andi lila
Veronik Istrefaj19:17 | 28/03/2020
Sindikata e Futbollistëve Profesionistë të Shqipërisë, drejtuar nga Andi Lila, mbështet plotësisht kërkesën e FSHF-së për ndihmë drejtuar qeverisë. Me anë të një komunikate zyrtare, SFPSH kërkon që edhe Kategoria e Parë, Kategoria e Dytë dhe futbolli i femrave, të përfshihen si subjekte që do të përfitojnë kompensime.
“Sindikata e Futbollistëve Profesionistë të Shqipërisë, mbështet plotësisht kërkesën e bërë nga ana e FSHF-së dhe Ligës Profesioniste të Futbollit, drejtuar zotit Kryeministër dhe Këshillit të Ministrave, që: ‘Të përfshihen futbollistët dhe stafet e ekipeve të Superligës Shqiptare në listën e subjekteve që do të kompensohen nga dëmet e shkaktuara nga pandemia COVID-19’.
Gjithashtu, Sindikata e Futbollistëve Profesionistë të Shqipërisë, kërkon që në kategoritë përfituese të përfshihen edhe futbollistët dhe stafet e ekipeve të Kategorisë së Parë, së Dytë dhe futbollistet femra, që kanë kontratë të rregullt punësimi në një Klub Futbolli Shqiptar, që merr pjesë në kampionatin e organizuar nga FSHF, pasi dhe kjo Kategori është goditur shumë fort nga kjo pandemi”, shkruhej në kërkesën e Sindikatës së Futbollistëve./abcnews.al
Vladimir Prenga12:14 | 22/03/2020
Sindikata e Futbollistëve Profesionistë Shqiptarë i ka bërë një surprizë të bukur ish-futbollistit Altin Rrica, të cilit i ka dhuruar një shtëpi me të ardhurat e grumbulluara nga ndeshja miqësore mes ish-lojtarëve të Shqipërisë, Greqisë, Italisë dhe Turqisë.
Andi Lila, president i Sindikatës, i ka dhuruar çelësat e shtëpisë Altinit, i cili tashmë do të ketë një vend të ngrohtë ku tq qëndrojë. Ish-lojtari i Besës, Tiranës, Partizanit dhe Luftëtarit, ndër të tjera është edhe i paralizuar.
Një aksident në liqenin e Ohrit, në vitin 2000, bëri që ai ta mbyllte me futbollin e luajtur në moshën 27-vjeçare. Një karrierë e lënë në mes dhe më pas sigurisht gjërat nuk kanë qenë të lehta për kavajasin, i cili ka provuar të veshë edhe fanellën e kombëtares së madhe. Rrica tanimë mund të buzëqeshë, pasi kolegë të tij zgjodhën pikërisht atë për ta ndihmuar. /abcnews.al
Vladimir Prenga09:34 | 21/03/2020
Andi Lila është krah futbollistëve dhe pret që ata të paguhen nga klubet. Kreu i Sindikatës së Futbollistëve Profesionistë Shqiptarë, në një lidhje me emisionin “Fan Zone” në Supersport 1, foli në lidhje me ccështjen e pagesave në këtë moment që futbolli ka ndalur prej Coronavirusit.
“Është e rëndësishme për futbollin shqiptar, se ai europian është ndryshe. Futbolli shqiptar është ndryshe me Europën, një muaj jo i paguar në Shqipëri është problem i madh për futbollistët profesionistë”, është shprehur Lila.
“Firmosni ose largohuni”, klubi zviceran largon Lenjanin dhe 8 të tjerë
Më tej i është përmendur rasti i Sion, që vendosi të largonte 9 lojtarët më të paguar. “Nuk më duket normale shkarkimi i lojtarëve. Çdo futbollist ka rënë parimisht dakord me presidentin përpara për kushtet financiare. Ai nuk mund të marrë vendim të përgjithshëm, duhet të ulet individualisht e të bisedojë me çdo lojtar.
Nuk mund të veprojë sipas mendjes së tij. Secili mund të sensibilizohet vetë, gjysmën e rrogës e jep për bamirësi, t’i quhet futbollistit e jo presidentit”, shton Lila, i cili e konsideron një sjellje shumë shqetësuese atë të klubit zviceran.
Nëse do të ndodhte në Shqipëri, do të ishte edhe më shumë problem dhe mendimin që dha në fillim ai e përforcon edhe më shumë: “Për mendimin tim, një sjellje e tillë është problem shumë i madh për kampionatin shqiptar. Futbollistët duhet të paguhen normalisht, pasi është shumë e vështirë situata”. /abcnews.al
Igli Nikolli17:54 | 05/03/2020
Sindikata e Futbollistëve Profesionistë Shqiptarë (SFPSH) është gati për një suprizë. Me anë të një postimi në rrjetet sociale, kreu i saj, Andi Lila, zbulon se ka nisur rindërtimi pas tërmetit të 26 nëntorit dhe me datë 14 mars do të merret vesh surpriza për një ish-futbollist shqiptar.
“Luajtëm dhe po rindërtojmë! Me 14 mars 2020 do të jetë një surprizë mbresëlënëse për një ish futbollist që e kishin harruar për 20 vite,sindikata do te jetë gjithmonë dhe në çdo kohë te ndihmoje futbollistet dhe ish futbollistët ne nevoje. Misioni ka filluar“, lexohet në postimin e SFPSH.
Kjo e fundit organizoi Ndeshjen e Solidaritetit me 10 janar. Në “Air Albania” zbritën ish-lojtarë të Shqipërisë, Italisë, Greqisë dhe Turqisë, teksa të ardhurat e përfituara nga biletat do të shkojnë për të prekurit nga tërmeti që goditi Shqipërinë. /abcnews.al
Vladimir Prenga15:27 | 26/02/2020
Sindikata e Futbollistëve Profesionistë Shqiptarë, ka dalë sot me një njoftim ku bën me dije se i ka dorëzuar FSHF-së kontratën kolektive, që ata e shohin si pikënisje për mbrojtjen e të drejtave të futbollistëve. Përmes faqes zyrtare në “Instagram”, S.F.P.Sh publikon edhe kërkesën e bërë ditën e sotme.
“Sot Sindikata e futbollistëve nisi procedurat ligjore për lidhjen e kontratës kolektive, ndërmjet Federatës Shqiptare të futbollit dhe Sindikatës.
Me besim në Zot se kjo kontratë kolektive do të jetë guri i themelit për mbrojtjen e të drejtave të futbollistëve, shpresojmë dhe urojmë që për të mirën e futbollit, kjo kontratë të miratohet në mbledhjen e radhës së Asamblesë të Përgjithshme të FSHF”, shkruan Sindikata e Futbollistëve Profesionistë Shqiptarë. /abcnews.al
Vladimir Prenga15:29 | 19/02/2020
Sindikata e Futbollistëve Profesionistë Shqiptarë ka dalë me një njoftim të rëndësishëm për ata lojtarë që kanë fituar gjyqet në FIFA apo FSHF për pagat e padhëna. Synimi është të përfitohet nga fondi që FIFPro do të ketë për lojtarët me probleme në klubet e mëparshme.
“Të nderuar kolegë futbollistë. Siç jeni në dijeni, Sindikata Botërore e Futbollistëve Profesionistë, FIFPro, ka arritur një marrëveshje me FIFA-n për të lëvruar një fond me anë të cilit do të perballohen një pjesë e pagave të padhëna të Futbollistëve.
Me qëllim që edhe futbollistët shqiptar të mund të përfitojnë nga ky fond, kërkojmë nga ana juaj që të na vini në dispozicion vendimet me anë të cilave keni fituar gjygjet në FSHF ose FIFA për pagat e padhena, bashkë me një kërkesë të bërë nga ana juaj, ku të përcaktoni vlerën e detyrimit që klubet e futbollit kanë ndaj jush.
Këto dokumenta do të dërgohen nga ana jonë në departamentin përkatës të FIFPro, i cili më pas në bashkepunim me FIFA-n do të përcaktojnë edhe fondet që mund të vihen në dispozicion të Shqiperisë për të shlyer pagat e padhena të futbollisteve.
Duke ju falënderuar të gjithëve paraprakisht për bashkëpunimin, ju uroj suksese, mbarësi në familjet tuaja. Me respekt Andi Lila”, shkruhet në njoftimin e bërë nga Sindikata e Futbollistëve Profesionistë Shqiptarë. / abcnews.al
Vladimir Prenga16:04 | 16/01/2020
Sindikata e Futbollistëve Profesionistë Shqiptarë ka dalë me një deklaratë ku bën me dije shifrën e grumbulluar nga aktiviteti i 11 janarit, zhvilluar në “Air Albania Stadium”. Rreth 56 milionë lekë të vjetra janë arkëtuar nga shitja e biletave dhe SFPSH ka edhe disa falënderime për të bërë.
“Sindikata e Futbollistëve Profesioniste Shqiptarë informon më shumë kënaqësi se ka përfunduar procesi i arkëtimit të të ardhurave nga shitja e biletave për turneun miqësor që zhvilluam këtë janar në kuadër të mbledhjes së fondeve për bamirësi, me qëllim ndihmën e komunitetit të prekur nga tërmeti i rëndë që ra në vendin tonë në nëntor.
Shuma totale e përfituar nga ata që ishin atë ditë të pranishëm në stadium është 5.591.775 lekë të reja. Duke dashur të falënderojmë edhe njëherë atë pjesë të publikut që e ndjeu dhe qëndroi atë ditë nëpër shkallë, një falënderim i ngrohtë i shkon të gjithë sindikatave homologe që erdhën e morën pjesë, ashtu sikundër duhet të përshëndesim të gjithë ish-lojtarët e Kombëtares që kontribuuan në këtë event me shpenzimet e tyre dhe padiskutim Federatën Shqiptare të Futbollit që mundësoi impiantin për të ofruar një mbrëmje sa më komode.
Sindikata e Futbollisteve kërkon të informoje të gjithë opinionin publik, që transparenca në lidhje me fondet do jetë një detyrim kryesor i yni dhe në ditët në vijim do informojmë zyrtarisht se në cilën zonë dhe konkretisht në cilat ndërtesa do ndihmojmë me rindërtim apo rikonstruksione të ndryshme.
Duke e ditur fort mirë se ndoshta mungesa e përvojës na ka bërë të mos jemi brilant në këtë organizim të parë, premtojmë që do jemi gjithnjë e më të kujdesshëm për të mos prodhuar polemika e diskutime, por njëherazi kërkojmë nga të gjithë ju me shumë mirëkuptim, duke pasur parasysh që në fund të fundit ishim aty për të dhënë dhe ne kontributin tonë për një pjesë të popullit, që ende vuan dhe lëngon nga dhimbja që shkaktoi ajo fatkeqësi natyrore. Zoti na bekoftë!”, shkruhet në komunikatën e SFPSH. /abcnews.al
Igli Nikolli20:51 | 10/01/2020
Andi Lila ndihet në qiellin e shtatë dhe nuk i kursen batutat në prononcimin e dhënë për Supersport. Kreu i Sindikatës së Futbollistëve Profesionistë Shqiptarë (SFPSH) organizoi në bashkëpunim me FSHF-në evenimentin e solidaritetit.
“Të jem i sinqertë, jam më shumë sesa i kënaqur. Në këtë moment më duket vetja 3 cm më i gjatë. Në radhë të parë falënderoj gjithë bashkëpunëtorët e mi, vullnetarët. Falënderoj nga zemra edhe FSHF-në, që ishte mbështetësja jonë kryesore.
Ishte një ndeshje vëllazërore. Ndeshja e miqësisë, vëllazërisë, solidaritetit dhe gjithçkaje. Ishte projekti im i parë, jam i lumtur. Më vjen turp të qaj, por nuk do qaj. Akoma nuk kam shifra, shpresoj të jenë mbi 10 mijë tifozë të pranishëm. Nuk dua të gaboj, do dalim me shifra ekzakte. Shpresoj që kjo ndeshje ia arriti qëllimit.
Nuk di nga t’ia nis. Normalisht duhet të më ftoni në një emision tjetër, të shtunën do të vi. Goli më i bukur i jetës time? Them se po. Jam shumë i lumtur. Vetëm do isha askushi, nuk mund të bëjë asgjë. Falënderoj vullnetarët dhe ekipet pjesëmarrëse, edhe ekipi jonë ishte profesionist. Edhe ato që kanë thënë ndonjë fjalë kanë qenë idhujt e mi dhe i falënderoj“, përfundon Andi Lila. /abcnews.al
Veronik Istrefaj13:05 | 10/01/2020
Sot në orën 18:00, do të luhet sfida miqësore mes yjeve, në “Air Albania Stadium”. Në këtë takim, e quajtur si Ndeshja e Yjeve, do të jenë shumë figura të njohura të sportit. Disa nga emrat e yjeve shqiptarë që do marrin pjesë në këtë aktivitet janë: Cana, Murati, Strakosha, Bogdani, Duro, Raklli, Hasi, Bejqaj, Tare.
Para kësaj sfide, shumë nga këto personalitete të sportit kanë vizituar disa nga zonat e prekura nga tërmeti dhe këtë vizitë, e ka transmetuar Andi Lila, në Instagramin e tij zyrtar. I pranishëm ishte edhe ish-trajneri i kombëtares shqiptare të futbollit, Gianni De Biasi./abcnews.al
Vladimir Prenga17:37 | 05/01/2020
“Luajmë dhe rindërtojmë së bashku”. Me këtë moto zbresin në fushë ish-lojtarë të kombëtares shqiptare më 10 mars, ndërkohë që në këtë ndeshje solidariteti do të marrin pjesë edhe futbollistë të Italisë kampione bote të vitit 2006, kampionë Europe me Greqinë në vitin 2004 dhe ish-lojtarë të Turqisë, që në vitin 2002 u rendit e treta në Kampionatin Botëror.
Andi Lila, përmes një pyetësori në Instagram ka zbuluar detaje të shumta nga ky aktiviteti. “Dy gjysmëfinalet do të jenë nga 35 minuta, më pas luhet finalja”, tregon kavajasi, i cili pyetet edhe për emra të përveçëm të kombëtares sonë. Dy prej tyre do jenë të ftuar nderi. “Agustin Kola dhe Geri Çipi do të jetë të ftuar nderi në stadium”, thotë Lila.
Ai nuk do të aktivizohet vetë: “Po luajnë më të mirët, ato që vendosën themelet e një kombëtareje kaq të fortë”. Pritet gjithashtu një përgjigje nga Bledar Kola: “Është i ftuar, por presim përgjigjen përfundimtare. Bledar Kola është pjesëtar i Golden Team Albania”.
I ngacmuar mbi shanset e kalimit të Shqipërisë në finale, Lila shton: “Uroj që të ketë spektakël dhe të fitojë më i miri. Të kënaqemi të gjithë dhe të bëjmë disa familje të lumtura me rindërtimin e shtëpive. Të gjithë në stadium për një qëllim të jashtë zakonshëm”.
Më ai zbulon edhe të tjera detaje: “Ndeshja do transmetohet në Supersport, kurse Gianni De Biasi do të jetë trajner i Italisë. Del Piero? Presim Robi Baggio”.
LOJTARËT E SHQIPËRISË – Dje Lila ka zbuluar edhe listën e lojtarëve të kombëtares shqiptare që do të jenë në këtë ndeshje. Ka edhe përjashtime, pasi në listë janë përfshirë edhe dy shqiptarë të Maqedonisë së Veriut, Nderim Nexhipi dhe Artim Shaqiri.
Lista e publikuar nga Lila është si më poshtë: Foto Strakosha, Lorik Cana, Edvin Murati, Alban Bushi, Igli Tare, Altin Lala, Besnik Hasi, Altin Rraklli, Erjon Bogdani, Arjan Beqaj, Artim Shaqiri, Klodian Duro, Ervin Bulku, Armend Dallku, Nevil Dede, Debatik Curri, Hamdi Salihi, Redi Jupi, Nderim Nexhipi dhe Adrian Aliaj. Trajner i kuqezinjve do të jetë Ilir Shulku, Sekretari i Përgjithshëm i Federatës Shqiptare të Futbollit. /abcneës.al
Sindikata e Futbollistëve dhe FSHF kanë organizuar gjithçka dhe ndeshja do të zhvillohet në “Air Albania Stadium”, prej orës 18:00. Së fundmi janë publikuar edhe çmimet e biletave, që variojnë nga 500 lekë në 10000 lekë në tribunën VIP.
Të ardhurat nga shitja e biletave do të shkojnë për familjet e prekura nga tërmeti i 26 nëntorit. Shitja e biletave ka nisur dhe pikat e shitjes janë te biletaria e stadiumit “Selman Stërmasi” dhe në dyqanin zyrtar të FSHF. /abcnews.al
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
