Nënkryetarja e LDK-së Vjosa Osmani është zgjedhur kryetare e Kuvendit të Kosovës. Osmani mori 65 vota, asnjë votë kundër dhe asnjë abstenim.
Osmani u propozua për këtë pozitë nga Vetëvendosje, vendim ky që erdhi pas marrëveshjes për bashkëqeverisje me LDK-në.
Vjosa Osmani është kështu gruaja e parë që do të drejtojë Kuvendin e Kosovës. Gjatë fjalës së saj, ajo u shpreh se do t’i rikthejnë dinjitetin Kuvendit.
“Është nder shumë i madh që sot me besimin tuaj të zgjidhem që ta drejtojë Kuvendin e Kosovës për katër vitet e ardhshme. Falëndroj qytetarët e Kosovës, që asnjëherë nuk rreshti së besuar që vota e tij do ta sjellë ndryshimin.
“Të jemi një Kuvend që do të mbikëqyrë mirë dhe rreptë Qeverinë e Kosovës. Gjatë këtij mandati do t’ia kthejmë dinjitetin Kuvendit të Kosovës dhe po e shoh kualitetin e grupeve parlamentare”, u shpreh ajo.
Sakaq, qeveria e re e Kosovës me kryeministër Albin Kurtin u votua pasditen e sotme në Kuvend, me 66 vota pro. Qeveria e re përbëhet nga 15 ministra, 2 zëvndëskryeministra dhe 33 zëvendësministra.
Kujtojmë se më herët në postin e kryeparlamentarit u emërua Glauk Konjufca nga VV, ndërkohë pas marrëveshjes me LDK ai u propozua në kabinetin qeveritar si ministër i Jashtëm.
Ministrat e kabinetit qeveritar:
Anton Quni – Ministër i Mbrojtjes
Lumir Abdixhiku – Ministër për Infrastrukturë
Besian Mustafa – Ministër i Bujqësisë
Hykmete Bajrami – Ministre për Arsim
Agim Veliu – Ministër i Brendshëm
Vlora Dumoshi- Ministre për Kulturë, Rini dhe Sport
Ministria e Punëve të Jashtme – Glauk Konjufca
Ministria e Drejtësisë – Albulena Haxhiu
Ministria e Financave dhe Transferve – Besnik Bislimi
Ministria e Ekonomisë – Rozeta Hajdari
Ministria e Shëndetësisë – Arben Vitia
Ministria e Integrimeve Evropiane – Blerim Reka.
Ministre e Administratës – Emilia Rexhepi
Për komunitete e Kthim – Dalibor Jetvic
Për Zhvillim Rajonal – Ivan Milojevic.
/abcnews.al
