Komiteti Olimpik Ndërkombëtar ka marrë vendimin sa i përket Lojërave Olimpike të Tokyos të programuar për t’u zhvilluar nga 24 korriku deri në 9 gusht të këtij viti, të cilat janë nën kërcënimin e koronavirusit.
Për momentin nuk mendohet për anulimin e eventit, por vetëm për shtyrjen e tij. Hipotezat që janë ngritur në lidhje me shtyrjen e eventit sportiv janë tre: Lojërat Olimpike do të shtyhen në fund të muajit gusht, në tetor, ose do të shtyhen për në vitin 2021, madje ka zëra që flasin edhe për një shtyrje në vitin 2022.
Në rastin e parë flitet për zhvillimin e Lojërave nga 25 gushti deri në 6 shtator, data që janë të destinuara për Lojërat Para-olimpike. Ndërsa sa i përket rastit të dytë, ekziston një precedent me Lojërat Olimpike që zhvillohen në vjeshtë dhe bëhet fjalë për Lojërat e 1964 të zhvilluara pikërisht në Tokyo.
Skenari më i keq i mundshëm nga ana tjetër, në rast se nuk normalizohet situata është shtyrja e Lojërave Olimpike në vitin 2021, mbase dhe në vitin 2022./abcnews.al
