Një diamant i zi miliardavjeçar, që besohet të jetë diamanti më i madh i prerë në Tokë, do të dalë në ankand. Ekzistojnë teori konkurruese rreth origjinës së perlës, të quajtur “Enigma”, duke përfshirë se diamanti erdhi nga hapësira. Diamanti që peshon 555,55 karat konsiderohet jashtëzakonisht i rëndë për një diamant, me peshë pothuajse të njëjtë me një banane.
Guri i çmuar pritet të shitet për një shifër mbi 6 milion dollarë në një ankand të Sotheby’s në Londër deri në mbylljen e ofertës online javën e ardhshme. Guri i çmuar është një karbonado, një nga format më të vështira të diamantit natyror. Diamantet e zeza janë zakonisht rreth 2.6 deri në 3.2 miliardë vjet të vjetër dhe kanë ekzistuar përpara se të ekzistonin dinosaurët raporton “BBC”.
Vetë Toka është rreth 4.65 miliardë vjet e vjetër, pra jo shumë më e vjetër se diamantet e zeza. Karbonadot janë jashtëzakonisht të rralla dhe janë zbuluar ndonjëherë vetëm në Brazil dhe në Republikën e Afrikës Qendrore. Për shkak se ato përmbajnë osbornit, një mineral që gjendet vetëm në meteorë, besohet se e kanë origjinën nga hapësira.
Por origjina e tyre e saktë është e mbuluar me mister. Aaron Celestian, një gjeolog në Muzeun e Historisë Natyrore të Los Anxhelosit, tha se këto lloje diamantesh “mund të ishin formuar super thellë brenda brendësisë së Tokës, shumë më thellë se sa dimë tashmë për diamantet”. “Ka hipoteza që sugjerojnë se ato janë formuar në vendet ku një asteroid i madh ra në tokë,” i tha ai agjencisë së lajmeve “Reuters”.
Një teori konkurruese është se diamantet e zeza mund të jenë formuar në hapësirën e jashtme përpara se të bien në Tokë. Sotheby’s po e përshkruan shitjen si një “mundësi një herë në jetë për të blerë një nga mrekullitë më të rralla, miliarda vjeçare të njohura për njerëzimin”. Përveçse peshon saktësisht 555,55 karat, diamanti është prerë për të shfaqur 55 aspekte ose fytyra. / abcnews.al
