Drejtori i sektorit të Euroazisë të Zërit të Amerikës, Elez Biberaj, doli në pension, duke i dhënë fund karrierës 43 vjeçare të tij në gazetari.
Ai ka qenë për më shumë se katër dekada, në role të ndryshme në kanalin televiziv. Biberaj e nisi karrierën e tij si gazetar radioje tek Zëri i Amerikës në shërbimin shqip, gjatë viteve 1980-1982.
Më pas ai u angazhua si Redaktor i Lartë, i specializuar në Çështjet Sovjetike dhe të Evropës Lindore në zyrën e shtypit të Agjencisë së Shteteve të Bashkuara për Informacionin.
Nga viti 1986 deri më 2004, Biberaj drejtoi shërbimin shqip të Zërit të Amerikës.
Nga 2005 e deri tani është drejtor i Drejtorisë së Euroazisë.
Për 6 muaj, nga qershori deri në dhjetor të vitit 2020, në një prej momenteve më sfiduese për Zërin e Amerikës, ai shërbeu si drejtor në detyrë i Zërit të Amerikës.
Karriera e tij e shtrihet gjatë gjashtë administratave amerikane. Ai ka qenë dëshmitar i disa prej ngjarjeve më kryesore, që nga Lufta e Ftohtë, tek rënia e komunizmit, lindja e demokracisë në ish vendet e Bashkimit Sovjetik dhe Evropës Lindore, luftërat e Ballkanit, pavarësia e Kosovës, integrimi e Evropës Lindore në institucionet Euro-Atlantike, kalimin e Rusisë drejt një regjimi autoritar dhe së fundmi sulmi i Moskës kundër Ukrainës dhe lufta Izrael-Hamas në Gazë.
/abcnews.al/
