Endri Çekiçi mund të ndryshojë skuadër këtë verë dhe të kalojë në një kampionat më të fortë. Mesfushori i avancuar i Olimpije Ljubjana ka po shkëlqen në Slloveni, teksa ka shënuar tetë gola deri më tani në kampionat dhe ka asistuar shtatë herë.
Është folur edhe më parë për pista spanjolle dhe janë dy ekipe që e ndjekin pogradecarin. Gjithashtu për të ka interes edhe nga Polonia e Italia, por së fundmi në Slloveni zbulojnë një nga opsionet më të bujshme për të ardhmen e Çekiçit.
24ur, në Slloveni, raporton se mesfushori mund të transferohet në Premier League dhe skuadra që pritet të paguajë miliona euro – shifra nuk bëhet e ditur – është Arsenali. Një klub i madh dhe për Çekiçin sigurisht që do të ishte një hap i madh, nëse do të bëhet një lëvizje e tillë.
Në Premier League janë të paktë lojtarët shqiptarë, por së fundmi atje ka debutuar Armando Broja, sulmuesi i Chelsea dhe i Shqipërisë U21, i cili së shpejti pritet të bashkohet me kombëtaren A. Çekiçi është në pritje të zhvillimeve të reja në merkato dhe kalimi në kampionatin anglez për të do të ishte një mrekulli. /abcnews.al
