Bashkëshorti ka plagosur me thikë gruan e tij dhe fqinjin, ditën e sotme në Elbasan. Ngjarja ka ndodhur në lagjen “Dyle Haxhiri”. Policia bën me dije se Elmas Kalija, 55 vjeç ka goditur me thikë gruan e tij Shkëlqime Kalija si dhe komshiun që ndërhyri për ta ndaluar.
Në vendngjarje kanë mbërritur shërbimet e policisë, të cilët kanë kapur dhe shoqëruar autorin në komisariat. Burimet i thanë ABC se 55-vjeçari vuan nga probleme të shëndetit mendor dhe dy muajt e fundit nuk ka marrë kurën.
Njoftimi i policisë:
Elbasan/Informacion paraprak
Në lagjen “Dyle Haxhiri”, Elbasan, shtetasi E. K., 55 vjeç, banues në Elbasan, dyshohet se pas një konflikti për motive të dobëta, ka goditur me mjet prerës bashkëshorten e tij, shtetasen Sh. K., 50 vjeçe, si dhe fqinjin e tyre, shtetasin E. S., 64 vjeç, banues në Elbasan, i cili ka ndërhyrë për të ndaluar shtetasin E. K.
Të dy të plagosurit janë transportuar në spital dhe ndodhen jashtë rrezikut për jetën.
Falë reagimit të menjëhershëm nga ana e Policisë është bërë e mundur kapja dhe shoqërimi i autorit të dyshuar, shtetasit E. K., në ambientet e Policisë, për veprime të mëtejshme procedurale.
Grupi hetimor po punon për zbardhjen dhe dokumentimin e plotë të rrethanave të ngjarjes.
/abcnews.al
