Një ngjarje e rëndë ka ndodhur pasditen e 4 majit në Shqipëri.
Një 31-vjeçar ka vrarë vetën në ambientet e komisariatit të Kavajës.
Ilvi Meta , ishte ndaluar ditën e sotme nga policia pasi akuzohej për vjedhje dhe ishte dënuar më parë nga gjykata për të njëjtën vepër penale.
31-vjeçari u shoqërua rreth orës 15:50 pasi Gjykata kishte vendosur ndaj tij masën e sigurisë “Arrest në burg”, për vjedhje.
Burime për Abc bëjnë me dije se grupi i dhomës së paraburgimit ka tentuar të japë ndihmën e parë por ka qenë e pamundur pasi i riu kishte ndërruar jetë.
I riu dyshohet të jetë vetëvrarë me lidhëse bluzësh.
Kujtojmë që më 26 mars një tjetër ngjarje e rëndë ndodhi në komisariatin e Kamzës, ku një i ndaluar i vuri flakën qelisë dhe humbi jetën, ndërsa mbeti i lënduar edhe një oficer policie.
Njoftimi i policisë:
Informacion paraprak
Lidhur me ngjarjen e ndodhur sot në Komisariatin e Policisë Kavajë, ku ka humbur jetën një shtetas i arrestuar, dyshohet i vetëvarur në qeli, Agjencia e Mbikëqyrjes Policore ka ngritur një grup të posaçëm hetimor.
Shtetasi I.M., 31 vjeç, ishte arrestuar sot me vendim të Gjykatës së Rrethit Kavajë, e cila kishte vendosur masën e sigurisë “Arrest me burg”, mbi dyshimet si autor i disa vjedhjeve.
Menjëherë pas marrjes dijeni të ngjarjes, AMP ka nisur hetimet për sqarimin e rrethanave, mekanizmit të ngjarjes, si edhe nxjerrjen e përgjegjësive.
Në fund të këtyre hetimeve, AMP do të ketë një komunikim më të detajuar.
/Abcnews.al/
