Loading ...
Presidenti amerikan, Donald Trump, ka deklaruar se Uashingtoni ndodhet përballë një zgjedhjeje vendimtare lidhur me Iranin: arritjen e një marrëveshjeje diplomatike me Teheranin ose përfundimin e përballjes përmes forcës ushtarake.
Në një intervistë për televizionin amerikan Fox News, Trump ka përsëritur se duhet të vendosë nëse do t’i japë më shumë hapësirë diplomacisë apo do të ndërmarrë veprime ushtarake kundër Iranit.
“Duhet të arrij një marrëveshje apo duhet t’i jap fund atyre? Kjo është e vetmja pyetje.” tha Trump
Kreu i Shtëpisë së Bardhë ka komentuar gjithashtu zhvillimet në Ngushticën e Hormuzit, një nga korridoret më të rëndësishme strategjike për transportin ndërkombëtar të naftës. Trump ka pretenduar se Shtetet e Bashkuara kanë kontroll të plotë mbi situatën në këtë zonë, duke lënë të kuptohet se Uashingtoni ka avantazh në përballjen me Teheranin.
“Ne marrim gjithçka, ata nuk marrin asgjë.” shtoi ai.
Deklaratat e presidentit amerikan vijnë në një klimë të tensionuar mes Uashingtonit dhe Teheranit, ndërsa mundësia e një marrëveshjeje diplomatike mbetet në fokus, paralelisht me kërcënimet për përshkallëzim të mëtejshëm ushtarak.
Në qendër të vëmendjes është edhe Ngushtica e Hormuzit, përmes së cilës kalon një pjesë e rëndësishme e furnizimit botëror me naftë. Çdo ndërprerje e lundrimit në këtë korridor mund të ndikojë në tregjet ndërkombëtare të energjisë, të rrisë çmimet e naftës dhe të krijojë pasiguri në furnizimin global.
Përballja mes Shteteve të Bashkuara dhe Iranit mbetet, kështu, një çështje me pasoja jo vetëm për sigurinë në Lindjen e Mesme, por edhe për ekonominë botërore./abcnews.al
