Nis sot rrugëtimin emisioni më i ri në ABC, “Log.”.
Nën drejtimin e gazetarit Endri Xhafo, herë në intervistë tek e tek, si një intervistë e thelluar, e herë me panele debati, Log., do të transmetohet live çdo të hënë në orën 21.00.
Puntata e sotme nis me një intervistë me Presidentin e Republikës, Ilir Meta ku fokusi do të jetë mbi akuzat për fshehjen e numrit real të të vdekurve nga koronavirusi, listat zgjedhore, por edhe çështje që kanë qenë në thelb të përplasjes maxhorancë-Presidencë, si Gjykata Kushtetuese, rrëzimi i dekreteve apo ligji për Presidentin.
View this post on Instagram
Pse “Log.”?
Log., që emërton një lëndinë të rrafshët, ku zakonisht mblidhej kuvendi i fshatit, apo që në një kuptim të dytë si “log i burrave” nënkuptonte edhe një shesh beteje, e shprehur grafisht me një pikë në fund, mund të interpretohet edhe si pjesa e parë e fjalës “logjikë”.
Synimi është nxjerra në log, pra nxerrja në pah e argumentave dhe qëndrimeve të personazheve për të gjitha temat e aktualitetit.
Një fokus i veçantë në këtë emision do t’i jepet politikës dhe politikave, që në këtë vit elektoral pritet të përcaktojnë drejtimin e vendit për katër vitet e ardhshme.
