Barcelona reagoi në mënyrën e duhur pas humbjes 1-3 në El Clasicon përballë Real Madrid fundjavën e kaluar. Skuadra katalanase fitoi 0-2 jashtë fushe përballë Juventusit të Pirlos, falë golave të Ousmane Dembele dhe kapitenit Leo Messi.
Ekipi i Roland Koeman kryeson grupin G të Champions League me 6 pikë të plota pas dy takimeve të para. Frenkie De Jong vlerëson lojën e Barcelonës, teksa thekson në prononcimin e dhënë për sajtin zyrtar të UEFA-s se u zbavit shumë në fushën e lojës.
“Mendoj se luajtëm një ndeshje të madhe, sidomos në pjesën e dytë. Zotëruam topin dhe e qarkulluam shumë mirë atë, duke i hequr mundësinë Juventusit të na rrezikonte. Nuk është diçka e thjeshtë ta bësh këtë në një fushë aq të vështirë si ajo e Torinos.
Pedri? Mosha nuk ka rëndësi kur Zoti të ka dhënë aq shumë talent. U zbavita shumë në ndeshjen me Juventusin. Jam mësuar të luaj në mesfushë, por kam luajtur edhe përpara mbrojtjes kur isha më i vogël. Gjithsesi, jam gati të luaj aty ku do trajneri“, deklaron mesfushori holandez. /abcnews.al
