Ekspertët i kërkojnë Bankës së Shqipërisë që të rrisin më shumë normën bazë të interesit për të stabilizuar shtrenjtimin e çmimeve. Sipas ekspertit Arjan Kadareja Banka e Shqipërisë ka paqartësi në lidhje me nivelin e inflacionit në vend, i cili pritet të kulmojë në tre muajt e fundit të këtij viti. Kadareja i bën apel qeverisë që të ndërhyjë për të mbështetur shtresat në nevojë nga shtrenjtimi i jetesës.
Banka e Shqipërisë duhet të ndërhyjë më shpejt për të stablizuar rritjen e çmimeve në vend. Eksperti Arjan Kadareja thekson se BANKA Qendrore në deklaratën e fundit nuk ka qenë e qartë në lidhje me nivelin e inflacionit në vend dhe periudhën kur pritet të kulmojë. Sipas të dhënave të Instat gjatë muajit qershor inflacioni kapi nivelin prej 7.4%, më i larti i regjistruar në dy dekada.
Eksperti i bën thirrje qeverisë që të ndërhyjë sa më parë për të mbështetur me paketa shtresat në nevojë pasi qytetarët shqiptarë nuk kanë kursime për të përballuar rritjen e çmimeve.
Rritja e normës bazë të interesit pritet të ndikojë në shtrenjtimin e kredive në vend por njëkohësisht synon të zbusë rritjen e çmimeve të produkteve që vijnë nga importi.
Karburantet dhe produktet ushqimore janë dy nëngrupet që kanë dhënë ndikimin kryesor në rritjen e nivelit të inflacionit në Shqipëri. /abcnews.al
