Armando Dobra i kanë mjaftuar vetëm pak minuta në debutimin e tij me Kombëtaren U-19 që t’i tregonte të gjithëve se kishte shumë talent dhe se ardhmja e tij mund të jetë e shkëlqyer. Mesfushori i lindur dhe rritur në Angli është një prej lojtarëve më premtues të gjeneratës së tij dhe aktualisht militon në radhët e Kombëtares U-21 të drejtuar nga Alban Bushi.
Edhe në dy ndeshjet e fundit të kuqezinjve ai ka spikatur me driblimet dhe pasimet e tij plot fantazi. Veçanërisht në fitoren e fundit 3-1 ndaj Andorrës paraqitja e tij ishte mjaft e mirë dhe nuk kaloi pa rënë në sy. Jo më kot klubi i tij Ipsëich Toën vendosi t’i ofronte një kontratë të re 5 muaj më parë, ndërkohë që lojtari grumbullohet rregullisht me ekipin e parë çdo ndeshje.
Në intervistën e tij për rubrikën “Talenti Shqiptar” në fshf.org, Dobra rrëfen rrugëtimin e tij në futboll dhe momente më kulminante të karrierës së tij. 19-vjeçari i ka idetë e qarta dhe shpreson që në të ardhmen të ngjitet në majat më të larta të futbollit, si në nivel klubesh ashtu edhe me Kombëtaren kuqezi.
PASIONI PËR FUTBOLLIN – “Im atë ka qenë gjithmonë një tifoz i madh futbolli. Prej tij në fakt nisa ta pëlqej edhe unë futbollin qysh në moshë të vogël. Mbaj mend që shkonim shpesh në park dhe luanim bashkë me top që kur kam qenë 4-5 vjeç”.
KLUBI DHE KOMBËTARJA – “Mendoj se kemi një grup mjaft të mirë lojtarësh, jam ndjerë mirë duke filluar që nga dita e parë e grumbullimit. Kemi një grup shumë të talentuar dhe mendoj se mund të bëjmë gjëra të mirë bashkë. Gjithashtu, edhe trajneri Bushi më ka mbështetur shumë gjatë gjithë kohës, në seanca stërvitore dhe në ndeshje dhe më tregoi se donte shumë të isha pjesë e skuadrës së tij. Më ka ndihmuar shumë dhe i jam mirënjohës për këtë.
Sa i përket klubit, mendoj se jam paraqitur vazhdimisht mirë me Ipsëich-in, kam luajtur me skuadrën e parë dhe kam shënuar gola madje para disa javësh. Shpresoj shumë që të vazhdoj të bëjë paraqitje sa më të mira edhe këtë sezon dhe të forcoj pozitat e mia në skuadër”.
FTESA NGA KOMBËTARJA – “Marrja e ftesës për të luajtur me ekipin Kombëtar U-21 të Shqipërisë ishte një ëndërr e bërë realitet. Jam ndjerë shumë krenar kur luajta ndeshjen e time të parë me ngjyrat kuqezi dhe do ta mbaj mend përgjithmonë atë ndjesi krenarie që përjetova”.
MOMENTI MË I BUKUR – “Sa i përket klubit, ishte momenti kur shënova ndaj Luton në ndeshjen e debutimit. Nuk kishte ku të shkonte më mirë se kaq. Ishte fantastike të shënoja gol që në ndeshjen time të parë me Ipsëich Toën.
Ndërsa me Kombëtaren U-21, momenti më i bukur ishte kur shënova gola me ndaj Greqisë në ndeshje zyrtare për eliminatoret e Evropianit. Ka qenë një moment i jashtëzakonshëm krenarie për mua dhe nuk do ta harroj kurrë”.
SAKRIFICA – “Më e madhja ishte largimi nga familja për t’u transferuar në Ipsëich. Ka qenë e vështirë për mua të jetoja larg shtëpisë time dhe familjes, por isha i vendosur për të ndjekur ëndrrën time dhe e mora pa u menduar gjatë këtë vendim”.
E ARDHMJA – “Synimi im për të ardhmen që të bëhem një lojtar titullar i rregullt te Ipsëich Toën. Ëndërroj gjithmonë që të luaj një ditë në Premier Ligën angleze si edhe të debutoj me Kombëtaren A të Shqipërisë”.
IDHULLI – “Unë nuk kam një idhull në Kombëtaren shqiptare për të qenë i sinqertë, por idhulli im në futboll është Lionel Messi”, përfundoi talenti i kombëtares kuqezi. /abcnews.al
