cmimi

Sonte rikthehet Champions League dhe dy duelet e parë të raundit të 1/8 janë Atletico Madrid-Liverpool dhe Borussia Dortmund. Dy ndeshje shumë të forta dhe spektakolare, teksa UEFA vjen me një risi për dy ndeshjet e sotme.

Qeveria europiane e futbollit ka vendosur të shpërblejë lojtarët më të mirë të ndeshjeve. Çmimi zyrtar “Lojtari më i mirë i ndeshjes” do të jepet nga një juri e vëzhguesve teknike. Pjesëmarrja në momentet e rëndësishme të ndeshjes, pjekuria taktike, kreativiteti, frymëzimi, gjestet teknike dhe ato të ‘fair-play’, janë pikat ku do të bazohen anëtarët e jurisë për të zgjedhur më të mirët.

UEFA ka publikuar listën e ish-futbollistëve të njohur që do të jenë pjesë e jurisë vlerësuese: Cosmin Contra, Aitor Karanka, Robbie Keane, Phil Neville, Gareth Southgate, Gines Melendez janë disa prej tyre. /abcnews.al

Kryesia e Akademisë së Shkencave të Shqipërisë ka zgjedhur një ditë simbolike, ditëlindjen e 84 të shkrimtarit të njohur Ismail Kadare për ta ripropozuar para Akademisë Mbretërore të Shkencave të Suedisë si kandidat për çmimin Nobel në letërsi.

Studiuesi Shaban Sinani thotë se argumentet janë të bollshëm, jo vetëm duke renditur vlerësimet dhe nderimet përparues të tij në shkallë ndërkombëtare, por edhe rolin e pazëvendësueshëm në letrat shqipe.

Madje Sinani thotë se Akademia suedeze duhet të tërhiqet edhe nga vendimet e mëparshme. Studiuesi është i bindur se vepra “ Gjenerali i Ushtrisë së vdekur “e meriton këtë çmim”, roman i cilësuar në 50- shen më të mirë botërore.

Për Alda Bardhylin, Drejtore e Qendrës Kombëtare të Librit pranë Ministrisë së Kulturës, ditëlindjet e shkrimtarëve të mëdhenj si Kadare, janë ngjarje kulturore.

Bardhyli së shpejti pritet të botoi dy vepra në bashkëpunim me Kadarenë. Letërsia e Ismail Kadaresë lexohet tashmë në më shumë se 50 gjuhë të botës.

Anëtar i Akademisë së Shkencave Politike dhe Morale të Francës që nga viti 1995; Doctor Honoris Causa, në disa universitete me prestigj të lartë në botë, Ismail Kadare është personaliteti shqiptar më i certifikuar me tituj shkencorë, intelektualë e moralë në Europë e në shkallë globale.

Në vitin 2005 Kadare fitoi çmimin ndërkombëtar “The Man Booker” International Prize (Njeriu ndërkombëtar i vitit), i njohur si çmimi i nobelistëve, për të cilin konkurruan autorë nga të gjitha kontinentet dhe me njohje botërore. Ky është çmimi më i lartë që ka marrë letërsia shqipe qysh prej fillimeve të saj deri më sot.

Meritat letrare të Kadaresë janë të shpallura edhe në kryeqendra të tjera të letërsisë dhe kulturës botërore. Në vitin 1992 ai fitoi çmimin Prix Mondial Cino Del Duca (Mondial Sino Del Duka)(Francë). Në vitin 2009 iu dha çmimi i “Asturias”, që shënjon mirënjohjen më të lartë për gjithë letërsinë hispanike.

Në vitin 2015 shteti i Izraelit i dha çmimin “Jerusalem”, që jepet për personalitete të letërsisë me ndihmesa të jashtëzakonshme në dobi të lirisë së mendimit.

Për kontributet e tij dhënëse e pasuruese në qytetërimin europian, Ismail Kadare është nderuar me urdhrin më të lartë të Francës: Kalorës, Oficer dhe Komandant i Legjionit të Nderit.

Vlerësimet ndërkombëtare për veprën e Kadaresë jo vetëm nuk janë ndalur, por kanë kulmuar vitin e fundit.

Gjatë vitit 2019 Ismail Kadare u shpall fitues i tri prej çmimeve më të rëndësishme letrare dhe intelektuale në shkallë botërore: në Shtetet e Bashkuara të Amerikës ai mori trofeun Neustadt (Njustad), që konsiderohet Nobeli i Amerikës.

Me çmimin Pak Kyongni (Pak Knjonjí), që iu dorëzua në Korenë e Jugut, Kadare mori një prej vlerësimeve më të larta në një anë tjetër të globit, në Azi, duke e shtrirë në mënyrë sovrane përmasën e veprës së vet në shkallë botërore.

Mirënjohja e tretë e vitit 2019 iu kushtua sërish nga vendi që e promovoi për herë të parë si shkrimtar europian, nga Franca./abcnews.al

Pas votimim në vitin 2018 të Këshillit Bashkiak Vlorë, për rritjen e çmimit të ujit Enti Rregullator i Ujit ka miratuar ndryshimin e tarifave në dhjetor të 2019. Çmimi i ujit është rritur nga 30 lekë për metër kub në 45. Banorët ankohen për faturat e majme me të cilat u përballën teksa shkuan t’i paguanin.

“Tani është dimër nuk kemi tka për të vaditur, nuk e marr vesh. Tani taksa këtu, taksa atje”, thotë një prej qytetarëve.

Në shumë zona të Vlorë uji nga rrjeti vjen me orare të kufizuara dhe kjo sipas kësaj zonje nuk justifikon çmimin e rritur.

“Nuk kemi ujë, jemi lagjia te “Kinoteatri”, thotë ajo.

Kjo ankesë është reale për sa kohë në qytet qarkullojnë autobote që shpërndajnë ujin, njerëzit me shishe të blear në dyqane dhe taracat janë plot e përplot me depozita.

Uji i pijshëm në Qarkun Vlorë duke nisur nga muaji dhjetor tarifohet për familjarë me 45 lek për m3, ndërsa biznesi me 100 lekë për m3./abcnews.al

Nga Enkel Demi

Unë nuk marr pjesë nëpër konkurse. Prej tyre kam një farë droje. I kam thënë para do ditësh një shkrimtareje:

“Nuk më pëlqen të marr pjesë në konkurse, sepse po nuk fitova më duket se më kanë ngrënë hakun, ama po fitova më ngjan se u kam hyrë në hak të tjerëve”.

Kjo duhet të jetë arsyeja kryesore, e cila më ka shtyrë mos të pranoj që librat e mi të marrin pjesë nëpër gara a çmime.

Por, kësaj here, për këtë Çmim që është më i rëndësishmi për letërsinë shqipe, nuk varej nga dëshira ime.

Anëtarët e këtij komisioni nuk përzgjedhin, por lexojnë autorët e vitit, ndaj në një rast të këtillë mua më bie ose të plotësojë këtë kokëfortësi timen dhe të mos e qas çmimin, ose ta marr këtë Çmim dhe ta çmoj shumë për peshën që ka.

Patjetër që do marr çmimin, sepse vetëm fakti që Brikena Çabej, Visar Zhiti, Dhurata Shehri, Riza Braholli dhe Alda Bardhyli kanë lexuar librin tim më del e më tepron.

Unë shkruaj që të më lexojnë, ndaj sot jam këtu me sedër të përkëdhelur, sepse në radhë të parë më keni lexuar dhe keni vajtur akoma më tej pritshmërisë sime; më keni vlerësuar kaq shumë.

Ju faleminderit nga zemra dhe padyshim që ndjehem në borxh me ju.

Por, ja ku po ju them, se sapo rrëfeva një gjë, për të cilën qëllon të më pyesin. Më thonë: “Pse shkruan ti?”. Unë paskam një përgjigje; shkruaj që të më lexojnë.

Unë dikur shkruaja, se të gjithë shkruanin dhe të gjithë do merrnim Çmimin Nobel. Meqë dhe unë isha një nga këta mëtonjësit e Nobelit, nuk arrita kurrë as tek gazeta e murit e gjimnazit. Madje, tek gazeta “Zëri i Rinisë” një shkrimtar shumë i njohur nuk botoi ç’i paraqita me zemër në dorë dhe padyshim do ketë patur të drejtë.

Por, gjithsesi unë shkruaja, sepse babës që më mësoi të lexoja libra, dëshiroja t’i rrija përballë nga ana tjetër, nga soji i shkrimtarit. Ai lexoi gjithë copat e letrave që i dhashë, përherë buzëqeshi, por pastaj vdiq.

Nuk më tha kurrë një fjalë zhgënjyese, prandaj unë vazhdova të shkruaja për një lexues të vdekur. Kjo ndoshta ma ka bërë udhën e shkrimit në vetmi shumë të gjatë, por dikur më lodhi. Rrëfimet e mia kishin nevojë për të gjallë.

Ndaj sot shkruaj për Jonin dhe Hanën, fëmijët e mi, të cilët janë këtu sot. Falë Zotit unë, baba e tyre do kem diçka për t’u lënë, atëherë kur të shkoj tek baba im.

Shkruaj për nanën time që më këndon atë shqipe të vjetër sa bota, e cila ka mbirë në rrëfimin tim.

Shkruaj për hallën time që më tregon këtë fis të marrë, në të cilin bëj pjesë.

Shkruaj, se kam gjetur një mënyrë të këtillë për të dashuruar gruan time.

Shkruaj, se dëshiroj që ju të më lexoni. Po ma bëtë këtë nder do ju jem përherë mirënjohës.

Por, ndoshta ka me mijëra arsye përse unë shkruaj dhe duhet të shkruaj, arsye të cilat unë nuk i di, nuk i njoh, prandaj shkruaj që t’i zbuloj deri sa të kem frymë.

Janë këto arsye të tjera, të panjohura që më bëjnë të pasigurtë, prandaj kur më pyesin: “Përse shkruan?”. Unë përgjigjem shkurt: “Nuk e di përse shkruaj”.

Sot, ma keni bërë zemrën mal dhe për ca kohë njeri me fletë, derisa të ulem sërish para kompjuterit tim.

* Fjala e mbajtur me rastin e marrjes së Çmimit Kombëtar të Letërsisë për romanin “Gurët e vetmisë” të Tom Kukës./abcnews.al

Pasuritë e sigurta janë në rritje pas një sulmi ajror amerikan që ka vrarë një prej udhëheqësve më të fuqishëm ushtarak të Iranit.

Çmimi për arin gjithashtu po arrin nivele historike gjashtëmujore në rreth 1.546 dollarë për ons, një rritje për më shumë se 1%.

Argjendi gjithashtu është rritur me gati 1%, së bashku me platinin dhe palladiumin gjithashtu janë rritur në vlerë.

Nota e Thesarit 10-vjeçare e SH.B.A. gjithashtu u zhvendos papritmas, duke rënë në rendimentin e saj më të ulët për gati tre javë me 1.83%. Çuditërisht, nafta ka rritur vlerën e saj, pasi shqetësimi ngrihet për ndërprerjen e mundshme të furnizimit. Një kërkesë e papritur për pasuritë e sigurta erdhi pasi Presidenti Donald Trump urdhëroi një sulm ndaj gjeneralit të Iranit Qasem Soleimani, kreu i Forcës elitare të Qudsit Revolucionar Iranian. Pentagoni ka konfirmuar se Soleimani u vra herët të premten nga një sulm ajror amerikan në makinën e tij në aeroportin e Bagdadit.

Vdekja e gjeneralit shënon një përshkallëzim në tensionet midis Teheranit dhe Uashingtonit dhe ngre pasiguri mbi stabilitetin e Lindjes së Mesme. Udhëheqësi suprem i Iranit, Ayatollah Ali Khamenei është zotuar për “hakmarrje të rëndë”./abcnews.al

Akademiku Shaban Sinani në një intervistë për ABC News thotë se Shqipëria refuzoi pjesëmarrjen në ceremoninë e çmimit “Nobel”, pasi çmimit më të rëndësishëm të letërsisë i është cenuar morali, duke vlerësuar një ithtar të masakrave të Millosheviçit.

Akademia suedeze dhe juria e çmimit Nobel në këndvështrimin e sekretarit shkencor të albanologjisë ne akademinë e shkencave të Shqipërisë.

Shaban Sinani i është cënuar morali duke vlerësuar shkrimtarin austriak Peter Handke.

Akademiku dhe studiuesi i njohur, ishte i bindur që në krye të herës, se juria nuk do të tërhiqej nga përzgjedhja e saj edhe pse do ishte zgjidhje ideale, për t’i rikthyer vlerën morale çmimit më të rëndësishëm të letërsisë.

Sinani thotë se Peter Handke, ka hasur në kritika edhe nga opinioni publik në Serbi dhe në disa vende europiane për gjuhen e urrejtjes.

Ajo çfarë është shqetësuese sipas Sinanit është rikonfirmimi i qëndrimit të tij edhe me shkrim, për mos njohjen e krimeve të Millosheviçit.

Absurdi i çmimit “Nobel” sipas Shaban Sinanit është që në gjenezë.

Akademia e Shkencave të Shqipërisë që prej vitit 1991 , ka propozuar sistematikisht shkrimtarin e njohur botërisht Ismail Kadare, por për herë të parë shkrimtari i shquar shqiptar për këtë çmim është propozuar nga Franca thekson Sinani.

Çmimi “Nobel” është çmimi më i rëndësishëm për letërsinë dhe ëndrra e shumë shkrimtarëve./abcnews.al

Në Sarajevë nën organizim e “Shoqatës së viktimave dhe dëshmitarëve të genocidit në Bosnjë e Hercegovinë”, qytetarët kanë zhvilluar një protestë para Ambasadës së Suedisë kundër vendimit që vlerësoi me çmimin Nobel në letërsi shkrimtarin austriak Peter Handke.

Protestuesit mbanin fotografi në të cilat shihej se si Handke kishte qëndruar në qytetin e Srebrenicës në verën e vitit 1996, gati një vit pasi atje forcat ushtarako-policore dhe paraushtarake serbe kishin kryer një masakër duke lënë të vrarë disa mijra civilë boshnjakë.

Agjencitë e lajmeve raportojnë se protestuesit kanë ngritur zërin kundër dhënies së çmimit Nobel për Piter Handken duke thënë se kjo është njësoj sikur ai t’I ishte akorduar presidentit serb Slobodan Milosheviq të cilin shkrimtari austriak e pati mbështetur:

‘Çmimin kanë mundur t’ia japin edhe Karxhiqit dhe Mladiqit dhe të gjithë atyre të cilët bënë krime mbi myslimanët,’ – tha Munira Subashiq nga shoqata ‘Nënat e Srebrenicës’ e cila në ambasadën e Suedisë në Sarajevë dorëzoi një letër në për Mbretin dhe Mbretëreshën e këtij vendi kur tërhiqet vërejtja se çmimi i është dhënë dikujt që ka mbështetur krimin./abcnews.al

Shoqata e Arkitektëve të Shqipërisë ka nderuar Petraq Kolevicën me çmimin “Mjeshtër në Arkitekturë” ky është një vlerësim për Petraq Kolevicën, si një ndër arkitektët me kontribute e vlera të mëdha në gjenezën e Arkitekturës Moderne Shqiptare të shekullit të XX.

Në hollin e Art Turbinës ku u mbajt edhe ceremonia u ekspozuan edhe disa prej projekteve të mjeshtrit të Arkitekturës.

Petraq Kolevica krahas kontributit në arkitekturë njihet edhe si figurë e vyer e kulturës shqiptare njohës i artit vizual, përkthyes i vyer i Letërsisë Botërore, poet dhe autor i disa librave edhe të karakterit biografik, ai është sot një ikonë shqiptare të shekullit të XX. /abcnews.al

Shkrimtari i njohur Ismail Kadare nderohet me çmimin prestigjioz ndërkombëtar Pak Kyong-ni për vitin 2019. Çmimi do t’i dorëzohet shkrimtarit më 26 Tetor në Korenë e Jugut, me një ceremoni të veçantë.

Ismail Kadare tha se ishte i lumtur që nderohej me çmimin prestigjioz. Duke iu përgjigjur interesimit të gazetarëve koreano-jugorë në Qendrën e Shtypit në Seul, Kadare u shpreh edhe për fituesin e Nobelit në Letërsi për vitin 2019, shkrimtarin Peter Handke. Ai tha se është dakord me mendimin e shumë kritikëve të tjerë se Akademia Suedeze nuk duhet t’ia kishte dhënë këtë çmim.

“E njoh personalisht Handken dhe kam ngrënë drekë me të disa herë. Mendoj se ekziston një vijë që letërsia nuk duhet ta kalojë, por Handke e kaloi atë. Vrasja nuk duhet të pranohet nën asnjë rrethanë”.

Kadare tha se ka qenë vetë viktimë e censurës dhe shtypjes së qeverisë dhe se kjo mund ta ketë bërë të jetë kaq i ndjeshëm ndaj kësaj çështjeje. Ai u shpreh se “Shqipëria ka qenë një ndër vendet më të izoluara në Evropë, një vend komunist nën diktaturë.”

“Shumica e shkrimtarëve në atë kohë ishin të censuruar nga qeveria. Në Kushtetutë thuhej se nuk mund të shprehje mendime nëse ato ishin kundër regjimit. Shumë nga shkrimtarët ishin në situata të rrezikshme dhe disa u burgosën. Jeta ime është e vetëm njëra nga ato mijëra raste” .

Çmimi Pak Kyong-ni do t’i dorëzohet Ismail Kadaresë më 26 tetor në qytetin Wonju të provincës Gangwon. Ky është çmimi i vetëm ndërkombëtar letrar që Koreja e Jugut u jep shkrimtarëve./ABC News Albania

Kryeministri i Etiopisë Ahmed Ali ka marrë cmimin Nobel për paqe të këtij viti, për përpjekjet e tij në rivendosjen e paqes në very – lindje të Afrikës. Si dhe për vendimin për të zgjidhur mosmarrëveshjet për kufirin me Eritrenë.

Komiteti norvegjez për Nobel 2019 i ka dhënë Nobel-in për paqe kryeministrit të Etiopisë Abi Ahmed Ali, autor i një marrëveshjeje historike për paqen me Eritrenë fqine pas më shumë se 30 vitesh konflikt.

Cmimi është një mirënjohje për të gjithë protagonistët që punojnë për paqen dhe pajtimin në Etiopi dhe në rajonet e Afrikës lindore dhe very-lindore.

Kur Ahmed u bë kryeministër në prill të 2018-ës, ai shprehu qartë dëshirën për rifillimin e bisedimeve për paqe me Eritrenë. Në bashkëpunim me homologun e tij nga Eritrea ai hartoi në mënyrë të shpejtë një marrëveshje paqeje për t’I dhënë fund ngërcit mes dy vendeve.

Në Etiopi, dhe pse ka ende shumë punë për të bërë, Ahmed ka ndërmarrë një sërë reformash të rëndësishme të cilat u japin shumë qytetarëve shpresën për një jetë më të mirë dhe një të ardhme të sigurtë.

Në 100 ditët e tij të para si kryeministër ai anuloi gjendjen e jashtëzakonshme të shpallur në vend duke i dhënë amnisti mijëra të burgosurve politikë; ndërpreu censurën mediatike dhe ligjëroi grupet e opozitës duke pezulluar nga postet liderë ushtarakë dhe civilë të akuzuar për korrupsion. Ai gjithashtu rriti në mënyrë domethënëse influencën e grave në jetën politike dhe të komunitetit. Por përforcoi dhe demokracinë duke organizuar zgjedhje të lira.

Janë të shumtë ata që mendojnë se këtë vit cmimi Nobel për paqe është dhënë shumë shpejt por komiteti norvegjez thekson se përpjekjet e kryeministrit të Etiopisë meritojnë mirënjihje dhe kanë nevojë për inkurajim.

Etiopia është vendi i dytë më i populluar i Afrikës dhe ekonomia më e madhe e Afrikës Lindore. Një Etiopi paqësore, e qëndrueshme dhe e suksesshme do të ketë shumë pasoja positive dhe do të kontribuojë në përforcimin e vëllazërisë mes kombeve dhe popujve të rajonit.

Ishin 301 kandidatët për cmimin Nobel këtë vit, 223 individë dhe 78 organizata, rregullorja parashikon se këta emra duhet të qëndrojnë secret për 50 vitet e ardhshme./ABC News Albania 24/7

Older Posts

cmimi
COVID19 test and laboratory sample of blood testing for diagnosis new Corona virus infection

Risia e Champions League, UEFA formon juri profesioniste për çmimin

Në 84 vjetorin e shkrimtarit Ismail Kadare, Akademia e Shkencave e ripropozon për çmimin Nobel

Rritet çmimi i ujit në Vlorë, banorët ankohen për faturat e majme

Përse shkruaj?

Vrasja e Soleimanit, luhatje të fuqishme të çmimit të arit dhe naftës

Shaban Sinani: Çmimit “Nobel” i është cënuar morali me Peter Handke

Sarajeve, protestë para ambasadës së Suedisë kundër çmimit Nobel

Petraq Kolevica nderohet me çmimin “Mjeshtër në arkitekturë”

Ismail Kadare nderohet me çmim tjetër ndërkombëtar për letërsinë

Çmimi “Nobel” për paqen i jepet kryeministrit të Etiopisë

E rëndë, i infektuar me COVID 19 humb jetën 1 vjeçari në SHBA

Rritet numri i viktimave ne Greqi, mbi 1 mijë persona konfirmohen me koronairus

Kthjellime dhe vranësira kalimtare, parashikimi i motit për sot