Ministria e Arsimit i ka hequr licencën shkollës “Udha e Shkronjave” pasi dje njoftoi se do të pezullonte mësimin për të parandaluar përhapjen e koronavirusit.
Vendimi është njoftuar sot përmes një statusi në rrjetet sociale nga ministrja e Arsimit, Besa Shahni, e cila tha se mësimi pezullohet vetëm me urdhër të ministrit dhe askujt tjetër.
Një ditë më parë, shkolla vendosi pezullimin e procesit mësimor për të parandaluar ndonjë pasojë të mundshme nga koronavirusi. Sipas ministrisë, kjo gjë ka përhapur panik duke bërë që sot t’i heqin licencën.
Nxënësit e kësaj shkolle sipas Shahinit do të transferohen në shkollat e tjera.
“Shkolla mbyllet jashtë planit të vitit shkollor VETËM me urdhër ministri. Udhëheqësit e një shkolle private kishin vendosur të mos respektonin këtë dhe e kanë mbyllur shkollën për 2 javë. Në kushte të kësaj paligjshmërie, jemi të detyruar që shkollës t’ia heqim licencën”, shkruan ministrja në Facebook.
Abcnews.al mëson se vendimi për heqjen e licencës është marrë pas një inspektimi të kryer sot në mëngjes në shkollën “Udha e Shkronjave” nga Drejtoria Arsimore e Tiranës.
Pasi kanë konstatuar se nuk bëhej mësim ata kanë njoftuar ministrinë, e cila ka vendosur që t’i heqë licencën. /abcnews.al
Postimi i plotë i Shahinit
Shkolla mbyllet jashtë planit të vitit shkollor VETËM me urdhër ministri. Udhëheqësit e një shkolle private kishin vendosur të mos respektonin këtë dhe e kanë mbyllur shkollën për 2 javë. Në kushte të kësaj paligjshmërie, jemi të detyruar që shkollës t’ia heqim licencën.
Nxënësit do të transferohen në një shkollë tjetër. Ndërsa udhëheqësit e shkollës që përhapin panik duke mbyllur shkollën në mënyrë të jashtëligjshme, për gjoja parandalim të një situate virale e cila NUK ekziston në Shqipëri, duhet të ndiqen nga organet e drejtësisë.
Më vonë, shkolla reagoi sërish ndaj vendimit të Ministrisë së Arsimit duke theksuar se vijojnë mësimin online. “Sot, mësimi në shkollën “Udha e shkronjave” është duke u zhvilluar ONLINE dhe po na “shijon” shumë 
sepse jemi të kënaqur që kemi marrë një masë për mbrojtjen e shëndetit të tyre, duke shkëputur kontaktet fizike dhe duke ulur në maksimum ekspozimin ndaj sëmundjeve infektive, ndër to edhe coronavirusi i dyshuar (e theksojmë i dyshuar)”, shkruan shkolla në Facebook.
