Barcelona është gati për sfidën ndaj Real Madrid. Dy skuadrat më të fortë të Spanjës do të përballen mes tyre në mbrëmje në “Santiago Bernabeu”. Skuadra e Setien do të bëjë maksimumin për të fituar dhe ruajtur vendin e parë, teksa Frenkie De Jong nuk i kursen thumbimet për kundërshtarët.
“Harkëtarët” arritën një fitore spektakolare me rezultatin 1-4 sezonin e kaluar në Madrid dhe eliminuan kampionët në fuqi nga Champions League. 22-vjeçari shpreson të fitojë me të njëjtën mënyrë me Barcelonën, teksa ndalet edhe te Sergio Busquets në deklaratën për Ziggo Sports.
“Dua një tjetër fitore 1-4, si ajo që arritëm me Ajax sezonin e kaluar në Champions League. Busquets po më ndihmon shumë, bisedoj për gjithçka me të dhe më jep informacion për atë që ndodh në klub. Më ka dhënë shumë këshilla që prej momentit që kam ardhur te Barcelona.
Roli im? Më pëlqen të kem sa më shumë topin në qarkullim, por më duhet të përshtatem edhe më shumë. E kuptoj dhe e pranoj faktin që njerëzit që kanë parë ndeshjen time kundër Napolit kanë menduar se nuk jam ai lojtari që isha te Ajax“, përfundon De Jong. /abcnews.al
