperiencë si trajner, por kjo nuk më kushtëzoi që t’i ofroja postin në kombëtare. Kur erdhi më tha: ‘president, nëse një ditë do të më shkarkoni, atëherë nuk do t’ju kërkoj asgjë’. Nuk ndodhi kështu. Madje, tani na ka sjellë edhe një kërkesë që duhet t’i paguajmë shpërblimet e pas-shkarkimit. Këtë kërkesë po e studiojnë avokatët, por nuk është çështje lekësh, mua kjo më ka hidhëruar”.
REJA – “Është një trajner ekspert dhe së bashku me të dhe stafin e tij do të përpiqemi të çojmë përpara një projekt afatgjatë. Kualifikimi në Botëror është i vështirë, por synojmë me të gjitha forcat që të kualifikohemi në Euro 2024. Është ëndrra ime”.
AIR ALBANIA – “Stadiumi i ri është gjëja më e bukur në Shqipëri sot dhe është tejet i rëndësishëm për ne. Në stadiumet e qyteteve që u goditën nga tërmeti tani janë vendosur çadra për të dëmtuarit. Të gjithë lojtarët e Kombëtares dhuruan para të konsiderueshme për të dëmtuarit, ndërkohë që ka kontribuuar edhe vetë federata italiane me në krye presidentin Gravina. Reja gjithashtu dha një kontribut, por edhe klubi i Lacios. Me paratë e mbledhura do të mund të ndërtojmë shtëpi të reja. Më 10 janar do të luhet edhe një ndeshje mes legjendave të futbollit italian, grek, turk dhe shqiptar. Të ardhurat do të shkojnë për bamirësi”, përfundoi Armando Duka./abcnews.al
Veronik Istrefaj11:35 | 27/12/2019
Presidenti i Federatës Shqiptare të Futbollit, Armando Duka, ka qenë i ftuar në emisionin “Opinion” në TV Klan mbrëmjen e djeshme, ku foli për stadiumin e ri. Gjithashtu, numri një i FSHF-së foli edhe për pasurinë e tij personale, ku tha se leke nuk ka, por vetëm prona.
“Jam shumë i gëzuar që kemi një stadium që i plotëson kushtet. Besoj që ndikon edhe në sjelljet e njerëzve. Ka vërejtje që qëndrojnë, por mendoj se balanca është pozitive. Pasuria ime? Të them të drejtën skam asnjë lekë, por kam prona (qesh).
Kam aq lekë sa kam pasur në vitin ’91. Aq kam edhe tani. Ka të pasur që punojnë me ‘Cash’, ndërsa unë kam biznes e me prona. Ka nga ata që kanë tendencën të prodhojnë lekë e të investojnë. Unë se kam këtë“, përfundoi Duka./abcnews.al
Veronik Istrefaj19:07 | 30/11/2019
Presidenti i FSHF-së, Armando Duka, ka qenë i pranishëm në Bukuresht, aty ku është hedhur shorti i Euro2020. Numri një i Federatës Shqiptare të Futbollit është takuar me presidentin e UEFA-s, Ceferin, si dhe disa homologë të tij, të cilëve iu ka kërkuar ndihmë për të prekurit nga tërmeti në Shqipëri. Me shumë gjasa, kombëtarja jonë kuqezi do të luajë ndonjë miqësore luksi me një nga skaudrat e mëdha europiane dhe të ardhurat, do të shkojnë për familjet e viktimave dhe të prekurve nga tërmeti.
Postimi i FSHF-së:
Presidenti i Federatës Shqiptare të Futbollit Armand Duka e ka përdorur pjesëmarrjen në ceremoninë e hedhjes së shorteut të Euro2020, për të siguruar ndihma për zonat e prekura nga tërmeti.
Presidenti Duka, ka biseduar nga afër me Presidentin e UEFA-s Ceferin lidhur me situatën e emergjente në Shqipëri dhe i ka kërkuar mbështetjen e institucionit më të lartë të futbollit evropian. Kjo temë është diskutuar edhe me këshillëtarin e lartë të UEFA-s, ish-futbollistin legjendar portugez, Luis Figo.
Presidenti Duka ka takuar disa nga homologët e tij, Presidentë të Federatave të vendeve evropiane dhe u ka kërkuar mbështetjen e tyre. Ata kanë marrë përsipër si hap të parë të shpërndajnë thirrjen për ndihmë të Shqipërisë në vendet e tyre. /abcnews.al
Veronik Istrefaj16:27 | 23/11/2019
Zv. Kryeministri i Shqipërisë, Erion Braçe, vazhdon të bëjë polemika dhe të ketë përplasje në distancë me Federatën Shqiptare të Futbollit, si dhe me presidentin e saj, Armando Duka. Në faqen e tij zyrtare në Instagram, politikani i njohur shkroi:
MBRETI ARMANDO!
Muaji nëntor, ekipet kombëtare qe administrohen nga Presidenti i FSHF, patën ketë bilanc sportiv:
Luajtur 11 NDESHJE
Rezultatet – 9 HUMBJE, 2 BARAZIME, 0 FITORE,
6 GOLA TE SHENUAR DHE 30 GOLA TE PESUAR!
Mbreti Armando është spektakolar, për te s’ka rendësi humbja por, golat lart, pra spektakli! Ky është katalogu i frikshëm me numra i spektaklit me gola lart!
Sinqerisht, pas 7 ditësh shfaqje televizive-nisi ne 15, e fundit ka qene dje, ku mburret për vete e me sulmon mua, pret qe “ta shaj nga robt”, jo siç tifozët shajnë atë por siç ai shan tifozët!
Nuk e bej! Kam pafund respekt per njerëzit e tij, nderkohe qe ky thjesht me ben te qesh!
Shihini rezultatet e ekipeve kombetare ne vetem 17 dite!
A MUND TE MBURRET NEPER TV NJE PRESIDENT I TILLE?! Po!
Sa here qe ka bythelepires perpara, te cilet, kurre nuk flasin me te per futbollin, cilesine e rezultatet e tij, por flasin per parate!
Dhe ai tregetar eshte, per para e me para ju pergjigjet, madje i poshterron!
Po futbolli ku eshte? Mbreti Armando s’flet dot per futbollin e tij, s’ka rezultate.
Kjo eshte arsyeja qe del te thote se stadiumin Qemal Stafa e beri ai, te mbledhe merita prej tij, madje e ben aq shemtuar sa nuk i njeh asnje te tille kompanise investitore e ndertuese, punetoreve ne veper, arkitektit e grupit te inxhiniereve rreth tij, qeverise qe ishte ne thelb te projektit, FSHZH per projektin para e rreth stadiumit, bashkise Tirane per parkingun nen te etj.
Imagjinoni, eshte tamam ky qe kur nisi projekti, u sulmua e u baltos per tja treguar te paditurve qe nuk ishte nje projekt zhvillimi por grabitjeje, u fsheh, u zhduk, su pa kund, nuk foli asnjehere.
Ta shpif deri ne neveri, genjeshtra e tij se qeveria-jo une, qeveria, nuk ka dhene nje qindarke per futbollin! 2.2 miliard leke te rinj per Elbasanin, Shkodren e tani Kukesin ka dhene qeveria (jane dhe disa qindra milione paguar nga ne per palo stadiumin e Korces, lene pa paguar). I kemi dhene ekonomi, jo stadiume. Tani dua te qesh!
Dy te fundit prej tij:
1 – S’ka rendesi cilesia e futbollit, por e njerezve qe vijne ne stadium!
2 – Une ndikoj, por nje ekip i mire te mund me gjithe arbiter!
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
