Nga Salih Aykac, The Fountain
Kohët e fundit kam qenë shumë i intriguar për gjendjen shpirtërore, veçanërisht se si ndryshon humori ynë. Proceset që fshihen pas arsyes se përse jemi të lumtur, të trishtuar ose të zemëruar janë pjesë përbërëse e ekzistencës sonë dhe të kesh njëfarë njohurie se si ndodh saktësisht mund të na ndihmojë të rritemi.
Masaru Emoto, është një shkencëtar japonez që i kishte kushtuar jetën studimit të ujit. Studimet e Emoto pretendojnë se mendimet, ndjenjat, fjalët, idetë, muzika, madje edhe emrat ndikojnë në strukturën molekulare të ujit dhe në këtë mënyrë realitetin tonë fizik.
Gjatë studimit të tij, Emoto zbuloi se pikat e ujit që ishin ekspozuar vazhdimisht ndaj fjalëve pozitive ose negative, ndryshonin ngjyrën, formën dhe simetrinë. Eksperimenti i tij i parë përfshinte vendosjen e ujit të distiluar në kavanoza të vegjël, shkrimin e një fjale ose fraze të shkurtër në një etiketë dhe më pas ngjitjen e asaj etikete në çdo kavanoz, raporton abcnews.al.
Kavanozët më pas liheshin në një ambjent gjatë natës. Disa nga këto fjalë kishin lidhje pozitive si “dashuria për veten”, “bukuria”, “pasioni” dhe “lumturia”. Në kavanozët e tjerë shkruhej “e keqe”, “urrejtje”. Më pas, çdo kavanoz formonte sasi të vogël uji të ngrira për të formuar kristale, të cilat më pas u vëzhguan nga një mikroskop.
Rezultatet ishin mahnitëse; fjalët pozitive formuan kristale të bukura, simetrike që dukeshin shumë të ngjashme me flokët e borës, ndërsa fjalët negative ishin të kaotike dhe të fragmentuara.
Gjetjet e tij revolucionare u botuan në librin e tij, “Mesazhi i Fshehur në Ujë” . Megjithatë, puna e Emoto u prit me kritika, skepticizëm dhe konfuzion. Disa të tjerë shprehën shqetësimin se Emoto nuk bëri mjaftueshëm për të ndarë qasjet e tij ose për të ofruar prova të mjaftueshme për eksperimentet e tij.
Ai vendosi t’i çonte eksperimentet një hap më tej dhe donte të shihte se çfarë do të ndodhte me një sasi të madhe uji për një periudhë të gjatë kohore.
“Eksperimenti i tij i famshëm i orizit” përfshinte vendosjen e së njëjtës sasi orizi në tre kavanozë të ndryshëm dhe më pas shtimin e së njëjtës sasi uji të distiluar në kavanozë.
Pastaj mbylli kavanozët dhe etiketoi secilin kavanoz me një fjalë të ndryshme. Kavanozin e parë, ai e etiketoi me frazën “Faleminderit”; kavanozi i dytë me shprehjen “Ti je një idiot”; dhe kavanozi i tretë mbeti me një etiketë bosh.
Çdo ditë, për 30 ditë, ai vizitoi secilin kavanoz dhe lexoi me zë të lartë etiketën përkatëse në kavanoz për një minutë dhe gjurmoi ndryshimet në secilin kavanoz gjatë muajit.
Nga fundi i muajit ai kishte vënë re se uji në kavanozin me etiketën “Faleminderit” kishte filluar të fermentohej, duke lëshuar një aromë të fortë dhe të këndshme. Uji në kavanozin që mbante etiketën “Ti je një idiot” u bë i zi.
Rezultati më interesant, ishte kavanozi i fundit me etiketën bosh që ishte injoruar gjatë gjithë kohës. Uji u kthye në një ngjyrë jeshile-blu. Rezultatet e tij ishin në përputhje me eksperimentet e tij të mëparshme me kavanozë më të vegjël.
U mahnita nga këto zbulime dhe mezi e besoja, ndaj vendosa ta provoja vetë. Vajza ime dhe unë bëmë të njëjtin eksperiment si pjesë e projektit të saj të panairit shkencor. Për habinë tonë, ne morëm rezultate shumë të ngjashme brenda vetëm 19 ditëve. Ky eksperiment ishte një mësim i shkëlqyeshëm në lidhje me ndikimin që fjalët tona kanë tek të tjerët për fëmijët e mi përtej të qenit thjesht një projekt panair shkencor.
Në përfundim, Emoto tha se uji është një “projekt për realitetin tonë” dhe se “energjitë” emocionale mund të ndryshojnë strukturën fizike të ujit. Është e domosdoshme të kujtojmë se uji është jetë; rreth 70% e trupit të njeriut, dhe pothuajse dy të tretat e botës, përbëhet nga uji.
Prandaj, gjithçka që ndodh rreth nesh, mendimet tona, qëndrimet tona, sjelljet tona dhe qëllimet tona janë të lidhura me njëra-tjetrën dhe mund të ndikojnë në emocionet tona.
Shkencëtarët ende duhet të kuptojnë se si saktësisht këto ndryshime mund të ndikojnë në trupin dhe botën tonë, por rezultatet janë të qarta për të gjithë.
Kjo vendos më shumë përgjegjësi mbi supet tona për të qenë qenie njerëzore të përgjegjshme. Ne duhet gjithmonë të mendojmë, të flasim dhe të veprojmë pozitivisht nëse duam që edhe mjediset tona përreth të jenë pozitive.
Ky studim na jep gjithashtu një mësim të madh për mësuesit dhe edukatorët. Ne mësuesit hasim një larmi nxënësish të moshave të ndryshme gjatë gjithë vitit shkollor. Ndërveprimet tona me ta mund të kenë një ndikim shumë real në jetën, mendjen dhe të ardhmen e tyre për mirë ose për keq.
Çdo vit na jepen rreth 25 kavanozë me oriz me ujë, që përfaqësojnë 25 nxënës, në secilën klasë pa etiketë.
Ne më pas i etiketojmë në mendjet dhe zemrat tona; nxënësit e emërtuar “kavanoz 1” marrin lëvdata dhe komplimente; disa studentë etiketohen si “kavanoz 2” dhe u thuhet se do të dështojnë ose janë shkaktarë të problemeve; ndërsa grupi i fundit emërtohet “kavanoz 3” dhe injorohet kryesisht për shkak të ndrojtjes së tyre dhe/ose indiferencës sonë.
Nëse jeni mësues ose bashkëveproni me fëmijët në mënyrë konsistente, ka më shumë gjasa të keni pasur qindra apo mijëra kavanoza deri më tani dhe tani mund të pyesni veten se sa prej tyre e kanë përfunduar vitin në formë më të mirë se fillimi i viti, raporton abcnews.al.
Sa prej tyre u etiketuan si “kavanoz 1”, “kavanoz 2” ose “kavanoz 3”?
Kur mbyll sytë dhe mendoj për të gjitha vitet që kam dhënë mësim, nuk jam i sigurt nëse kam qenë në gjendje t’i trajtoj të gjithë “kavanozët” pozitivisht.
Unë besoj se të gjithë kishin një përvojë se si toni ynë i të folurit ose përgjigjet tona ndryshuan mënyrën e diskutimit.Siç thuhet në Bibël, “përgjigjja e butë elargon zemërimin, por fjalët e hidhura shtojnë zemërimin”.
Ndonjëherë një fjalë e thjeshtë e vogël mund të ndryshojë plotësisht jetën tuaj në një mënyrë pozitive ose negative. Mënyrat tona, qëndrimet dhe gjuha që përdorim, ndikojnë te njerëzit përreth nesh dhe në shumicën e rasteve nuk jemi plotësisht të vetëdijshëm për shtrirjen e saj.
Të menduarit apo mendimet pozitive dhe negative janë ngjitëse. Kur shohim miq të lumtur rreth nesh, ditët tona janë më të bukura ose ndihemi të mërzitur kur flasim me njerëz inatçorë.
Qëndrimet pozitive, të menduarit pozitiv dhe mendimet pozitive ndryshojnë jetën tonë.
Një person që sheh të mirën në gjëra apo situata të ndryshme, zhvillon mendime të mira. Dhe ai që ka mendime të mira merr kënaqësi nga jeta. Njerëzit që mund të zhvillojnë të menduarit pozitiv do të kenë më shumë gjasa të kenë një jetë të shëndetshme, të lumtur dhe të suksesshme dhe ata mund t’i kapërcejnë më lehtë vështirësitë.
Nëse dëshironi të keni një mjedis të shëndetshëm, të bukur, të ngrohtë, produktiv dhe që të jep një kohë të këndshme, duhet të përdorni një gjuhë pozitive, inkurajuese dhe të butë për ta realizuar atë. Është në duart tona të përmirësojmë botën tonë me dashuri dhe mirënjohje. Mendimet pozitive çojnë në ndjenja të mira, vepra të mira dhe pakësojnë negativitetin, na bëjnë më të lumtur.
Ndërsa mendimet negative gjenerojnë ndjenja të këqija, urrejtje, xhelozi, zemërim, depresion, stres dhe emocione negative të cilat na mjegullojnë shpirtin dhe na çojnë në një jetë jo të shëndetshme. Për të qenë në gjendje të qëndrojmë të shëndetshëm emocionalisht dhe psikologjikisht, duhet të mendojmë pozitivisht.
Profeti Muhamed, i Dërguari i Zotit (paqja qoftë mbi të) ka thënë: “Veprën e keqe pasoje me vepër të mirë, dhe ajo do ta fshijë atë”.
Ne mund të mos kemi kontroll të plotë fillimisht mbi llojet e mendimeve që kalojnë në mendjen tonë çdo moment, megjithatë ne kemi aftësinë t’i shpërfillim ose t’i ndjekim ato siç është përshkruar nga Profeti: “Kushdo që beson në Zot dhe në ditën e fundit, le të flasë mirë ose le të heshtë.”
/abcnews.al
