Dy të verdha nuk bëjnë të kuqe/ Gafë e rëndë e arbitrit në ndeshjen miqësore Angli-Uruguaj

U kujtua menjëherë ajo që ndodhi në 2006.

Ishte Kupa e Botës në Gjermani, ndeshja e grupit Kroaci-Australi, dhe arbitri anglez, Graham Poll, u bë I famshëm për keq, pasi la në fushë lojtarin kroat, Josip Simunic, edhe pse I dha dy të verdha.

Në sekondat shtesë, Poll I dha atij edhe të verdhën e tretë dhe pastaj e përjashtoi me të kuq.

Kjo skenë u përsërit thuajse njësoj në miqësoren mes Anglisë dhe Uruguajit të luajtur në “Uembli”, në përgatitje për Kupën e Botës në verë.

Ai që gaboi rëndë këtë herë ishte arbitri gjerman, Sven Jablonski, dhe kjo ndodhi në 10 minutat e fundit.

Gjyqtari në fushën e stadiumit “Uembli” I dha të verdhin e parë lojtarit të Uruguajit, dhe të Mançester Junajtidit, Manuel Ugarte.

Më pas, I dha edhe të verdhën e dytë, por jo edhe të kuqin.

Në ndryshim nga Graham Poll 20 vjet më parë, Jablonski nuk pati fatin ta ndëshkonte Ugarten për herë të tretë, sepse trajneri uruguajan Marselo Bielsa u tregua më I shpejtë duke e zëvendësuar.

Mediat angleze shkruajtën menjëherë se u rikthye momenti “Graham Poll”, ndonëse kritikat për “shpikësit e futbollit” ishin të ashpra.

Sfida në “Uembli” përfundoi 1-1, me gola të shënuar gjithashtu në fund, fillimisht nga Ben Uajt për vendasit në 81’ dhe pastaj nga ylli I Realit, Federiko Valverde, me penallti për amerikanolatinët.

Trajneri I Anglisë, Tomas Tuhel, bëri shumë eksperimente, ndërsa “tre luanët” nuk bindën.