Dy raste inskenimesh të rënda përgjatë këtij viti kanë “nxirë” figurën e vendit tonë në shtetet fqinje Itali dhe Greqi.
Rasti i parë është ai që u zbulua sot, pikërisht 9 muaj nga zhdukja e biznesmenit italian Davide Pecorelli, makina e të cilit u gjet e djegur në Pukë në datën 9 janar. Policitë e dy vendeve kishin nisur hetimet për vrasje ndërsa në listën e të hetuarve ishin një sërë emrash biznesmenësh në vendin tonë të cilët Davide i kishte takuar gjatë qëndrimit në Shqipëri.
Por e vërteta rezultoi krejt ndryshe. Ai kishte dalë nga Shqipëria duke nisur një jetë të re në Toscana, ku u gjet nga policia italiane në një gomone në brigjet e Livornos.
Dyshohet se shkak për këtë sajesë kinematografike ishin bërë borxhet që kishte Pecorelli në Itali pas falimentimit të bizneseve të tij dhe tashmë synonte që të përfitonte nga siguracionet e jetës.
Por ndonëse fakti që është gjallë përbën një lajm të mirë, për Pecorellin nis një tjetër telash, ai i vënies përballë drejtësisë me akuzën e mashtrimit.
Një tjetër rast i bujshëm që u lakua për muaj të tërë ishte ai vrasjes së Caroline Cruch në Greqi nga i shoqi Babis Anagnostopolus në shtëpinë e tyre në Glyka Nera. Me gjakftohtësi ai sajoi një grabitje duke i thënë policisë se persona me maska ishin futur në shtëpinë e tyre duke vrarë Carolinën dhe duke varur qenin e tyre në shkallët e banesës.
Dhe në lidhje me këtë makabritet sajoi një indicie që të drejtonte dyshimet e hetuesve për përfshirjen e grabitësve shqiptarë, por autori rezultoi të ishte vetë ai. m.v/abcnews.al
