Nga Mero Baze
Të gjithë ata opozitarë që shpresonin tek “revolucioni” tani duhet të shpresojnë tek Gazment Bardhi. Vendosmëria e tij për të rikthyer normalitetin në Kuvend dhe për t’u hequr nga duart revolucionarëve bombat tymuese dhe bilbilat, funksionoi, duke kuruar plagën më të rëndë të Berishës, mospërfilljen nga kundërshtari dhe bashkësia ndërkombëtare.
Gazment Bardhi nuk është se arriti ta bëjë Berishën faktor, por e bëri të ndjehet i tillë. Dhe kjo nuk është pak për një njeri në hall si Berisha. Pas kësaj, ai i dha të drejtë Bardhit të normalizojë situatën në Kuvend.
Marrëveshja për ngritjen e dy komisioneve hetimore është thjesht një justifikim qesharak, pasi dosja e sterilizimit sot ka kaluar në gjykatë, pas një hetimit të thelluar nga SPAK dhe nuk pritet që një komision hetimor parlamentar, që e kanë mendjen tek kamera e jo tek letrat, të gjejë diçka të re.
Sa i përket Komisionit të sistemit TIMS, ajo është çështje dhe më banale, por e vlefshme për të justifikuar objektivin për kthimin në normalitet të Kuvendit dhe krijimin e ndjesisë për Berishën sikur është respektuar.
E vetmja gjë që shkëlqen në këtë marrëveshje është Gazment Bardhi. Ai praktikisht arriti ta përdorë këtë proces për t’u evidentuar si figura kryesore e opozitarëve të Berishës, duke i bërë fillimisht të ndjehen të bashkuar e më pas që Berisha të ndjehet i përfillur.
Për këtë arsye ai ka tanimë të drejtën të jetë figura kryesore e tyre, derisa Berisha pranoi të shkëmbejë në gjithë këtë proces, përfilljen e tij, me lidershipin e Bardhit.
Se si do ta mbajë më tej këtë lidership është për t’u parë, por është e sigurtë se dhe ata që bënin si “ithtarë” të revolucionit ndjehen të lehtësuar, se së paku u ka dhënë shansin të mos turpëroheshin, në një revolucion pa revolucionarë.
Brenda një muaji ai arriti ta ndryshojë opozitën, duke i ndryshuar asaj mjetet politike, rrugën, dhe mbi të gjitha duke i krijuar ndjesinë se me të janë më mirë dhe më me shpreseëëë, se sa ishin me Berishën një muaj më parë.
Dhe janë vërtet më mirë. Përveç atyre që kanë dezhurnin tek rrugica.
