Liderët europianë nuk i kanë zhgënjyer pritshmëritë. Sikurse ishte paralajmëruar, samiti për emigrantët i mbajtur të dielën në Bruksel ka dështuar, me krerët e shteteve që nuk kanë gjetur gjuhën e përbashkët për t’i dhënë një zgjidhje të unifikuar krizës së emigracionit.
Gjatë punimeve, kryeministri i Italisë, Giuseppe Conte kërkoi që BE të shfuqizojë kriterin që parashikon pritjen e emigrantëve nga vendi i parë ku ata zbarkojnë. Conte kërkoi që të ngrihen kampe pritëse në vendet tranzit, ku të regjistrohen emigrantët e përshtatshëm për të ardhur në Europë dhe ata që duhen kthyer mbrapsht.
Presidenti francez nga ana tjetër ka akuzuar disa vende se po përpiqen të kthejnë në instrument krizën e emigrantëve, për të krijuar tension politik dhe për të luajtur me frikën e njerëzve. Macron ka deklaruar se vendet europiane duhet të kenë një qasje efikase dhe humane ndaj çështjes së emigrantëve.
Nga ana tjetër, kryeministri spanjoll Pedro Sanchez ka deklaruar se vendi i tij do ta shqyrtojë propozimin e Italisë, ndërsa kancelarja Merkel ka thënë se në këtë situatë, zgjidhja mbetet në marrëveshjet dy ose trepalëshe mes vendeve anëtare./abcnews.al
