Ivan Balliu u ftua nga Edy Reja në këtë grumbullim të kombëtares për ndeshjet e shtatorit, por vetë lojtari refuzoi të vinte për shkak të një problemi fizik, siç e tregoi edhe trajneri Reja në konfernecën për mediet.
Gjithsesi, ai ishte titullar në ndeshjen e LaLiga ndaj Granadas para dy ditësh dhe shtoi dyshimet për një problem fizik “të shpikur” për të shmangur grumbullimin. Për të shuar zërat ka menduar vetë 29-vjeçari përmes një postimi në Twitter.
“Të nderuar fansa dhe miq shqiptarë! Siç e keni dëgjuar, këtë herë nuk do të jem pjesë e ekipit kombëtar. Sidoqoftë, kjo nuk ka të bëjë me faktin se unë nuk dua, por sepse trupit tim i duhet kohë të rigjenerohet, për të parandaluar diçka më të keqe.
Jam gjithmonë krenar të vesh fanellën kuqezi dhe të përfaqësoj tokën e rrënjëve të mia me gjithë shpirt. Përjetësisht me ty Shqipëri. Me respekt, Ivan Balliu”, shkruan anësori. /abcnews.al
— Ivan Balliu Campeny (@ivan_balliu) August 31, 2021
