Një sasi prej 1 milion e 75 mijë euro të dyshuara të falsifikuara janë sekuestruar nga policia në aeroportin e Rinasit. Policia bën me dije se gjatë operacionit janë sekuestruar edhe letra që shërbenin për përgatitjen e kartëmonedhave false dhe një aparat celular.
Në pranga është vënë një 53-vjeçar Josoue Ngankam nga Kameruni që kishte leje qëndrimi në një nga vendet e Bashkimit Europian. ABC mëson se ai kishte ardhur nga Parisi duke kaluar në Turqi dhe më pas në Shqipëri. Nga hetimet është zbuluar se në bashkëpunim me persona të tjerë në vendin tonë ai do hidhte në treg kartëmonedhat e falsifikuara.
Tashmë po vijon puna për kapjen e bashkëpunëtorëve të tij ndërkohë që materialet iu referuan Prokurorisë së rrethit Gjyqësor Tiranë, për veprime të mëtejshme, për veprat penale “Falsifikimi i monedhave” dhe “Mashtrimi”.
“Finalizohet operacioni policor i koduar “Lastra”. Operacioni nga Komisariati i Policisë Rinas, në bashkëpunim me Seksionin për Hetimin e Krimit Ekonomik dhe Financiar. Goditet një rast i tentativës për të futur kartëmonedha të falsifikuara në vendin tonë, vihet në pranga 1 shtetas nga Kameruni. Sekuestrohen 1 milion e 75 mijë euro të dyshuara të falsifikuara, letra për përgatitjen e kartëmonedhave dhe një aparat celular.
Komisariati i Policisë Rinas, në bashkëpunim me specialistët e Seksionit për Hetimin e Krimit Ekonomik dhe Financiar në DVP Tiranë, pas informacioneve të marra në rrugë operative se një shtetas do tentonte të hynte në Shqipëri, me sasi të konsiderueshme kartëmonedhash të falsifikuara, organizuan dhe finalizuan operacionin policor të koduar “Lastra”, në kuadër të të cilit u bë arrestimi në flagrancë i shtetasit kamerunas J. N., 53 vjeç, me leje qëndrimi në një nga vendet e Bashkimit Evropian.
Gjatë kontrollit nga shërbimet e Policisë, në bagazhet e këtij shtetasi janë gjetur sasi e konsiderueshme kartëmonedhash të dyshuara të falsifikuara dhe lastra (letra që përdoren për të prodhuar kartëmonedha të prerjeve të ndryshme).
Në cilësinë e provës materiale u sekuestruan 1 milion e 75 mijë euro të dyshuara të falsifikuara, lastra, letër speciale për prodhimin e kartëmonedhave euro dhe një aparat celular. Nga veprimet hetimore dyshohet se ky shtetas, në bashkëpunim me shtetas të tjerë në vendin tonë, do të hidhte në qarkullim kartëmonedha të falsifikuara. Vijon puna për identifikimin dhe kapjen e bashkëpunëtorëve. Materialet iu referuan Prokurorisë së rrethit Gjyqësor Tiranë, për veprime të mëtejshme, për veprat penale “Falsifikimi i monedhave” dhe “Mashtrimi”, njofton policia. /abcnews.al
