Gazetarja Xhensila Kodra ka zbardhur detaje të tjera në lidhje me vrasjen e dyfishtë pasditen e djeshme në Tiranë, ku vëllai ekzekutoi me pistoletë vëllanë si edhe kunatën. Arsen Muskurti shkoi i qetë me armën në brez në biznesin e çiftit Alban dhe Nora Muskurti dhe pasi i ka ekzekutuar është larguar prej andej duke lënë armën në biznesin e tij dhe më pas ka shkuar në shtëpi.
Mësohet se vëllezërit jetonin më herët bashkë në zonën e Alliasit në Tiranë, por gjatë viteve të fundit, Arsen (Hamza) Muskurti ndërronte shpesh banesat e tij, ndërsa bizneset i kishin ngjitur, gjë që ishte një shkak tjetër për sherret mes tyre pasi ndarjes së rrugëve disa viteve më parë.
Për shkak të konflikteve të vazhdueshme, Alban Muskurti kishte kërkuar urdhër mbrojtje nga gjykata prej vëllait të tij, ku ishte caktuar edhe seanca gjyqësore më datë 6 shtator. Ndërkohë siç mëson ABC, gjykata kishte kërkuar nga Arsen Muskurti më datë 26 gusht paraqitjen para trupës gjykuese për të dëshmuar në lidhje me padinë e vëllait, gjë që dyshohet se ka ndezur edhe më tepër gjakrat mes vëllezërve, edhe pse konflikti ishte tashmë tepër i avancuar.
Mësohet se dy ditë para ditës së vrasjes, vëllezërit ishin konfliktuar edhe për parkimin e makinave. Pasi kreu krimin, Arsen Muskurti fshehu armën në kasafortën e biznesit të tij, ngjitur me atë të vëllait që vrau dhe më pas shkoi në banesë në zonën e 5 Majit ku edhe është arrestuar nga policia.
Intrigat dhe akuzat që çuan në ekzekutimin e dyfishtë
I ngjan një intrige të gjallë brenda familjes historia që çoi në vrasjen e çiftit Nora dhe Alban Muskurti pasditen e djeshme nga Arsen (Hamza) Muskurti. Abcnws.al mëson se vëllezërit Muskurti kishin hapur një biznes bashkë disa vite më parë, por për arsye se nuk merreshin vesh me ndarjen e të ardhurave kanë vendosur që të vijnë rrugëtimin e biznesit veç e veç.
Kështu, Nora dhe Alban Muskurti vijuan me kompaninë e udhëtimeve “NOOR”, e specializuar për dërgimin e besimtarëve myslimanë në Meke dhe Medinë, ndërkohë që pas Arsen (Hamza) Muskurti hapi një kompani udhëtimi të veten duke bërë të njëjtën gjë.
Krahas kësaj, Arsen (Hamza) Muskurti hapi edhe një dyqan për shitjen e produkteve kozmetike përballë në rrugën e Kavajës.
Abcnews.al mëson se të gjitha bizneset e vëllezërve ishin përballë xhamisë “Dine Hoxha” në Tiranë dhe rezulton sipas të dhënave të policisë dhe dëshmive të besimtarëve se ata ishin frekuentues të rregullt të saj ku shkonin dhe faleshin.
Megjithatë, besimi në Zot nuk duket se u ka zbutur zemrat vëllezërve, të cilët vazhdimisht kishin fërkime mes tyre. Kulmi arriti kur në rrjetet sociale u hapen disa profile në rrjetin social Facebook, të cilat hidhnin akuza të forta në lidhje me Arsen Muskurtin për marrëdhenie jashtëmartesore me gra të tjera krahas bashkëshortes së ligjshme. Hamza Muskurti akuzonte kunatën e tij, Nora për hapjen e këtij profili.
Nga ana tjetër, siç mëson abcnnews.al, Arsen Muskurti i arsyetonte këto akuza me argumentin se ai ishte i martuar me ato gra dhe në këtë marrëdhënie nuk kishte asgjë problematike për aq kohë sa çdo gjë ishte miratuar edhe nga bashkëshortja e ligjshme dhe kishin bërë “nikahun” (riti i martesës sipas myslimanëve).
Kështu, krahas konfliktit për biznesin, marrëdhenia mes Arsenit dhe familjes së vëllait të tij Albanit u zhvillua prej vitesh në këtë vorbull akuzash, fyerjesh publike dhe konfliktesh edhe me personazhe të tjerë, pjesë e “xhematit” të kësaj xhamie.
Gjithçka kulmoi dje, teksa Arsen Muskurti mori armën që e mbante në ambientet e biznesit të tij dhe shkoi duke vrarë me gjakftohtësi vëllanë dhe kunatën e tij brenda ambienteve të “NOOR Travel”, ndërkohë që më pas fiksohet nga kamerat e sigurisë që largohet me qetësi prej andej.
Arsen Muskurti u arrestua pak orë më pas nga policia duke lënë pas shumë pikëpyetje në lidhje me rrethanat që çuan deri në këtë krim monstruoz si edhe realitetet paralele në grupimet e caktuara shoqërore ku zhvillohet problematika kaq të mprehta që çojnë deri në drama të tilla. /abcnews.al
